ວັນທີ 11 ມີນານີ້, ຢູ່ຫ້ອງປະຊຸມຂອງໂຮງແຮມເໝີຍຕີ້ຢ້າ, ສູນຖະແຫຼງຂ່າວຂອງກອງປະຊຸມຄັ້ງທີ 3 ຂອງສະພາຜູ້ແທນປະຊາຊົນແຫ່ງຊາດຈີນສະໄໝທີ 12 ໄດ້ຈັດງານຖະແຫຼງຂ່າວ ໂດຍໄດ້ເຊື້ອເຊີນທ່ານວ້ານກ່າງ, ລັດຖະມົນຕີວ່າການກະຊວງວິທະຍາສາດເຕັກໂນໂລຊີຈີນຕອບຄໍາຖາມຈາກນັກຂ່າວທັງພາຍໃນແລະຕ່າງປະເທດກ່ຽວກັບການປະຕິຮູບແລະການພັດທະນາດ້ານວິທະຍາສາດເຕັກໂນໂລຊີ.
ຕໍ່ກັບບັນຫາກ່ຽວກັບການຮ່ວມມືສາກົນດ້ານວິທະຍາສາດເຕັກໂນໂລຊີ, ທ່ານວ້ານກ່າງກ່າວວ່າ, ການຮ່ວມມືສາກົນດ້ານວິທະຍາສາດເຕັກໂນໂລຊີເປັນປັດໄຈທີ່ສໍາຄັນຂອງຈີນໃນດ້ານການປະຕິຮູບແລະການເປີດປະຕູສູ່ພາຍນອກຂອງລະບົບວິທະຍາສາດເຕັກໂນໂລຊີ ແລະເຮັດໃຫ້ການປະດິດສ້າງໃໝ່ຊຸກຍູ້ການພັດທະນາ. ປັດຈຸບັນ, ຈີນໄດ້ສ້າງການພົວພັນຮ່ວມມືດ້ານວິທະຍາສາດເຕັກໂນໂລຊີກັບ 150 ກວ່າປະເທດແລະເຂດແຄວ້ນ. ໃນປີກາຍນີ້, ຢູ່ໃນສະຖານທີ່ຈັດກອງປະຊຸມປະດິດສ້າງໃໝ່ຣັດເຊຍ ໄດ້ຕັ້ງຫໍວາງສະແດງຂອງຈີນ ເຊິ່ງບໍ່ພຽງແຕ່ໄດ້ວາງສະແດງເຕັກໂນໂລຊີສູງແລະໃໝ່ທີ່ສໍາຄັນຂອງຈີນ ເຊັ່ນລົດໄຟຄວາມໄວສູງ, ພະລັງງານນິວເຄລຍ ແລະອື່ນໆ, ແຕ່ຍັງໄດ້ວາງສະແດງຜະລິດຕະພັນນ້ອຍແບບມີການປະດິດສ້າງໃໝ່ອີກດ້ວຍ ເຊັ່ນຍົນແບບບໍ່ມີຄົນຂັບ, ເຮືອແບບບໍ່ມີຄົນຂັບ ແລະອື່ນໆ, ນອກນີ້, ຍັງມີການວາງສະແດງເຕັກໂນໂລຊີທີ່ສໍາຄັນຈໍານວນໜຶ່ງອີກດ້ວຍ.