ວັນທີ 17 ມີນານີ້, ໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງຂອງຈີນ, ທ່ານໂຈ່ວເວີນຈົ້ງ, ເລຂາທິການໃຫຍ່ຂອງກອງປະຊຸມເວທີປຶກສາຫາລືອາຊີໂປອາວໄດ້ແຈ້ງໃຫ້ຮູ້ສະພາບວຽກງານກະກຽມຕ່າງໆຂອງກອງປະຊຸມປະຈຳປີ 2015 ຂອງເວທີປຶກສາຫາລືອາຊີໂປອາວ. ທ່ານໂຈ່ວເວີນຈົ້ງແນະນຳໃຫ້ຮູ້ວ່າ, ທ່ານສີຈິ້ນຜິງ, ປະທານປະເທດຈີນ ແລະ ຜູ້ນຳຂອງປະເທດຕ່າງໆຈະເຂົ້າຮ່ວມພິທີໄຂກອງປະຊຸມປະຈຳປີ, ຈຳນວນຜູ້ນຳທີ່ເຂົ້າຮ່ວມກອງປະຊຸມປະຈຳປີໃນຄັ້ງນີ້ຈະຫຼາຍກວ່າທຸກຄັ້ງທີ່ຜ່ານມາ.
ກອງປະຊຸມປະຈຳປີ 2015 ຂອງເວທີປຶກສາຫາລືອາຊີໂປອາວຈະຈັດຂຶ້ນຢູ່ເມືອງໂປອາວແຂວງໄຫຫຼຳຂອງຈີນແຕ່ວັນທີ 26 ຫາວັນທີ 29 ມີນານີ້, ຫົວຂໍ້ຕົ້ນຕໍຂອງກອງປະຊຸມແມ່ນ "ອະນາຄົດໃໝ່ຂອງອາຊີ: ກ້າວໄປສູ່ປະຊາຄົມຮ່ວມຊາຕາກຳ". ຈະຈັດໃຫ້ມີການປຶກສາຫາລືຢ່າງເປັນທາງການ 77 ຮອບໂດຍປິ່ນອ້ອມຫົວຂໍ້ຕົ້ນຕໍແລະກອງປະຊຸມ, ຫົວຂໍ້ປະຊຸມກ່ຽວພັນເຖິງ 6 ຂົງເຂດໃຫຍ່ຄື: ເສດຖະກິດມະຫາພາກ, ການຮ່ວມມືຂອງພາກພື້ນ, ການຫັນປ່ຽນຮູບແບບອຸດສາຫະກຳ, ການປະດິດສ້າງເຕັກໂນໂລຊີ, ຄວາມໝັ້ນຄົງທາງການເມືອງ ແລະ ສະພາບຊີວິດການເປັນຢູ່ຂອງປະຊາຊົນ.
ທ່ານໂຈ່ວເວີນຈົ້ງແຈ້ງໃຫ້ຮູ້ຕື່ມອີກວ່າ, ເຈົ້າໜ້າທີ່ລະດັບລັດຖະມົນຕີຂອງປະເທດຕ່າງໆທີ່ເຂົ້າຮ່ວມເວທີປຶກສາຫາລືຫຼືເຂົ້າຮ່ວມກອງປະຊຸມພາຍໃຕ້ການນຳພາຂອງຜູ້ນຳນັ້ນຄາດວ່າຈະຫຼາຍກວ່າ 80 ທ່ານ, ພ້ອມດຽວກັນນັ້ນ, ຈະມີປະທານຄະນະກຳມະການ ແລະ CEO ຂອງບໍລິສັດ 65 ແຫ່ງໃນການຈັດອັນດັບບໍລິສັດທີ່ເຂັ້ມແຂງແລະຮັ່ງມີ 500 ແຫ່ງຂອງໂລກເຂົ້າຮ່ວມກອງປະຊຸມ. ຕາມສະຖິຕິຫຼ້າສຸດຂອງສຳນັກເລຂາຂອງກອງປະຊຸມ, ຜູ້ຕາງໜ້າທາງການທີ່ເຂົ້າຮ່ວມກອງປະຊຸມຄັ້ງນີ້ແມ່ນມີ 1.772 ຄົນ, ນັກຂ່າວສື່ມວນຊົນ 1.014 ຄົນ, ລວມທັງໝົດມີ 2.786 ຄົນ, ເຊິ່ງມາຈາກ 49 ປະເທດແລະເຂດແຄວ້ນ.
 |
