ຂ່າວສານຊິນຮວາລາຍງານວ່າ, ໂດຍຕອບສະໜອງຕາມຄຳເຊີນຂອງທ່ານສີຈິ້ນຜິງ ປະທານປະເທດຈີນ, ທ່ານໂຈໂຄ ວິກໂດໂດ ປະທານາທິບໍດີອິນໂດເນເຊຍຈະດຳເນີນການຢ້ຽມຢາມຈີນທາງລັດຖະກິດແຕ່ວັນທີ 26 ຫາວັນທີ 28 ມີນານີ້ ແລະຈະເຂົ້າຮ່ວມພິທີເປີດກອງປະຊຸມເວທີປຶກສາຫາລືອາຊີໂປອາວ 2015. ກ່ອນອອກເດີນທາງ, ທ່ານໄດ້ໃຫ້ສຳພາດຕໍ່ນັກຂ່າວວ່າ, ການຮ່ວມມືລະຫວ່າງອິນໂດເນເຊຍກັບຈີນໃນຂົງເຂດການລົງທຶນແລະການຄ້າກຳລັງປະເຊີນກັບໂອກາດໃໝ່, ຫວັງຢ່າງຍິ່ງວ່າຈີນຈະເພີ່ມການລົງທຶນເຂົ້າໃນການກໍ່ສ້າງພື້ນຖານໂຄງລ່າງຂອງອິນໂດເນເຊຍໃຫ້ຫຼາຍຂຶ້ນຕື່ມອີກ.
ທ່ານໂຈໂຄຈະກ່າວປາຖະກະຖາກ່ຽວກັບການເຊື່ອມໂຍງເຊື່ອມຈອດກັນໃນດ້ານຕ່າງໆຢູ່ໃນພິທີເປີດກອງປະຊຸມເວທີປຶກສາຫາລືອາຊີໂປອາວ 2015. ທ່ານກ່າວວ່າ: "ອິນໂດເນເຊຍມີເກາະຈຳນວນຫຼວງຫຼາຍ, ການເຊື່ອມໂຍງເຊື່ອມຈອດກັນມີຄວາມສຳຄັນຫຼາຍທີ່ສຸດຕໍ່ອິນໂດເນເຊຍ. ເວົ້າສຳລັບປະເທດອາຊີປາຊີຟິກ, ການເພີ່ມທະວີການເຊື່ອມໂຍງເຊື່ອມຈອດກັນແມ່ນມີຜົນດີຕໍ່ການຊຸກຍູ້ການພັດທະນາດ້ານເສດຖະກິດຂອງພາກພື້ນແຫ່ງນີ້, ຫວັງວ່າກອງປະຊຸມເວທີປຶກສາຫາລືໃນຄັ້ງນີ້ຈະສາມາດຊຸກຍູ້ປະເທດໃນພາກພື້ນແຫ່ງນີ້ເພີ່ມທະວີການຮ່ວມມືດ້ານ ເສດຖະກິດການຄ້າແລະການລົງທຶນຕື່ມອີກ. "
 |
