ໃນໄລຍະໄຂກອງປະຊຸມສອງສະພາປີ 2015, ທ່ານຫຼີເຄີ້ສຽງ, ນາຍົກ ລັດຖະມົນຕີຈີນໄດ້ສະເໜີໃນບົດລາຍງານວຽກງານຂອງລັດຖະບານວ່າ: ຈະສ້າງອົງປະກອບໄຂປະຕູສູ່ໂລກພາຍນອກແບບທົ່ວທຸກທິດ, ໃນນັ້ນ, ແຜນການສ້າງສາ "ແລວທາງເສດຖະກິດບັງກາລາເດັດ-ຈີນ-ອິນເດຍ-ມຽນມາ" ທີ່ເຊື່ອມຕໍ່ຕະຫຼາດແລະຊັບພະຍາກອນຂອງອາຊີຕາເວັນອອກ, ອາຊີຕາເວັນອອກສຽງໃຕ້ ອາຊີໃຕ້ນັ້ນ ໄດ້ຮັບຄວາມສົນໃຈຈາກຄົນທັງຫຼາຍເປັນພິເສດ.
ທ່ານໂລຮົງຈ່ຽງ, ເຈົ້າຄອງກິ່ງແຂວງປົກຄອງຕົນເອງເຜົ່າລື້ສິບສອງພັ່ນນາແຂວງຢູນນານ, ທັງເປັນຜູ້ແທນສະພາປະຊາຊົນທີ່ມາຈາກແຂວງຢູນນານກ່າວວ່າ, ປັດຈຸບັນ, ຈີນກັບລາວ, ມຽນມາ ແລະໄທໄດ້ສ້າງແລະໄດ້ບູລະນະກົນໄກ "4 ປະເທດ 8 ຝ່າຍ" ໃຫ້ສົມບູນຂຶ້ນເປັນກ້າວໆມາ, ແລະໄດ້ຮ່ວມແຮງກັນເພື່ອສ້າງວົງການທ່ອງທ່ຽວ 4 ຫຼ່ຽມຄຳ ແລະວົງການຄ້າ 4 ຫຼ່ຽມຄຳ. ພາຍໃຕ້ກົນໄກດັ່ງກ່າວ, 4 ຝ່າຍໄດ້ຕົກລົງໄຂກອງປະຊຸມຢ່າງເປັນປະຈຳ, ເພື່ອປຶກຫາລາລືວິທີແກ້ໄຂບັນຫາທີ່ໄດ້ພົບໃນການຮ່ວມມືແລະການແລກປ່ຽນກັນ.
ໃນກອງປະຊຸມສອງສະພາຄັ້ງນີ້, ທ່ານໂລຮົງຈ່ຽງໄດ້ມີຂໍ້ສະເໜີໃຫ້ເພີ່ມທະວີການສ້າງພື້ນຖານໂຄງລ່າງໂດຍປິ່ນອ້ອມການເຊື່ອມຈອດກັນ. ທ່ານຫວັງວ່າ, ທາງລົດໄຟຜ່ານອາຊີຕອນກາງຈະສາມາດເລີ່ມລົງມືສ້າງພາຍໃນປີນີ້ໄດ້, ເຮັດໃຫ້ກິ່ງແຂວງສິບສອງພັ່ນນາສາມາດເສີມຂະຫຍາຍທ່າແຮງທີ່ມີດ່ານລະດັບຊາດທາງບົກ, ທາງນ້ຳແລະທາງອາກາດນັ້ນໄດ້ຢ່າງຮອບດ້ານ.
ເຂົ້າຮ່ວມກົນໄກ 4 ປະເທດ 8 ຝ່າຍມີ: ກິ່ງແຂວງປົກຄອງຕົນເອງສິບສອງພັ່ນນາຂອງຈີນ, ແຂວງຫຼວງນ້ຳທາ, ແຂວງບໍ່ແກ້ວ, ແຂວງຫຼວງພະບາງ ແລະແຂວງອຸດົມໄຊຂອງ ສປປ ລາວ, ຈັງຫວັດຊຽງລາຍ, ຊຽງໃໝ່ຂອງປະເທດໄທ ແລະທຳຂີ້ເລັກຂອງມຽນມາ.