ງານເອັກສ໌ໂປມີລານຂອງອີຕາລີປີ 2015 ໄດ້ຈັດພິທີໄຂງານໃນວັນທີ 1 ພຶດສະພານີ້, ຫໍວາງສະແດງຈີນຂອງງານໄດ້ເປີດຫໍໃນມື້ດຽວກັນ. ທ່ານສີຈິ້ນຜິງ, ປະທານປະເທດຈີນໄດ້ກ່າວຄຳປາໄສໂດຍຜ່ານທາງວິດີໂອເພື່ອສະແດງຄວາມຊົມເຊີຍຕໍ່ການເປີດຫໍ.
ທ່ານສີຈິ້ນຜິງກ່າວໃນຄຳປາໄສວ່າ: ທ່ານສະແດງຄວາມຍິນດີຕ້ອນຮັບຕໍ່ບັນດາທ່ານທີ່ໄປທ່ຽວຊົມຫໍວາງສະແດງຈີນ. ງານເອັກສ໌ໂປມີລານໄດ້ສຸມໃສ່ກະສິກຳແລະອາຫານ, ຫົວຂໍ້ນີ້ໄດ້ມີສ່ວນພົວພັນເຖິງການດຳລົງຊີວິດແລະການພັດທະນາຂອງທຸກຄົນ, ມີຄວາມໝາຍຫຼາຍ.
ທ່ານສີຈິ້ນຜິງຊີ້ອອກວ່າ: ຢູ່ໃນຫໍວາງສະແດງຈີນ, ບັນດາທ່ານຈະໄດ້ຮູ້ຈັກຄວາມສີວິໄລດ້ານກະສິກຳທີ່ມີມາຕັ້ງແຕ່ດົນນານຂອງຈີນ, ຜົນສຳເລັດດ້ານວິທະຍາສາດເຕັກໂນໂລຊີທີ່ກ້າວໜ້າ, ວັດທະນະທຳດ້ານອາຫານການກິນທີ່ອຸດົມສົມບູນ, ທັງໝົດເຫຼົ່ານີ້ລ້ວນແຕ່ແມ່ນພາກສ່ວນສຳຄັນຂອງອາລິຍະທຳຊົນຊາດຈີນ. ຈີນໃຫ້ຄວາມສຳຄັນໃນລະດັບສູງຕໍ່ບັນຫາກະສິກຳ, ຊົນນະບົດແລະບັນຫາຊາວກະສິກອນ, ຖືບັນຫາເຫຼົ່ານີ້ເປັນຈຸດທີ່ສຳຄັນທີ່ສຸດໃນວຽກງານທັງໝົດຂອງຈີນ. ຈີນພວມພະຍາຍາມຈົນສຸດຄວາມສາມາດຂອງຕົນເຂົ້າໃນການຊຸກຍູ້ກະສິກຳຫັນເປັນແບບທັນສະໄໝ, ຍິນດີຮ່ວມກັບບັນດາປະເທດໃນໂລກແລກປ່ຽນບົດຮຽນແລະເຕັກໂນໂລຊີດ້ານກະສິກຳ, ຮ່ວມກັນປົກປັກຮັກສາຄວາມປອດໄພດ້ານອາຫານຂອງໂລກ, ຮ່ວມກັນຊຸກຍູ້ຄວາມກ້າວໜ້າຂອງອາລິຍະທຳຂອງມວນມະນຸດ.
ຫົວຂໍ້ຕົ້ນຕໍຂອງງານເອັກສ໌ໂປມີລານຂອງອີຕາລີປີ 2015 ແມ່ນ "ບຳລຸງລ້ຽງໜ່ວຍໂລກ, ຊັບພະຍາກອນດ້ານຊີວິດ", ຊຶ່ງຈະຈັດຂຶ້ນແຕ່ວັນທີ 1 ພຶດສະພາຫາວັນທີ 31 ຕຸລາປີນີ້, ລວມມີ 148 ປະເທດແລະອົງການຈັດຕັ້ງສາກົນໄປເຂົ້າຮ່ວມງານ.
