ໃນການຈັດວາງຍຸດທະສາດ "4 ຮອບດ້ານ" ທີ່ທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນສະເໜີອອກມາ, "ການປົກຄອງພັກຢ່າງເຂັ້ມງວດຮອບດ້ານ" ເປັນການຍົກລະດັບໃໝ່ຂອງການຕ້ານການສໍ້ລາດບັງຫຼວງຢ່າງເດັດຂາດ, ເຊິ່ງໄດ້ເຮັດໃຫ້ສື່ມວນຊົນຕ່າງປະເທດມີຄວາມສົນໃຈໃນລະດັບສູງ.
ໜັງສືພິມ "ຮູຟິງຕັນພົສ" ຂອງອາເມລິກາສະບັບວັນທີ 2 ມີນານີ້ລາຍງານວ່າ: ໃນຍຸດທະສາດ "4 ຮອບດ້ານ", "ການປົກຄອງພັກຢ່າງເຂັ້ມງວດຮອບດ້ານ" ແມ່ນມີຫົວຄິດປະດິດສ້າງຫຼາຍທີ່ສຸດ. ກ່ອນໜ້ານີ້, ມາດຕະການຂອງລັດຖະບານຈີນລ້ວນແຕ່ບໍ່ມີເນື້ອໃນກ່ຽວກັບການປົກຄອງພັກ, "ການປົກຄອງຢ່າງເຂັ້ມງວດ" ແມ່ນການປະຕິຮູບລະດັບຊາດຢ່າງກ້າຫານ.
ໜັງສືພິມ "ໂລກສະຕະວັດທີ 21" ຫຼື El Mundo del Siglo Veintiuno ຂອງແອສ ປາຍສະບັບວັນທີ 6 ມີນານີ້ໄດ້ພິມບົດຄວາມ, ໂດຍຊີ້ອອກວ່າ, ທ່ານເລຂາທິການໃຫຍ່ສີຈິ້ນຜິງໄດ້ຈັດເອົາ "ການປົກຄອງພັກຢ່າງເຂັ້ມງວດຮອບດ້ານ" ເຂົ້າໃນແນວຄິດຍຸດທະສາດ "4 ຮອບດ້ານ", ເຊິ່ງໄດ້ສະແດງໃຫ້ເຫັນເຖິງຄວາມຕັດສິນໃຈຂອງພັກກອມມູນິດຈີນໃນການຕໍ່ສູ້ຕ້ານການສໍ້ລາດບັງຫຼວງ.
ນອກຈາກສື່ມວນຊົນຂອງຕ່າງປະເທດແລ້ວ, ຜູ້ຊ່ຽວຊານແລະນັກວິຊາການຂອງຕ່າງປະເທດຈຳນວນໜຶ່ງ ກໍໄດ້ຢືນຢັນໃນລະດັບສູງຕໍ່ລັດຖະບານຈີນທີ່ຊຸກຍູ້ການສ້າງແບບແຜນຂອງພັກທີ່ປອດໃສຂາວສະອາດແລະຕ້ານການສໍ້ລາດບັງຫຼວງຢ່າງເຂັ້ມງວດ.
ທ່ານອັນເດຣີ ກີຣີລົຟ, ຫົວໜ້ານັກຂ່າວຂອງຂ່າວສານຕັສຂອງຣັດເຊຍປະຈຳຈີນໄດ້ກ່າວເປັນພິເສດວ່າ: "ຂໍ້ໜຶ່ງທີ່ມີຄວາມໝາຍສຳລັບຣັດເຊຍມາຖອດຖອນນັ້ນແມ່ນ: ການຕ້ານການສໍ້ລາດບັງຫຼວງຄວນເຂົ້າສູ່ລວງເລິກ, ຕໍ່ເນື່ອງ, ແລະມີປະສິດທິພາບສູງ, ການກະທຳຂອງຈີນໃນການແກ້ໄຂບັນຫາທີ່ຄ້າຍຄືກັນ ກໍຈະສົ່ງຜົນສະທ້ອນເຖິງຣັດເຊຍ, ຣັດເຊຍນັບມື້ນັບຖືສຳຄັນບົດຮຽນຂອງຈີນ."
ໃນເວລາໃຫ້ສຳພາດຕໍ່ນັກຂ່າວ, ທ່ານຟາຈານ ຣາຣ໌ມານ, ຫົວໜ້າສະມາຄົມຈີນ-ປາກີສະຖານຂອງປາກີສະຖານ, ຜູ້ຊ່ຽວຊານດ້ານປະເທດຈີນໄດ້ກ່າວວ່າ, ບັນຫາສໍ້ລາດບັງຫຼວງແມ່ນ "ບັນຫາໜັກແລະແກ້ຍາກ" ຂອງສັງຄົມປະເທດຕ່າງໆໃນໂລກມາໂດຍຕະຫຼອດ, ມາດຕະການຂອງລັດຖະບານຈີນໃນການຕ້ານການສໍ້ລາດບັງຫຼວງທີ່ລົງເລິກ, ຕໍ່ເນື່ອງ ແລະມີປະສິດທິພາບສູງນັ້ນ ບໍ່ພຽງແຕ່ໄດ້ຊຸກຍູ້ການພັດທະນາຢ່າງກົມກຽວກັນຂອງສັງຄົມຈີນເທົ່ານັ້ນ, ແຕ່ຍັງໄດ້ຮັບການຕອບຮັບຢ່າງອົບອຸ່ນຈາກປະຊາຊົນ, ແລະໄດ້ຮັບໝາກຜົນອັນຍິ່ງໃຫຍ່ນຳອີກ.