"ກອງປະຊຸມໂຕະມົນຂອງຜູ້ນຳສື່ມວນຊົນ" ຂອງເວທີປຶກສາຫາລືອາຊີໂປອໍ ເຊິ່ງແມ່ນເວທີປຶກສາຫາອາຊີໂປອໍ, ວິທະຍຸສາກົນແຫ່ງປະເທດຈີນ ຫຼື CRI ແລະສະມາຄົມການຕ່າງປະເທດສາທາລະນະຂອງຈີນຮ່ວມກັນເປັນເຈົ້າພາບນັ້ນ ຈະໄຂຂຶ້ນໃນວັນທີ 26 ມີນານີ້. ເຂົ້າຮ່ວມກອງປະຊຸມໃນຄັ້ງນີ້ ມີທ່ານຈຽງຈ້ຽນກົວ, ຫົວໜ້າຫ້ອງການຖະແຫຼງຂ່າວລັດຖະບານຈີນ, ທ່ານຫຼີຈ້າວຊິ່ງ, ປະທານສະມາຄົມການຕ່າງປະເທດສາທາລະນະຂອງຈີນ, ທ່ານວາງເກີ່ງນຽນ, ຜູ້ອຳນວຍການໃຫຍ່ວິທະຍຸສາກົນແຫ່ງປະເທດຈີນ, ທ່ານສີຈູ້ນ, ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມຂອງຄະນະພັກແຂວງໄຫຼຫຼຳ ແລະທ່ານອື່ນໆ.
ຂ່າວແຈ້ງວ່າ, ໃນຖານະເປັນສາຂາເວທີປຶກສາຫາລືຂອງກອງປະຊຸມປະຈຳປີ 2015 ຂອງເວທີປຶກສາຫາລືອາຊີໂປອໍ, ກອງປະຊຸມໂຕະມົນຂອງຜູ້ນຳສື່ມວນຊົນໃນຄັ້ງນີ້ ຈະໄດ້ຈັດຂຶ້ນພາຍໃຕ້ຫົວຂໍ້ວ່າ "ເຕົ້າໂຮມຄວາມເຫັນທີ່ເປັນເອກະພາບກັນກ່ຽວກັບເສັ້ນທາງສາຍໄໝ, ຮ່ວມກັນແຕ້ມຮູບແຫ່ງອະນາຄົດໃໝ່ຂອງການຮ່ວມມືລະຫວ່າງສື່ມວນຊົນ", ໂດຍໄດ້ຈັດໃຫ້ມີຫົວຂໍ້ຍ່ອຍ 3 ຫົວຂໍ້ຄື: "ໜຶ່ງແລວທາງໜຶ່ງເສັ້ນທາງ" ຈະນຳມາເຊິ່ງໂອກາດແລະການທ້າທາຍໃດແດ່ໃຫ້ແກ່ປະເທດຂອງພວກທ່ານ? ສື່ມວນຊົນຈະເຮັດແນວໃດເພື່ອຊຸກຍູ້ການສົນທະນາແລະທຳຄວາມເຂົ້າໃຈກັນລະຫວ່າງອາລະຍະທຳທີ່ຕ່າງກັນ? ແລະ ຂົງເຂດໃໝ່ແລະຄວາມເຫັນໃໝ່ກ່ຽວກັບການຮ່ວມມືລະຫວ່າງສື່ມວນຊົນ. ຜູ້ນຳຂອງສື່ມວນຊົນ 20 ກວ່າທ່ານທີ່ມາຈາກຣັດເຊຍ, ອາເມລິກາ, ອັງກິດ, ສ.ເກົາຫຼີ, ຍີ່ປຸ່ນ, ອິນເດຍ, ບັງກະລາເດັດ, ມະເລເຊຍ, ຊອກດານີ, ມຽນມາ, ກຳປູເຈຍ ແລະປາກີສະຖານເປັນຕົ້ນ ຈະຮ່ວມກັນປຶກສາຫາລືທັດສະນະຄະຕິໃໝ່ກ່ຽວກັບການໂຄສະນາຂ້າມວັດທະນະທຳ, ແລະວາງແຜນການພັດທະນາການຮ່ວມມືລະຫວ່າງສື່ມວນຊົນໃນອະນາຄົດ.
 |
