ຊ່ຽວຊານແລະນັກວິຊາການຈໍານວນໜຶ່ງຂອງປະເທດອາຊຽນໄດ້ສະແດງຄວາມຍ້ອງຍໍຊົມເຊີຍຕໍ່ຈີນຊຸກຍູ້ການກໍ່ສ້າງ"ແລວທາງເສດຖະກິດເສັ້ນທາງສາຍໄໝ ແລະເສັ້ນທາງສາຍໄໝທາງທະເລຂອງສະຕະວັດທີ 21"ຫຼື"ໜຶ່ງແລວທາງໜຶ່ງເສັ້ນທາງ", ຫວັງຢາກລົງເລິກການຮ່ວມມືກັບຈີນ ເພື່ອບັນລຸການພັດທະນາແລະຄວາມຈະເລີນຮ່ວມກັນ.
ທ່ານສຽນເຟີ່ງ, ຮອງຜູ້ອໍານວຍການໃຫຍ່ ທັງເປັນຜູ້ຂຽນບົດປະຈໍາຂອງໜັງສືພິມ Asia News Time ຂອງໄທກ່າວວ່າ, "ໜຶ່ງແລວທາງໜຶ່ງເສັ້ນທາງ"ຂອງຈີນແມ່ນແຜນການແບບຕ່າງຝ່າຍຕ່າງມີຜົນປະໂຫຍດທີ່ຊ່ວຍຊູຍູ້ໜູນກັນ, ຮ່ວມມືກັນ ແລະພັດທະນາຮ່ວມກັນ, ຫວັງຢາກໃຫ້ຈີນວາງແຜນການແລະມາດຕະການທີ່ປະຕິບັດໄດ້.
ທ່ານ Johannes, ຊ່ຽວຊານບັນຫາສາກົນຂອງມະຫາວິມະຍາໄລ Binus ຂອງອິນໂດເນເຊຍກ່າວວ່າ, ຈີນຈະຊຸກຍູ້ການກໍ່ສ້າງພື້ນຖານໂຄງລ່າງດ້ານການເຊື່ອມຈອດກັນຢູ່ພາກພື້ນນີ້ ແລະກໍ່ສ້າງຈຸດຄໍ້າຂອງການຮ່ວມມືທາງທະເລ ໂດຍຜ່ານເສັ້ນທາງສາຍໄໝທາງທະເລຂອງສະຕະວັດທີ 21, ອິນໂດເນເຊຍຫວັງວ່າຈະສາມາດເຂົ້າຮ່ວມຂອບການຮ່ວມມືດັ່ງກ່າວຂອງຈີນຢ່າງຕັ້ງໜ້າ ເພື່ອໄດ້ຮັບການພັດທະນາ.
ທ່ານ Win Tin, ຫົວໜ້າບັນນາທິການໜັງສືພິມ Union Daily ເຊິ່ງເປັນໜັງສືພິມຂອງພັກກໍາອໍານາດຂອງມຽນມາກ່າວວ່າ, ສໍາລັບປະເທດຈີນ, ການສ້າງສາຍພົວພັນທາງການທູດກັບປະເທດໃກ້ຄຽງໃຫ້ດີນັ້ນ ຄວນເປັນວຽກງານທີ່ສໍາຄັນທີ່ສຸດ. ຍາກທີ່ຈະຫຼີກລ້ຽງບາງບັນຫາໄດ້ລະຫວ່າງປະເທດບ້ານໃກ້ເຮືອນຄຽງ. ແຕ່ຂໍພຽງແຕ່ແກ້ໄຂດ້ວຍຫຼັກການ 5 ປະການຢູ່ຮ່ວມກັນໂດຍສັນຕິ, ບັນຫາເຫຼົ່ານີ້ຈະສາມາດແກ້ໄຂໄດ້ດີ.