ທ່ານຫຼີ້ເຄີ້ສຽງ, ນາຍົກລັດຖະມົນຕີຈີນກ່າວໃນວັນທີ15ມີນານີ້ຢູ່ທີ່ປັກກິ່ງວ່າ, ບໍ່ປະຕິເສດວ່າ, ເສດຖະກິດຈີນມີແຮງກົດດັນທີ່ຈັງຫວະເຕີບໂຕຊ້າລົງ, ປະສົບກັບຄວາມສ່ຽງໃນຫຼາຍດ້ານ, ແຕ່ເຊື່ອໝັ້ນວ່າ, ທຸກຄົນຮ່ວມຈິດຮ່ວມໃຈກັນ, ກໍມີຄວາມສາມາດຮັກສາໃຫ້ດ້ານກວມລວມຂອງເສດຖະກິດຈີນມີທ່າອຽງຂະຫຍາຍຕົວເປັນຢ່າງດີ
ພາຍຫຼັງກອງປະຊຸມຄັ້ງທີ3ຂອງສະພາຜູ້ແທນປະຊາຊົນຈີນຊຸດທີ12ສິ້ນສຸດລົງ, ທ່ານຫຼີ້ເຄີ້ສຽງໄດ້ໃຫ້ສໍາພາດຕໍ່ນັກຂ່າວຈີນແລະຕ່າງປະເທດ. ໃນເວລາຕອບຄໍາຖາມກ່ຽວກັບສະພາບທົ່ວໄປອັນໃໝ່ຂອງເສດຖະກິດຈີນ, ທ່ານໄດ້ມີຄວາມເວົ້າດັ່ງກ່າວ.
ທ່ານຫຼີ້ເຄີ້ສຽງກ່າວວ່າ, ເສດຖະກິດຈີນໄດ້ກ້າວເຂົ້າສູ່ສະພາບທົ່ວໄປອັນໃໝ່, ຄາດໝາຍຈັງຫວະເຕີບໂຕຂອງເສດຖະກິດຈີນໃນປີ2015ນີ້ໄດ້ປັບປຸງໃຫ້ເປັນປະມານ7%. ເບິ່ງຄືຈັງຫວະເຕີບໂຕໄດ້ຊ້າລົງ, ແຕ່ວ່າບັນລຸເປົ້າໝາຍນີ້ ບໍ່ແມ່ນງ່າຍ, ຍ້ອນວ່າຍອດປະລິມານເສດຖະກິດຂອງຈີນໄດ້ເພີ່ມຂຶ້ນແລ້ວ, ມີຫຼາຍກວ່າ10ພັນຕື້ໂດລາ. ຖ້າວ່າເພີ່ມຂຶ້ນ7%, ປະລິມານເຕີບໂຕກໍ່ທໍ່ກັບຂະໜາດເສດຖະກິດຂອງປະເທດລະດັບຜ້ານກາງປະເທດໜຶ່ງໃນແຕ່ລະປີ.
;ທ່ານຫຼີ້ເຄີ້ສຽງຊີ້ອອກວ່າ, ໃນຂະບວນການຂະຫຍາຍຕົວ, ຖ້າຫາກວ່າພວກເຮົາໄດ້ເອົາໃຈໃສ່ຄຸນນະພາບແລະປະສິດທິພາບ, ຊຸກຍູ້ໃຫ້ເສດຖະກິດຈີນມີຄຸນນະພາບສູງຂຶ້ນຈາກລະດັບປານຕໍ່າແລະກາງຂຶ້ນເປັນລະດັບປານກາງແລະສູງ, ກໍສາມາດເຮັດໃຫ້ເສດຖະກິດຈີນມີຈັງຫວະເຕີບໂຕທີ່ຂ້ອນຂ້າງສູງໃນໄລຍະຍາວ. ການສ້າງສາເປັນແບບທັນສະໄໝກໍ່ມີພື້ນຖານອັນໜັກແໜ້ນ, ນີ້ກໍ່ແມ່ນປະກອບສ່ວນອັນໃຫຍ່ຫຼວງຕໍ່ໂລກເຊັ່ນກັນ.
