ວັນທີ 5 ພຶດສະພານີ້, ທ່ານເຊີເກ ລາວຼົຟ, ລັດຖະມົນຕີວ່າການກະຊວງການຕ່າງປະເທດຣັດາເຊຍກ່າວວ່າ, ຣັດເຊຍຈະບໍ່ປຶກສາຫາລືກັບປະເທດຕາເວັນຕົກກ່ຽວກັບປະຖົມປັດໄຈຂອງການຍົກເລີກການຂວ້ຳບາດຕໍ່ຣັດເຊຍ.
ໃນເວລາພົບປະກັບທ່ານເຊບາສຕີອັນ ຄູວສ໌, ລັດຖະມົນຕີວ່າການກະຊວງການຕ່າງປະເທດໂອຕຣິສທີ່ໄປຢ້ຽມຢາມຢູ່ມົສກູໃນມື້ດຽວກັນ, ທ່ານລາວຼົຟກ່າວວ່າ, ການທີ່ສະຫະພາບເອີຣົບຂວ້ຳບາດຣັດເຊຍນັ້ນ ບໍ່ແມ່ນການຕົກລົງຂອງຣັດເຊຍ, ສະນັ້ນ, ຣັດເຊຍຈະບໍ່ດຳເນີນການຢ້ຽມຢາມແລະຮ້ອງຂໍໃຫ້ຍົກເລີກການຂວ້ຳບາດດັ່ງກ່າວ.
ທ່ານລາວຼົຟກ່າວຕື່ມວ່າ, ມາຮອດປັດຈຸບັນ, ຢູ່ບາງຂົງເຂດທີ່ກະທົບກະເທືອນເຖິງການພັດທະນາເສດຖະກິດຂອງຣັດເຊຍ ຍັງອາໄສເຄື່ອງຊີ້ນສ່ວນແລະເຕັກນິກທີ່ນຳເຂົ້າຈາກຕ່າງປະເທດເປັນສ່ວນໃຫຍ່, ນີ້ແມ່ນສິ່ງທີ່ຣັດເຊຍ ຍອມຮັບບໍ່ໄດ້. ຣັດເຊຍຈະບັນລຸການກຸ້ມຕົນເອງໃນຂົງເຂດເຫຼົ່ານີ້ເປັນສ່ວນໃຫຍ່.
ທ່ານລາວຼົຟຍັງກ່າວອີກວ່າ, ບໍ່ຄວນເອົາບັນຫາການເມືອງໄປພົວພັນກັບເສດຖະກິດ, ສາຍພົວພັນຣັດເຊຍ-ເອີຣົບ ຄວນສ້າງຕັ້ງຂຶ້ນຢູ່ບົນພື້ນຖານທີ່ການພົວພັນດ້ານການເມືອງບໍ່ກະທົບເຖິງການພົວພັນດ້ານເສດຖະກິດ. ຖ້າຫາກວ່າສອງຝ່າຍດຳເນີນການໄປມາຫາສູ່ກັນຕາມຫຼັກການທີ່ສະເໝີພາບກັນ, ເຄົາລົບເຊິ່ງກັນແລະກັນ ແລະພິຈາລະນາເຖິງຜົນປະໂຫຍດຂອງຝ່າຍກົງກັນຂ້າມແລ້ວ, ບັນຫາທັງໝົດກໍຈະໄດ້ຮັບການແກ້ໄຂໃຫ້ຕົກໄປເລີຍ. ຖ້າສະຫະພາບເອີຣົບຍົກເລີກການຂວ້ຳບາດແຕ່ຝ່າຍດຽວ, ຣັດເຊຍກໍຈະສືບຕໍ່ພັດທະນາການພົວພັນຄູ່ຮ່ວມກັບເອີຣົບ.
 |
