ວັນທີ 25 ກຸມພານີ້ຕາມເວລາທ້ອງຖິ່ນ, ທ່ານຢາງເຈສື, ທີ່ປຶກສາແຫ່ງລັດຈີນ ໄດ້ພົບປະເຈລະຈາກັບທ່ານນາງຊູຊັນ ຣາຍສ໌, ຜູ້ຊ່ວຍວຽກງານຄວາມໝັ້ນຄົງແຫ່ງຊາດຂອງທ່ານບາຣັກ ໂອບາມາ, ປະທານາທິບໍດີອາເມລິກາຢູ່ເມືອງນິວຢອກຂອງອາເມລິກາ. ສອງຝ່າຍໄດ້ເຫັນດີເປັນເອກະສັນກັນວ່າ: ທ່ານສີຈິ້ນຜິງ, ປະທານປະເທດຈີນຈະເດີນທາງໄປຢ້ຽມຢາມອາເມລິກາທາງລັດຖະກິດໃນເດືອນກັນຍາປີນີ້, ແມ່ນເຫດການທີ່ມີຄວາມໝາຍສຳຄັນຫຼາຍ, ສອງຝ່າຍຄວນປະສານງານກັນຢ່າງໃກ້ຊິດ, ປະຕິບັດວຽກງານກະກຽມໃນທຸກດ້ານໃຫ້ດີ, ເພື່ອຮັບປະກັນການຢ້ຽມຢາມຂອງທ່ານສີຈິ້ນຜິງໃຫ້ໄດ້ຮັບຜົນສຳເລັດຢ່າງຈົບງາມ.
ທ່ານຢາງເຈສືຊີ້ອອກວ່າ: ສອງຝ່າຍຄວນຈັດຕັ້ງປະຕິບັດຄວາມຮັບຮູ້ທີ່ເປັນເອກະສັນກັນທີ່ປະມຸກລັດສອງປະເທດຈີນ-ອາເມລິກາໄດ້ຕົກລົງກັນນັ້ນຢ່າງຕັງໜ້າ, ເພີ່ມທະວີການພົວພັນແລະການປະສານງານກ່ຽວກັບບັນຫາທີ່ສຳຄັນກ່ຽວກັບພາກພື້ນ, ສາກົນແລະບັນຫາລັກສະນະທົ່ວໂລກ, ແກ້ໄຂຄວາມຂັດແຍ້ງກັນແລະບັນຫາອ່ອນໄຫວຢ່າງເໝາະສົມ, ແລະຊຸກຍູ້ສາຍພົວພັນຈີນ-ອາເມລິກາໃຫ້ໄດ້ຮັບຄວາມຄືບໜ້າຫຼາຍກວ່າເກົ່າໃນປີໃໝ່ນີ້.
ທ່ານນາງຣາຍສ໌ກ່າວ່າ: ອາເມລິກາຍິນດີເພີ່ມທະວີການພົວພັນຮ່ວມມືກັບຈີນໃນທຸກຂົງເຂດແລະທຸກຂັ້ນໂດຍອີງຕາມຄວາມຮັບຮູ້ທີ່ເປັນເອກະສັນກັນຂອງປະມຸກລັດສອງປະເທດ, ຮ່ວມກັນປະເຊີນໜ້າກັບສິ່ງທ້າທາຍໃນພາກພື້ນແລະສາກົນ, ພ້ອມທັງຮ່ວມກັນຄຸ້ມຄອງແລະຄວບຄຸມຄວາມຂັດແຍ້ງກັນລະຫວ່າງສອງຝ່າຍຢ່າງມີປະສິກທີພາບດ້ວຍຄວາມກົງໄປກົງມາແລະມີລັກສະນະສ້າງສັນເພື່ອ ຮັກສາທ່ວງທ່າຂະຫຍາຍຕົວທີ່ດີຂອງສາຍພົວພັນອາເມລິກາ-ຈີນ.
ສອງຝ່າຍຍັງໄດ້ແລກປ່ຽນຄຳຄິດຄຳເຫັນກ່ຽວກັບບັນຫາຕ່າງໆເຊັ່ນກິດຈະກຳ ຕ່າງໆເພື່ອລະນຶກວັນສ້າງຕັ້ງອົງການສະຫະປະຊາຊາດຄົບຮອບ 70 ປີ, ວາລະວ່າວຽກກ່ຽວກັບການພັດທະນາຫຼັງປີ 2015, ການປ່ຽນແປງດ້ານດິນຟ້າອາກາດ, ການຕ້ານການກໍ່ການຮ້າຍ, ການຕ້ານພະຍາດອີໂບລາແລະອື່ນໆ.