ວັນທີ 25 ກຸມພານີ້, ຈີນແລະສ.ເກົາຫຼີໄດ້ສຳເລັດການເຊັນຊົ່ວຄາວເອກະສານທັງໝົດຂອງສັນຍາການຄ້າເສລີຈີນ-ສ.ເກົາຫຼີ, ແລະໄດ້ຢືນຢັນຕໍ່ເນື້ອໃນຂອງສັນຍາແລ້ວ. ມາຮອດປະຈຸບັນ, ການເຈລະຈາກ່ຽວກັບການສ້າງເຂດການຄ້າເສລີຈີນ-ສ.ເກົາຫຼີໄດ້ສຳເລັດຢ່າງຮຽບຮ້ອຍແລ້ວ. ວົງການຕ່າງໆຂອງສ.ເກົາຫຼີໄດ້ໃຫ້ຄວາມສຳຄັນໃນລະດັບສູງທັງໄດ້ຕີລາຄາໃນທາງບວກຕໍ່ເລື່ອງດັ່ງກ່າວ.
ມື້ດຽວກັນ, ຂ່າວສານໂຢນຮັບຂອງສ.ເກົາຫຼີໄດ້ພິມບົດວິຈານວ່າ: ການເຊັນຊົ່ວຄາວເອກະສານເຂດການຄ້າເສລີຈີນ-ສ.ເກົາຫຼີແມ່ນການກ້າວກະໂດດຄັ້ງໃໝ່ໃນການເຈລະຈາກ່ຽວກັບການສ້າງເຂດການຄ້າເສລີຈີນ-ສ.ເກົາຫຼີ, ທັງເປັນຂີດໝາຍສະແດງໃຫ້ເຫັນວ່າເວລາແຫ່ງການເຊື່ອມຈອດກັນດ້ານເສດຖະກິດລະຫວ່າງສ.ເກົາຫຼີແລະຈີນໄດ້ເລີ່ມໝູນໄປແລ້ວ.
ມື້ດຽວກັນ, ຄະນະກຳມະການນະໂຍບາຍພົນລະເມືອງຕໍ່ສັນຍາການຄ້າເສລີຂອງສ.ເກົາຫຼີທີ່ປະກອບດ້ວຍອົງການຈັດຕັ້ງເສດຖະກິດຫຼາຍອົງການກໍ່ໄດ້ສະແດງຄວາມຊົມເຊີຍຕໍ່ການເຊັນຊົ່ວຄາວເອກະສານເຂດການຄ້າເສລີຈີນ-ສ.ເກົາຫຼີ. ເຊິ່ງຄະນະກຳມະການດັ່ງກ່າວກ່າວວ່າ: ສັນຍາການຄ້າເສລີຈີນ-ສ.ເກົາຫຼີຈະຊ່ວຍໃຫ້ສ.ເກົາຫຼີສາມາດປັບປຸງສະພາບແວດລ້ອມການຄ້າຂາອອກແລະການລົງທຶນຢູ່ຕະຫຼາດຈີນກ່ອນກວ່າຄູ່ແຂ່ງຂັນອື່ນໆຕື່ມອີກ.