ໃນເວລາຄົ້ນຄວ້າພິຈາລະນາຂອງຄະນະຜູ້ແທນແຂວງຈ່ຽງຊູ່ໃນກອງປະຊຸມສະພາປະຊາຊົນແຫ່ງຊາດຈີນຄັ້ງທີ 3 ຊຸດທີ 12 ທີ່ຈັດຂຶ້ນໃນຕອນບ່າຍຂອງວັນທີ 5 ມີນານີ້, ນັກທຸລະກິດສ່ວນຫຼາຍທີ່ເປັນຜູ້ແທນສະພາ ໄດ້ມີຄວາມໝັ້ນໃຈຢ່າງເຕັມປ່ຽມ, ເພາະວ່າ, ວິສາຫະກິດຂອງພວກເພິ່ນລ້ວນແຕ່ຢູ່ໃນການປ່ຽນຮູບການແລະຍົກລະດັບເຕັກນິກ. ພວກເພິ່ນເວົ້າວ່າ, ການຍົກລະດັບຂອງເຕັກນິກ ແມ່ນທາງອອກທີ່ດີທີ່ສຸດສຳລັບວິສາຫະກິດຈີນພາຍໃຕ້ສະພາບປົກກະຕິອັນໃໝ່, ເມື່ອປ່ຽນຮູບການໄດ້ໄວແລະດີແລ້ວ, ວິສາຫະກິດກໍຈະປະສົບກັບໄລຍະພັດທະນາຢ່າງວ່ອງໄວຄັ້ງທີສອງ. ປີກາຍນີ້, ເສດຖະກິດຂອງແຂວງຈ່ຽງຊູ່ໄດ້ມີການເຕີບໂຕອ່າວໄວ, ຄືມີຈັງຫວະຂະຫຍາຍຕົວ 8,7%, ການປະດິດສ້າງ ແມ່ນ "ວິທີ" ຂອງການບັນລຸໝາກຜົນດັ່ງກ່າວ.
ທ່ານຟ້ານຈ້ຽນພິງ, ນາຍຊ່າງເສດຖະກິດໃຫຍ່ຂອງສູນຂໍ້ມູນຂ່າວສານແຫ່ງຊາດຈີນເຫັນວ່າ, ຢູ່ຫຼາຍທ້ອງຖິ່ນຂອງຈີນ ລ້ວນແຕ່ໄດ້ເຮັດຄືແຂວງຈ່ຽງຊູ່, ຄືໄດ້ຫັນຈາກຮູບການເຕີບໂຕທີ່ຊຸກຍູ້ດ້ວຍປັດໄຈການຜະລິດນັ້ນ ຫັນເປັນການເຕີບໂຕທີ່ຊຸກຍູ້ດ້ວຍຫົວຄິດປະດິດສ້າງ, ທັງນີ້ກໍແມ່ນຊ່ອງທາງພື້ນຖານຂອງການບັນລຸ "ສອງເປົ້າໝາຍ" ຄື "ຮັກສາການເຕີບໂຕຂອງເສດຖະກິດດ້ວຍຈັງຫວະລະດັບກາງແລະລະດັບສູງ ແລະ ອົງປະກອບເສດຖະກິດໂດຍລວມກ້າວເຂົ້າສູ່ລະດັບກາງແລະລະດັບສູງ" ທີ່ຂຽນໄວ້ຢູ່ໃນບົດລາຍງານວຽກງານຂອງລັດຖະບານຈີນ.
ບໍ່ພຽງແຕ່ວິສາຫະກິດເທົ່ານັ້ນທີ່ກຳລັງພະຍາຍາມຢູ່, ລັດຖະບານ ກໍພວມດຳເນີນ "ການປະຕິວັດຕໍ່ຕົນເອງ" ເຊິ່ງຈະເປັນການປົກປ້ອງການປ່ຽນຮູບການເຕີບໂຕແລະການຍົກລະດັບຂອງເສດຖະກິດຈີນ. ໃນເວລາຂຶ້ນຜ່ານບົດລາຍງານວຽກງານຂອງລັດຖະບານ, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ກ່າວວ່າ, ອົງການປົກຄອງທຸກຂັ້ນ ລ້ວນແຕ່ຕ້ອງສ້າງກົນໄກຊຸກຍູ້ທີ່ແຂງແຮງທີ່ເຮັດໃຫ້ການດຳເນີນການບໍລິຫານການປົກຄອງນັ້ນ ກະທັດຮັດງ່າຍຂຶ້ນ, ປ່ອຍສິດໃຫ້ແກ່ຂັ້ນລຸ່ມ ແລະປ່ຽນແປງພາລະໜ້າທີ່, ຜ່ອນຄາຍຄວາມຜູກມັດໃຫ້ແກ່ວິສາຫະກິດ, ອຳນວຍຄວາມສະດວກໃຫ້ແກ່ການປະກອບທຸລະກິດ, ແລະສ້າງສະພາບແວດລ້ອມແຫ່ງການແຂ່ງຂັນກັນທີ່ຍຸດຕິທຳ.
ຜູ້ແທນປະຊາຊົນແລະກຳມະການທັງຫຼາຍທີ່ເຂົ້າຮ່ວມກອງປະຊຸມສອງສະພາ ລ້ວນແຕ່ເຫັນວ່າ, ເມື່ອມີການໃຊ້ງົບປະມານເຂົ້າໃນການປະດິດສ້າງໃໝ່ຢ່າງບໍ່ຢຸດຢັ້ງ, ເມື່ອການບໍລິຫານການເມືອງຂອງລັດຖະບານກາງແລະອົງການປົກຄອງທ້ອງຖິ່ນກະທັດຮັດງ່າຍຂຶ້ນ ແລະປ່ອຍສິດໃຫ້ຂັ້ນລຸ່ມແລ້ວ, ເສດຖະກິດທີ່ຢູ່ພາຍໃຕ້ສະພາບປົກກະຕິອັນໃໝ່ ບໍ່ພຽງແຕ່ຈະໄດ້ຮັບໝາກຜົນເທົ່ານັ້ນ, ແຕ່ໝາກຜົນນີ້ກໍຍັງຈະໃຫຍ່ສົມຄວນນຳອີກ.