ຕາມຂ່າວສານຊິນຮວາ: ຕອນເຊົ້າວັນທີ 4 ພຶດສະພານີ້, ຢູ່ນະຄອນຫຼວງປັກກິ່ງ, ທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນ ໄດ້ພົບປະກັບຄະນະຜູ້ແທນພັກກົກມິນຕັງຈີນທີ່ນຳໂດຍທ່ານປະທານຈູ່ລີ້ລຸນທີ່ເດີນທາງມາຢ້ຽມຢາມແຜ່ນດິນໃຫຍ່.
ໃນໂອກາດນີ້, ທ່ານສີຈິ້ນຜິງໄດ້ສະແດງຄວາມຍິນດີຕ້ອນຮັບທ່ານຈູ່ລີ້ລຸນທີ່ນຳພາຄະນະມາຢ້ຽມຢາມແຜ່ນດິນໃຫຍ່. ທ່ານກ່າວເນັ້ນວ່າ, ໝາກຜົນແຫ່ງການພັດທະນາໂດຍສັນຕິຂອງການພົວພັນລະຫວ່າງສອງຝັ່ງຊ່ອງແຄບໄຕ້ຫວັນ ແມ່ນໄດ້ມາດ້ວຍຄວາມຫຍຸ້ງຍາກ, ສ່ວນບົດຮຽນທີ່ໄດ້ຮັບນັ້ນແຮ່ງລ້ຳຄ່າ. ເວົ້າໂດຍສັງເຂບແລ້ວກໍແມ່ນ, ຕ້ອງຍຶດໝັ້ນເດີນຕາມເສັ້ນທາງແຫ່ງການພັດທະນາການພົວພັນລະຫວ່າງສອງຝັ່ງໂດຍສັນຕິ, ຍຶດໝັ້ນ "ຄວາມຮັບຮູ້ທີ່ເປັນເອກະພາບກັນ 1992", ຄັດຄ້ານພື້ນຖານດ້ານການເມືອງຂອງ "ອິດທິກຳລັງຢາກໃຫ້ໄຕ້ຫວັນເປັນເອກະລາດ", ຍຶດໝັ້ນດຳເນີນການປຶກສາຫາລືແລະເຈລະຈາກັນລະຫວ່າງສອງຝັ່ງ, ຊຸກຍູ້ການແລກປ່ຽນແລະການຮ່ວມມືໃນທຸກຂົງເຂດ, ແລະຍຶດໝັ້ນສ້າງຄວາມສຸກໃຫ້ແກ່ປະຊາຊົນໃນສອງຝັ່ງຊ່ອງແຄບ.
ທ່ານຈູ່ລີ້ລຸນກ່າວວ່າ, ວຽກງານການພັດທະນາລະຫວ່າງສອງຝັ່ງໂດຍສັນຕິ ໄດ້ຮັບໝາກຜົນຢ່າງຫຼວງຫຼາຍແລ້ວ, ຫວັງວ່າ, ບົນພື້ນຖານແຫ່ງ "ຄວາມຮັບຮູ້ທີ່ເປັນເອກະພາບກັນ 1992", ສອງຝັ່ງຈະຮ່ວມມືກັນໃນດ້ານສັນຕິພາບຂອງພາກພື້ນ, ການອະນຸລັກສິ່ງແວດລ້ອມ, ການປັບປຸງເສດຖະກິດແລະດ້ານອື່ນໆ, ເຮັດໃຫ້ໝາກຜົນແຫ່ງການພັດທະນາການພົວພັນລະຫວ່າງສອງຝັ່ງສ້າງຜົນປະໂຫຍດໃຫ້ແກ່ປະຊາຊົນຂັ້ນຮາກຖານ, ວິສາຫະກິດຂະໜາດກາງແລະນ້ອຍ ແລະກຸ່ມຄົນຊາວໜຸ່ມໃຫ້ຫຼາຍກວ່າເກົ່າ, ແລະຊຸກຍູ້ການພົວພັນລະຫວ່າງສອງຝັ່ງໃຫ້ມີການພັດທະນາໂດຍສັນຕິຢ່າງຕໍ່ເນື່ອງ.