ວັນທີ 8 ມີນານີ້, ຢູ່ທີ່ປັກກິ່ງ, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນກ່າວວ່າ, ການພົວພັນລະຫວ່າງຈີນ-ຣັດເຊຍບໍ່ໄດ້ຮັບຜົນກະທົບຈາກສະຖານະການສາກົນທີ່ມີຄວາມປັ່ນປ່ວນ, ແລະກໍ່ບໍ່ແນໃສ່ຝ່າຍທີສາມແຕ່ຢ່າງໃດ.
ທ່ານຫວາງຢີ້ກ່າວວ່າ, ເນື່ອງຈາກວ່າຈີນແລະຣັດເຊຍໄດ້ສ້າງຄວາມໄວ້ເນື້ອເຊື່ອໃຈກັນທາງດ້ານຍຸດທະສາດທີ່ມີຄວາມໝັ້ນຄົງ, ການພົວພັນລະຫວ່າງສອງປະເທດນັບມື້ນັບເພີ່ມທະວີຂຶ້ນແລະມີຄວາມໝັ້ນທ່ຽງ. ໃນຖານະເປັນຄູ່ຮ່ວມຍຸດທະສາດຮອບດ້ານ, ຢູ່ລະຫວ່າງຈີນ-ຣັດເຊຍມີມູນເຊື້ອທີ່ດີໃນການໃຫ້ການສະໜັບສະໜູນເຊິ່ງກັນແລະກັນ, ມິດຕະພາບລະຫວ່າງປະຊາຊົນຂອງສອງປະເທດກໍ່ໄດ້ຕອບສະໜອງພື້ນຖານຄວາມຕ້ອງການອັນໜັກແໜ້ນໃຫ້ແກ່ການເພີ່ມທະວີການຮ່ວມມືທາງດ້ານຍຸດທະສາດຂອງສອງປະເທດ.
ທ່ານຫວາງຢີ້ກ່າວຕື່ມວ່າ: ຈີນແລະຣັດເຊຍລ້ວນແຕ່ແມ່ນປະເທດສະມາຊິກຖາວອນຂອງສະພາຄວາມໝັ້ນຄົງສະຫະປະຊາຊາດ, ຈະສືບຕໍ່ເພີ່ມທະວີການປະສານງານແລະຮ່ວມມືທາງຍຸດທະສາດເພື່ອປົກປັກຮັກສາສັນຕິພາບແລະຄວາມໝັ້ນຄົງໃນສາກົນ.