ຕາມເວັບໄຊໜັງສືພິມລຽນເຮີຈາວປ້າວຂອງສິງກະໂປລາຍງານໃນວັນທີ 10 ມີນານີ້ວ່າ: ພາຍໃຕ້ເປົ້າໝາຍທີ່ຊຸກຍູ້ການປົກຄອງປະເທດຕາມກົດໝາຍຢ່າງຮອບດ້ານ, ຄະນະປະຈຳສະພາປະຊາຊົນແຫ່ງຊາດຈີນຈະສ້າງແລະປັບປຸງກົດໝາຍຫຼາຍສະບັບເຊັ່ນ: ກົດໝາຍວ່າດ້ວຍຫຼັກຊັບ, ກົດໝາຍວ່າດ້ວຍການເລືອກຕັ້ງ, ກົດໝາຍວ່າດ້ວຍການຕ້ານລັດທິກໍ່ການຮ້າຍ, ກົດໝາຍວ່າດ້ວຍຄວາມປອດໄພທາງອິນເຕີເນັດແລະກົດໝາຍອື່ນໆອີກ.
ຕາມຂ່າວແຈ້ງວ່າ: ວຽກງານສ້າງແລະປັບປຸງກົດໝາຍກ່ຽວພັນເຖິງ 5 ຂົງເຂດທີ່ສຳຄັນ, ຄືບູລະນະລະບຽບກົດໝາຍທາງດ້ານເສດຖະກິດຕະຫຼາດຂອງສັງຄົມນິຍົມໃຫ້ສົມບູນຂຶ້ນ, ເຮັດໃຫ້ການນິຕິບັນຍັດດ້ານການເມືອງ ປະຊາທິປະໄຕໄດ້ຮັບການປັບປຸງໃຫ້ບໍລິບູນ, ຊຸກຍູ້ການສ້າງກົດໝາຍໃນຂົງເຂດທາງສັງຄົມ, ເພີ່ມທະວີການສ້າງກົດໝາຍໃນຂົງເຂດວັດທະນະທຳ, ການສຶກສາ ແລະ ຊີວະພາບ ແລະ ຊຸກຍູ້ກົດໝາຍວ່າດ້ວຍຄວາມໝັ້ນຄົງຂອງປະເທດ.
ຂ່າວແຈ້ງອີກວ່າ, ກົດໝາຍວ່າດ້ວຍນິຕິບັນຍັດທີ່ປະຕິບັດມາເປັນເວລາ 15 ປີຈະໄດ້ຮັບການປັບປຸງເປັນຄັ້ງທຳອິດນັ້ນໄດ້ປະຈັກສາຍຕາຂອງຄົນຈຳນວນຫຼາຍ. ກອງປະຊຸມສະພາປະຊາຊົນແຫ່ງຊາດຈີນໃນຄັ້ງນີ້ພວມດຳເນີນການພິຈາລະນາຄັ້ງທີ 3 ຕໍ່ຮ່າງກົດໝາຍ, ແລະຈະດຳເນີນການລົງຄະແນນສຽງໃນວັນທີ 15 ມີນານີ້. ຖ້າໄດ້ຮັບການຮັບຮອງ, ແຕ່ນີ້ເປັນຕົ້ນໄປ, ອົງການປົກຄອງທ້ອງຖິ່ນຈະບໍ່ສາມາດເກັບອາກອນເພີ່ມຫຼືກຳນົດເພີ່ມອາກອນຊະນິດໃໝ່ຕໍ່ປະຊາຊົນໂດຍຜ່ານຄຳສັ່ງດ້ານການບໍລິຫານ.