ຕາມຂ່າວສານຈີນລາຍງານວ່າ ກອງປະຊຸມຄັ້ງທີ 3 ຂອງສະພາປະຊາຊົນແຫ່ງຊາດຈີນສະໄໝທີ 12 ໄດ້ດຳເນີນກອງປະຊຸມຄົບຄະນະເທື່ອທີສອງໃນຕອນບ່າຍວັນທີ 8 ມີນານີ້, ໂດຍໄດ້ຮັບການມອບໝາຍຈາກຄະນະກຳມະການປະຈຳສະພາປະຊາຊົນແຫ່ງຊາດຈີນ, ທ່ານຈ່າງເຕີຈ່ຽງ ປະທານສະພາປະຊາຊົນແຫ່ງຊາດໄດ້ຂຶ້ນກ່າວບົດລາຍງານວຽກງານຕໍ່ກອງປະຊຸມ. ທີ່ປະຊຸມໄດ້ຟັງຄຳຊີ້ແຈງກ່ຽວກັບຮ່າງກົດໝາຍວ່າດ້ວຍນິຕິບັນຍັດສະບັບດັດແກ້.
ບົດລາຍງານຂອງທ່ານຈ່າງເຕີຈ່ຽງໄດ້ສະຫຼຸບວຽກງານຕົ້ນຕໍຈາກ 7 ດ້ານໃນປີທີ່ຜ່ານມາ ຄື ໜຶ່ງແມ່ນຍຶດໝັ້ນການນຳພາຂອງພັກ, ມີຄວາມເຊື່ອໝັ້ນຢ່າງເດັດດ່ຽວຕໍ່ລະບອບສະພາປະຊາຊົນ. ສອງ, ກຳແໜ້ນຄຸນນະພາບນິຕິບັນຍັດເຊິ່ງເປັນຂໍກຸນແຈ, ເສີມຂະຫຍາຍບົດບາດຂອງນິຕິບັນຍັດໃນການຊັກນຳແລະການຊຸກຍູ້ຢ່າງເຕັມທີ່. ສາມ, ທຳການຕົກລົງກ່ຽວກັບບັນຫາດ້ານກົດໝາຍໂດຍອີງຕາມກົດໝາຍ, ປົກປັກຮັກສາຄວາມ ສັກສິດດ້ານກົດໝາຍຂອງລັດຖະທຳມະນູນ. ສີ່ ຍຶດໝັ້ນທິດທາງເພື່ອແກ້ໄຂບັນຫາ, ເພີ່ມທະວີວຽກງານຕິດຕາມກວດກາໃຫ້ມີລັກສະນະຈຸດສຸມແລະມີປະສິດທິຜົນໃຫ້ຫຼາຍກວ່າເກົ່າ. ຫ້າ, ເຄົາລົບຖານະຕົ້ນຕໍຂອງຜູ້ແທນ, ຍົກລະດັບວຽກງານຮັບປະກັນແລະບໍລິການຂອງຜູ້ແທນໃຫ້ສູງຂຶ້ນ. ຫົກແມ່ນເພີ່ມທະວີການຕິດຕໍ່ພົວພັນກັບສະພາປະຊາຊົນຂັ້ນທ້ອງຖິ່ນ, ຮ່ວມກັນຊຸກຍູ້ວຽກງານສະພາປະຊາຊົນໃຫ້ຂະຫຍາຍຕົວສົມບູນຂຶ້ນ. ເຈັດແມ່ນປິ່ນອ້ອມວຽກງານໃຈກາງ, ຮັບໃຊ້ສະພາບລວມ, ປະສານງານເປັນເອກະພາບກັນເພື່ອປະຕິບັດວຽກງານຕ່າງໆໃຫ້ດີເປັນຕົ້ນແມ່ນການໄປມາຫາສູ່ກັນກັບຕ່າງປະເທດ, ວຽກງານຖະແຫຼງຂ່າວ-ໂຄສະນາອົບຮົມແລະອື່ນໆ.
ໂດຍໄດ້ຮັບການມອບໝາຍຈາກຄະນະກຳມະການປະຈຳສະພາປະຊາຊົນແຫ່ງຊາດຈີນ, ທ່ານຫຼີຈ້ຽນໂກວ ຮອງປະທານສະພາປະຊາຊົນແຫ່ງຊາດຈີນໄດ້ໃຫ້ຄຳຊີ້ແຈງກ່ຽວກັບຮ່າງກົດໝາຍວ່າດ້ວຍນິຕິບັນຍັດສະບັບດັດແກ້.
 |
