ກອງປະຊຸມຄັ້ງທີ 3 ຂອງສະພາປະຊາຊົນແຫ່ງຊາດຈີນຊຸດທີ 12 ໄດ້ຈັດກອງປະຊຸມຄົບຄະນະໃນວັນທີ 12 ມີນານີ້. ທ່ານໂຈ່ວຊຽງ, ປະທານສານປະຊາຊົນສູງສຸດຈີນ, ທ່ານເສົາຈ້ຽນມິງ, ຫົວໜ້າອົງການໄອຍະການປະຊາຊົນສູງສຸດຈີນຕ່າງໄດ້ຂຶ້ນລາຍງານວຽກງານ. ປີນີ້, ບົດລາຍງານຂອງສອງອົງການຕຸລາການສູງສຸດລ້ວນແຕ່ໄດ້ກ່າວເຖິງການຕິດຕາມຈັບກຸມຜູ້ກະທຳຜິດດ້ານການສໍ້ລາດບັງຫຼວງແລ້ວໂຕນໜີໄປຕ່າງປະເທດ, ພ້ອມການທວງຄືນຊັບສິນທີ່ພວກເຂົານຳໄປຕ່າງປະເທດໂດຍໃຊ້ຖ້ອຍຄຳແບບເຄັ່ງຄັດແລະມີທ່າທີທີ່ເດັດດ່ຽວ.
ໃນເວລາລາຍງານວຽກງານຂອງສານປະຊາຊົນສູງສຸດ, ທ່ານໂຈ່ວຊຽງຊີ້ອອກວ່າ, ສານໄດ້ຕັ້ງໜ້າເຂົ້າຮ່ວມວຽກງານຕິດຕາມຈັບກຸມຜູ້ກະທຳຜິດດ້ານການສໍ້ລາດບັງຫຼວງແລ້ວໂຕນໜີໄປຢູ່ຕ່າງປະເທດພ້ອມທັງທວງເອົາຄືນຊັບສິນທີ່ພວກເຂົານຳໄປຕ່າງປະເທດ, ຈະບໍ່ໃຫ້ຕ່າງປະເທດກາຍເປັນ "ແດນສະຫວັນລີ້ໄພ"ຂອງພວກສໍ້ລາດບັງຫຼວງຢ່າງເດັດຂາດ. ປີນີ້ຈະປັບປຸງລະບຽບການດຳເນີນຄະດີສຳລັບຜູ້ກະທຳຜິດດ້ານການສໍ້ລາດບັງຫຼວງທີ່ໂຕນໜີໄປຕ່າງປະເທດຕາມກົດໝາຍໃຫ້ສົມບູນຂຶ້ນ, ບໍ່ວ່າເຂົາເຈົ້າໂຕນໜີໄປຮອດໄສ, ລ້ວນແຕ່ຈະຕ້ອງນຳໂຕຜູ້ກະທຳຜິດມາລົງໂທດຕາມກົດໝາຍຢ່າງເດັດຂາດ.
ໃນເວລາລາຍງານວຽກງານຂອງໄອຍະການປະຊາຊົນສູງສຸດ, ທ່ານເສົາຈ້ຽນມິງຊີ້ອອກວ່າ, ປີກາຍນີ້, ອົງການໄອຍະການໄດ້ດຳເນີນການເຄື່ອນໄຫວສະເພາະກິດໃນການຕິດຕາມຈັບກຸມຜູ້ກະທຳຜິດດ້ານການສໍ້ລາດບັງຫຼວງແລ້ວໂຕນໜີໄປຕ່າງປະເທດທັງທວງເອົາຄືນຊັບສິນທີ່ພວກເຂົານຳໄປຕ່າງປະເທດ. ໄດ້ຮ່ວມກັບພາກສ່ວນທີ່ກ່ຽວຂ້ອງປະກາດແຈ້ງການເພື່ອເຕືອນໃຫ້ຜູ້ກະທຳຜິດທາງດ້ານເສດຖະກິດທີ່ໂຕນໜີໄປຕ່າງປະເທດໃຫ້ມາມອບຕົວ, ທັງເພີ່ມທະວີການຮ່ວມມືດ້ານຕຸລາການກັບຕ່າງປະເທດ. ກ່ຽວກັບວຽກງານໃນປີນີ້, ທ່ານເສົາຈ້ຽນມິງກ່າວເນັ້ນວ່າ, ຈະຕັ້ງໜ້າຊຸກຍູ້ວຽກງານຕິດຕາມຈັບກຸມຜູ້ກະທຳຜິດດ້ານການສໍ້ລາດບັງຫຼວງແລ້ວໂຕນໜີໄປຢູ່ຕ່າງປະເທດ, ທັງທວງເອົາຄືນຊັບສິນທີ່ພວກເຂົານຳໄປຕ່າງປະເທດ. ເດັດຂາດບໍ່ໃຫ້ພວກສໍ້ລາດບັງຫຼວງຢູ່ຢ່າງອິດສະຫຼະແລະບໍ່ໄດ້ຖືກລົງໂທດຕາມກົດໝາຍ.
 |
