ກອງປະຊຸມລັດຖະມົນຕີການຕ່າງປະເທດຮອບໃໝ່ລະຫວ່າງ 6 ປະເທດກັບອີຣານກ່ຽວກັບບັນຫານິວເຄລຍຂອງອີຣານຄືອາເມລິກາ,ອັງກິດ, ຝຣັ່ງ, ຣັດເຊຍ, ຈີນແລະເຢຍລະມັນໄດ້ຈັດຂຶ້ນຢູ່ນະຄອນໂລຊານນ໌ຂອງສະວິສໃນຕອນຄ່ຳວັນທີ 29 ມີນານີ້. ນີ້ກໍ່ແມ່ນກອງປະຊຸມລັດຖະມົນຕີການຕ່າງປະເທດກ່ຽວກັບບັນຫານິວເຄລຍຂອງອີຣານຄັ້ງທຳອິດພາຍຫຼັງໄດ້ຕົກລົງເລື່ອນເວລາຂອງການເຈລະຈາກ່ຽວກັບບັນຫານິວເຄລຍຂອງອີຣານໃນເດືອນພະຈິກປີກາຍນີ້ເປັນຕົ້ນມາ.
ບາງບຸກຄົນດ້ານການຕ່າງປະເທດທີ່ເຂົ້າຮ່ວມການເຈລະຈາໄດ້ແຈ້ງໃຫ້ນັກຂ່າວຮູ້ວ່າ, ການເຈລະຈາກ່ຽວກັບບັນຫານິວເຄລຍຂອງອີຣານຈະໄດ້ຮັບໝາກຜົນທີ່ມີລັກສະນະທາດແທ້ແມ່ນຖືກຕາມຈິດອາລົມຂອງຄົນ ແລະ ທ່າອ່ຽງແຫ່ງການພັດທະນາ. ໃນໄລຍະສຸດທ້າຍຂອງການເຈລະຈາກ່ຽວກັບບັນຫານິວເຄລຍຂອງອີຣານທີ່ຄ້າຍຄືກັນກັບການແລ່ນມາລາທອນຮອບນີ້, ລັດຖະມົນຕີການຕ່າງປະເທດຂອງ 6 ປະເທດ ແລະ ອີຣານໄດ້ເຕົ້າໂຮມກັນຢູ່ນະຄອນໂລຊານນ໌ຂອງສະວິສ, ເພື່ອສະແຫວງຫາຄວາມຮັບຮູ້ທີ່ເປັນເອກະສັນກັນກ່ຽວກັບການຊຸກຍູ້ການເຊັນສັນຍາຮອບດ້ານກ່ຽວກັບບັນຫານິວເຄລຍຂອງອີຣານ, ເຊິ່ງໄດ້ສະແດງໃຫ້ເຫັນຄວາມເອົາໃຈໃສ່ຢ່າງສູງຈາກຝ່າຍຕ່າງໆທີ່ກ່ຽວຂ້ອງໃນການແກ້ໄຂບັນຫານິວເຄລຍຂອງອີຣານ.
ບຸກຄົນດັ່ງກ່າວແຈ້ງໃຫ້ນັກຂ່າວຮູ້ວ່າ, ປະຈຸບັນ, ການເຈລະຈາກ່ຽວກັບສັນຍາຮອບດ້ານກ່ຽວກັບການແກ້ໄຂບັນຫານິວເຄລຍຂອງອີຣານໄດ້ປາກົດມີທ່າອ່ຽງທີ່ຕັ້ງໜ້າ, ແຕ່ຄວາມຂັດແຍ້ງກັນທີ່ພົ້ນເດັ່ນຈຳນວນໜຶ່ງຍັງໄດ້ເປັນອຸປະສັກຕໍ່ຂະບວນການເຈລະຈາ.
ຕາມຂ່າວແຈ້ງວ່າ, ຖ້າຝ່າຍຕ່າງໆທີ່ກ່ຽວຂ້ອງໃນການເຈລະຈາຄັ້ງນີ້ສາມາດແກ້ໄຂຄວາມຂັດແຍ້ງກັນທີ່ສຳຄັນທັງໝົດ, ຕໍ່ມາຈະເຮັດວຽກທີ່ມີລັກສະນະເຕັກໂນໂລຊີ, ຄືເຮັດໃຫ້ຄວາມຮັບຮູ້ທີ່ເປັນເອກະສັນກັນທີ່ໄດ້ຮັບໃນການເຈລະຈາຫັນເປັນເນື້ອໃນທາງລາຍລັກອັກສອນທີ່ລະອຽດ.
 |
