ກອງປະຊຸມກົນໄກແລກປ່ຽນວັດທະນະທຳລະດັບຮອງນາຍົກລັດຖະມົນຕີຈີນ-ອິນໂດເນເຊຍຄັ້ງທຳອິດ ໄດ້ຈັດຂຶ້ນຢູ່ນະຄອນຫຼວງຈາກາຕາຂອງອິນໂດເນເຊຍໃນວັນທີ 27 ພຶດສະພານີ້. ທ່ານສີຈິ້ນຜິງ, ປະທານປະເທດຈີນ ແລະ ທ່ານໂຈໂຄ ວີໂດໂດ, ປະທານາທິບໍດີອິນໂດເນເຊຍ ໄດ້ສົ່ງສານຊົມເຊີຍເຖິງກອງປະຊຸມດັ່ງກ່າວ.
ໃນສານຊົມເຊີຍຂອງທ່ານສີຈິ້ນຜິງ ຊີ້ອອກວ່າ: ນັບຕັ້ງແຕ່ຈີນແລະອິນໂດເນເຊຍສ້າງການພົວພັນຄູ່ຮ່ວມຍຸດທະສາດຮອບດ້ານເມື່ອເດືອນ ຕຸລາປີ 2013 ເປັນຕົ້ນມາ, ຄວາມໄວ້ເນື້ອ ເຊື່ອໃຈກັນທາງດ້ານການເມືອງລະຫວ່າງສອງປະເທດໄດ້ເຂົ້າສູ່ລວງເລິກຢ່າງບໍ່ຢຸດຢັ້ງ, ການຮ່ວມມືທີ່ແທ້ຈິງກໍ່ໄດ້ຮັບໝາກຜົນອັນອຸດົມສົມບູນ, ເຊິ່ງໄດ້ສ້າງຜົນປະໂຫຍດອັນແທ້ຈິງໃຫ້ແກ່ປະຊາຊົນສອງຊາດ. ເຊື່ອໝັ້ນວ່າການເລີ່ມ ຕົ້ນກົນໄກແລກປ່ຽນວັດທະນະທຳລະດັບຮອງນາຍົກລັດຖະມົນຕີລະຫວ່າງຈີນ-ອິນໂດເນເຊຍຈະມີຜົນດີຕໍ່ການຊຸກຍູ້ການແລກປ່ຽນແລະຮ່ວມມືໃນຂົງເຂດວັດທະນະທຳລະຫວ່າງສອງປະເທດ, ຊຸກຍູ້ການເຊື່ອມໂຍງທາງດ້ານຈິດໃຈ ແລະ ການແລກປ່ຽນດ້ານອາລະຍະທຳລະຫວ່າງປະຊາຊົນສອງຊາດ, ສ້າງພື້ນຖານມະຕິມະຫາຊົນອັນໜັກແໜ້ນໃຫ້ແກ່ການຂະຫຍາຍການພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດ.
ທ່ານໂຈໂຄ ວີໂດໂດ, ປະທານາທິບໍດີອິນໂດເນເຊຍ ກ່າວວ່າ: ສອງປະເທດອິນໂດເນເຊຍ ແລະ ຈີນໄດ້ສ້າງກົນໄກສົນທະນາດ້ານການເມືອງ-ຄວາມໝັ້ນຄົງ ແລະ ການຮ່ວມມືດ້ານເສດຖະກິດຂຶ້ນແລ້ວ, ການສ້າງກົນໄກແລກປ່ຽນດ້ານວັດທະນະທຳມີຈຸດປະສົງເພື່ອສະໜອງສິ່ງຄ້ຳປະກັນດ້ານມະຕິຊົນອັນແຂງແຮງກວ່າເກົ່າໃຫ້ແກ່ການພົວພັນລະຫວ່າງສອງປະເທດທີ່ມີການພັດທະນາຢ່າງຄຶກຄື້ນ. ຂ້າພະເຈົ້າຄອງຄອຍວ່າກົນໄກແລກປ່ຽນວັດທະນະທຳນີ້ຈະໄດ້ຮັບຜົນທີ່ດີ, ເພື່ອຊຸກຍູ້ການພົວພັນລະຫວ່າງສອງປະເທດໃຫ້ພັດທະນາກ້າວເດີນໄປໜ້າຢ່າງແຂງແຮງກວ່າເກົ່າ.
ທ່ານນາງຫຼິວຢຽນຕົ່ງ, ຮອງນາຍົກລັດຖະມົນຕີຈີນ ໄດ້ຂຶ້ນອ່ານສານຊົມເຊີຍຂອງທ່ານປະທານສີຈິ້ນຜິງ, ແລະພ້ອມກັບລັດຖະມົນຕີວ່າການກະຊວງວາງແຜນເອກະພາບດ້ານການພັດທະນາມະນຸດແລະວັດທະນະທຳຂອງອິນໂດເນເຊຍ ຮ່ວມກັນເປັນປະທານກອງປະຊຸມດັ່ງກ່າວ. ນອກຈາກນີ້, ສອງຝ່າຍຍັງໄດ້ເຊັນສັນຍາຮ່ວມມືແລະແລກປ່ຽນໃນຫຼາຍຂົງເຂດ, ເຊັ່ນ: ການສຶກສາ, ວິທະຍາສາດ-ເຕັກນິກ ແລະ ວັດທະນະທຳ.