ເຮືອບິນໂດຍສານຖ້ຽວບິນ TG 608 ຂອງບໍລິສັດການບິນໄທທີ່ອອກເດີນທາງຈາກພູເກັດຂອງໄທບິນໄປສູ່ຮົງກົງໄດ້ລົງຈອດຢູ່ສະໜາມບິນສາກົນເຊັກລັບກົກຮົງກົງໃນເວລາປະມານ 19 ໂມງຂອງວັນທີ 26 ກຸມພານີ້,ໃນຂະນະເຮືອບິນລຳດັ່ງກ່າວກຽມຈະຈອດຢູ່ບ່ອນທີ່ໄດ້ກຳນົດໄວ້ ບັງເອີນໄດ້ແລ່ນຖອຍຫຼັງກະທັນຫັນ ເຊິ່ງເຮັດໃຫ້ມີ 4 ຄົນໄດ້ຮັບບາດເຈັບ.
ພາຍຫຼັງເຈົ້າໜ້າທີ່ຕຳຫຼວດໄດ້ຮັບການລາຍງານແລ້ວໄດ້ສົ່ງລົດໂຮງໝໍໄປສະຖານທີ່ເກີດເຫດ, ຜູ້ບາດເຈັບເລັກນ້ອຍ 3 ຄົນເມື່ອໄດ້ປິ່ນປົວໃນເບື້ອງຕົ້ນແລ້ວບໍ່ຈຳເປັນຕ້ອງສົ່ງໄປປິ່ນປົວຢູ່ໂຮງໝໍອີກ, ມີພຽງແມ່ຍິງຄົນດຽວເທົ່ານັ້ນທີ່ຕ້ອງໄດ້ສົ່ງໄປປິ່ນປົວຢູ່ໂຮງໝໍເປີຍຕ້າຢູຊ່ານຂອງຮົງກົງ, ສາມີແລະລູກຊາຍຂອງນາງພ້ອມດ້ວຍພະນັກງານບໍລິສັດການບິນຜູ້ໜຶ່ງໄດ້ຕິດຕາມນາງໄປໂຮງໝໍດ້ວຍຄວາມເອົາໃຈໃສ່.
ຕາມຂ່າວແຈ້ງວ່າ ໃນເວລາເກີດເຫດ, ເຮືອບິນລຳດັ່ງກ່າວໄດ້ລົງຈອດຮຽບຮ້ອຍແລ້ວ, ແຕ່ໃນເວລາພະນັກງານສະໜາມບິນກຽມຈະຍ່າງເຂົ້າໃກ້ເພື່ອເຮັດໃຫ້ຕີນຍົນຈຶ້ງກັບທີ່ນັ້ນ, ບັງເອີນເຮືອບິນແລ່ນຖອຍຫຼັງກະທັນຫັນ, ນັກບິນຈຶ່ງໄດ້ເຮັດໃຫ້ເຮືອບິນຢຸດໂດຍດ່ວນອີກຄັ້ງໃໝ່ຢ່າງ ທັນທີ ຈິ່ງເຮັດໃຫ້ມີຄົນລົ້ມບາດເຈັບ.
ໂຄສົກບໍລິສັດການບິນໄທຍອມຮັບວ່າເຮືອບິນໂດຍສານລຳດັ່ງກ່າວໄດ້ເກີດອຸບັດເຫດຢ່າງແທ້ຈິງ, ສາເຫດທີ່ເຮັດໃຫ້ເກີດອຸບັດເຫດຄັ້ງນີ້ຍັງກຳລັງສືບສວນຢູ່.
 |
