ຕາມແຜນງົບປະມານການທະຫານປີ 2015 ທີ່ກະຊວງການເງິນຈີນເປີດເຜີຍ ໃນຫວ່າງມໍ່ໆມານີ້ສະແດງໃຫ້ເຫັນວ່າ: ງົບປະມານດ້ານ ການປ້ອງກັນປະເທດຂັ້ນສູນກາງຂອງຈີນໄດ້ບັນລຸເຖິງ 886 ຕື້ 898 ລ້ານຢວນ, ເພີ່ມຂຶ້ນ 10,1%, ແຕ່ຈັງຫວະການເຕີບໂຕພັດໄດ້ຫຼຸດລົງ. ໃນເວລາໃຫ້ສຳພາດຕໍ່ນັກຂ່າວ, ຜູ້ຊ່ຽວຊານຕ່າງປະເທດຫຼາຍຄົນໃຫ້ຮູ້ວ່າ: ໂດຍພິຈາລະນາເຖິງປັດໄຈໃນຫຼາຍດ້ານ, ງົບປະມານການທະຫານຂອງຈິນເພີ່ມຂຶ້ນແມ່ນເລື່ອງທີ່ສົມເຫດສົມຜົນ.
ທ່ານວາສິລິ ກາສິນ, ຜູ້ຊ່ຽວຊານຈາກສູນວິເຄາະແລະຍຸດທະສາດດ້ານເຕັກນິກຂອງຣັດເຊຍໃຫ້ຮູ້ວ່າ: ຈັງຫວະການເຕີບໂຕຂອງງົບປະມານການທະຫານຂອງຈິນແມ່ນແທດເໝາະກັບຈັງຫວະການເຕີບໂຕດ້ານເສດຖະກິດຂອງຈີນ. ທ່ານເຫັນວ່າ: ຈີນພວມດຳເນີນການປະຕິຮູບຂະໜາດໃຫຍ່ໃນດ້ານການທະຫານແລະອື່ນໆ, ດ້ວຍເຫດນີ້, ຕ້ອງເພີ່ມງົບປະມານໃນການສຶກສາດ້ານການທະຫານ, ການປັບປຸງຊີວິດການເປັນຢູ່ຂອງທະຫານໃຫ້ດີຂຶ້ນ, ການຍົກຄວາມດຶງດູດໃຈທີ່ເຂົ້າເປັນທະຫານຂອງປະຊາຊົນໃຫ້ສູງຂຶ້ນແລະໃນດ້ານອື່ນໆ.
ທ່ານຫຼີເຢີນຫຼຽງ, ສາສະດາຈານຂອງສະຖາບັນພັດທະນາແລະບໍລິຫານແຫ່ງຊາດໄທກ່າວວວ່າ: ງົບປະມານການທະຫານຂອງຈິນມີການເພີ່ມຂຶ້ນແລະອັດຕາສ່ວນງົບປະມານການທະຫານໃນຍອດຜະລິດຕະພັນພາຍໃນຂອງຈີນແມ່ນສອດຄອງກັບຄວາມຕ້ອງການການພັດທະນາແລະຖານະທີ່ເປັນປະເທດໃຫຍ່ຂອງຈີນ, ແມ່ນສົມເຫດສົມຜົນທີ່ສຸດ. ບໍ່ວ່າເບິ່ງຈາກຄວາມເປັນຈິງໃນປະຫວັດສາດ, ຫຼືວ່າເບິ່ງຈາກນະໂຍ ບາຍຕ່າງປະເທດແລະພຶດຕິກຳຕົວຈິງຂອງຈີນ, ຈີນລ້ວນແຕ່ແມ່ນຖືການຢູ່ຮ່ວມກັນໂດຍສັນຕິເປັນສຳຄັນ. ໃນນະໂຍບາຍຕ່າງປະເທດຕໍ່ປະເທດໃກ້ຄຽງ, ຈີນໄດ້ລີເລີ່ມແລະປະຕິບັດ "ມີມິດຕະພາບຕໍ່ກັນ, ຈິງໃຈຕໍ່ກັນ, ຕ່າງຝ່າຍຕ່າງມີຜົນປະໂຫຍດແລະມີຄວາມໂອບເອື້ອອາລີຕໍ່ກັນ"ຢ່າງຈະແຈ້ງ.