ອົງການກອງທຶນເງິນຕາສາກົນ ຫຼື IMF ໄດ້ອອກຖະແຫຼງການໃນວັນທີ 26 ພຶດສະພານີ້ ໂດຍກ່າວວ່າ, ຜົນປະເມີນຫຼ້າສຸດຂອງອົງການນີ້ເຫັນວ່າ: ອັດຕາແລກປ່ຽນຕົວຈິງຂອງເງິນຢວນໃນໜຶ່ງປີຜ່ານມານີ້ໄດ້ເພີ່ມຂຶ້ນຢ່າງຫຼວງຫຼາຍ, ປັດຈຸບັນ, ຄ່າເງິນຢວນບໍ່ແມ່ນຖືກປະເມີນໃນລະດັບຕ່ຳອີກແລ້ວ.
ຖະແຫຼງການ ກ່າວວ່າ: ອັດຕາແລກປ່ຽນເງິນຢວນໃນອະນາຄົດຈະມີການເໜັງຕິງຕາມການປ່ຽນແປງຂອງພາວະພື້ນຖານ. ເວົ້າສຳລັບກົນໄກອັດຕາແລກປ່ຽນແລ້ວ, IMF ໄດ້ສະເໜີໃຫ້ຈີນເລັ່ງຄວາມຄືບໜ້າໃນການເປີດກວ້າງຄວາມຄ່ອງແຄ້ວຂອງອັດຕາແລກປ່ຽນເງິນຢວນຕື່ມອີກ, ໂດຍໃຫ້ບັນລຸອັດຕາແລກປ່ຽນລອຍຕົວໂດຍພື້ນຖານພາຍໃນ 2-3 ປີຂ້າງໜ້ານີ້.
ກ່ຽວກັບອະນາຄົດຂອງເສດຖະກິດຈີນ, IMF ກ່າວວ່າ: ເສດຖະກິດຈີນພັດທະນາຊ້າລົງບໍ່ແມ່ນຈຸດປະສົງ, ແຕ່ຫາກແມ່ນເພື່ອຫັນປ່ຽນຈາກຮູບແບບການເຕີບໂຕດ້ານເສດຖະກິດທີ່ບໍ່ແມ່ນແບບຍືນຍົງໃນ 10 ປີຜ່ານມາ. ອີງຕາມຜົນການຄາດຄະເນຂອງ IMF, ປີນີ້, ເສດຖະກິດຈີນຈະເຕີບໂຕ 6,8%, ເຊິ່ງເປັນຜົນເກືອບເທົ່າທຽມກັບຕົວເລກ 7% ຂອງທາງການຈີນຄາດໄວ້. IMF ກ່າວຕື່ມວ່າ: ເຖິງວ່າເສດຖະກິດຈີນໄດ້ພັດທະນາຊ້າລົງເລັກໜ້ອຍກໍ່ຕາມ, ແຕ່ຕະຫຼາດແຮງງານຍັງຮັກສາຢູ່ໃນສະພາບທີ່ໝັ້ນທ່ຽງ, ສະນັ້ນ ຈຶ່ງໄດ້ສະໜອງສິ່ງຄ້ຳປະກັນໃຫ້ແກ່ການບໍລິໂພກພາຍໃນຄອບຄົວ.