ພິທີໄຂກອງປະຊຸມຂອງເວທີປຶກສາຫາລືອາຊີໂປອາວປະຈຳປີ 2015 ໄດ້ຈັດຂຶ້ນໃນຕອນເຊົ້າວັນທີ 28 ມີນານີ້, ທ່ານສີຈິ້ນຜິງ, ປະທານປະເທດຈີນໄດ້ກ່າວຄຳປາໄສທີ່ສຳຄັນວ່າ, ຈີນແລະບັນດາປະເທດອາຊຽນຈະຮ່ວມມືສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.
ທ່ານສີຈິ້ນຜິງກ່າວວ່າ, ຈີນແລະບັນດາປະເທດອາຊຽນຈະຮ່ວມມືສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ, ອາຊຽນກັບຈີນ, ຍີ່ປຸ່ນ ແລະ ສ.ເກົາຫຼີ ຈະສຸມກຳລັງເຂົ້າໃນການສ້າງສຳເລັດປະຊາຄົມເສດຖະກິດອາຊີຕາເວັນອອກໃນປີ 2020. ພວກເຮົາຈະສ້າງເຄືອຂ່າຍການຄ້າເສລີຂອງອາຊີຢ່າງຕັ້ງໜ້າ, ທຳຄວາມພະຍາຍາມເຂົ້າໃນການຮ່ວມກັນສຳເລັດການເຈລະຈາກ່ຽວກັບການຍົກລະດັບເຂດການຄ້າເສລີຈີນ-ອາຊຽນແລະການເຈລະຈາຂອງສັນຍາກ່ຽວກັບການພົວພັນປະຊາຄົມເສດຖະກິດຮອບດ້ານຢູ່ໃນພາກພື້ນໃນປີ 2015. ໃນເວລາດຽວກັນທີ່ຊຸກຍູ້ເສດຖະກິດຂອງອາຊີໃຫ້ເຊື່ອມໂຍງເຂົ້າກັນ, ພວກເຮົາຄວນຍຶດໝັ້ນລັດທິພາກພື້ນທີ່ໄຂປະຕູ, ປະສານງານກັນເພື່ອຊຸກຍູ້ການຮ່ວມມືຂ້າມພາກພື້ນຊຶ່ງລວມທັງອົງການຮ່ວມມືເສດຖະກິດອາຊີປາຊີຟິກ.
ຝ່າຍຈີນໄດ້ລິເລີ່ມໃຫ້ເລັ່ງລັດວາງແຜນການເຊື່ອມໂຍງເຊື່ອມຈອດກັນລະຫວ່າງອາຊີຕາເວັນອອກ-ອາຊີ, ຊຸກຍູ້ການຮ່ວມມືແລະປະສານງານຮອບດ້ານໃນດ້ານພື້ນຖານໂຄງລ່າງ, ນະໂຍບາຍຂໍ້ກຳນົດແລະລະບຽບການ, ການໄປມາຫາສູ່ກັນດ້ານບຸກຄະລາກອນ. ຕ້ອງເພີ່ມທະວີການສ້າງສາດ້ານການເຊື່ອມໂຍງເຊື່ອມຈອດກັນທາງທະເລ, ຊຸກຍູ້ການສ້າງກົນໄກຮ່ວມມືທາງທະເລຂອງອາຊີ, ຊຸກຍູ້ການຮ່ວມມືໃນຫຼາຍຂົງເຂດເຊັ່ນ: ເສດຖະກິດທາງທະເລ, ການອະນຸລັກສິ່ງແວດລ້ອມ, ການຄຸ້ມຄອງດ້ານໄພພິບັດແລະການປະມົງເປັນຕົ້ນ, ເຮັດໃຫ້ທະເລກາຍເປັນທະເລແຫ່ງສັນຕິພາບ, ມິດຕະພາບແລະການຮ່ວມມືທີ່ເຊື່ອມຕໍ່ບັນດາປະເທດອາຊີ.
 |
