ງານວາງສະແດງການຫຼິ້ນສະແຕມທົ່ວປະເທດເພື່ອລະນຶກ "ສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟັດຊິດໂລກໄດ້ຮັບໄຊຊະນະຄົບຮອບ 70 ປີ" ໄດ້ຈັດຂຶ້ນຢູ່ນະຄອນຈຸ່ງກິ່ງຂອງຈີນໃນວັນທີ 3 ກໍລະກົດນີ້. "ນົກກາງແກສັນຕິພາບ" ທີ່ເປັນສະແຕມຕາມເອກະລັກສະເພາະຕົວທີ່ເປັນຫົວຂໍ້ນະຄອນຈຸ່ງກິ່ງເພື່ອເປັນການລະນຶກສົງຄາມໄດ້ຮັບໄຊຊະນະຄົບຮອບ 70 ປີກໍ່ໄດ້ເລີ່ມພິມຈຳໜ່າຍເປັນຄັ້ງທຳອິດໃນມື້ດຽວກັນ, ເຊິ່ງສະແຕມເຫຼົ່ານີ້ໄດ້ສະແດງໃຫ້ເຫັນເຖິງວັດທະນະທຳກ່ຽວກັບສົງຄາມຕໍ່ຕ້ານຍີ່ປຸ່ນທີ່ມີເນື້ອໃນອຸດົມສົມບູນຂອງນະຄອນຈຸ່ງກິ່ງ.
ໃນງານວາງສະແດງການຫຼິ້ນສະແຕມທົ່ວປະເທດເພື່ອລະນຶກ "ສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟັດຊິດໂລກໄດ້ຮັບໄຊຊະນະຄົບຮອບ 70 ປີ"ທີ່ດຳເນີນໃນໄລຍະດຽວກັນ, ສະແຕມແລະເອກະສານຮູບພາບທີ່ນຳມາວາງສະແດງໄດ້ມີ 300 ກວ່າຂອບ.
ມື້ດຽວກັນ, ໄປສະນີບັດຫົວຂໍ້ກ່ຽວກັບສົງຄາມຕໍ່ຕ້ານຍີ່ປຸ່ນ 2.000 ຊຸດກໍ່ໄດ້ເລີ່ມພິມຈຳໜ່າຍຢູ່ໃນທົ່ວປະເທດ. ໄປສະນີບັດທີ່ປະກອບມີ 8 ບັດຊຸດໜຶ່ງມີເນື້ອໃນລວມທັງຄຳຈາລຶກທີ່ຂຽນໂດຍທ່ານໝາວເຈີຕົງເພື່ອສະຫຼອງໄຊຊະນະຂອງສົງຄາມຕໍ່ຕ້ານຍີ່ປຸ່ນ, ອະນຸສາວະລີຈາລຶກຄຸນງາມຄວາມດີເພື່ອຍາດເອົາໄຊຊະນະໃນສົງຄາມຕໍ່ຕ້ານຍີ່ປຸ່ນແລະອື່ນໆ, ລາຍຮັບສ່ວນໜຶ່ງທີ່ໄດ້ຈາກການພິມຈຳໜ່າຍໄປສະນີບັດໃນຄັ້ງນີ້ຈະບໍລິຈາກໃຫ້ແກ່ນັກຮົບເກົ່າໃນສົງຄາມຕໍ່ຕ້ານຍີ່ປຸ່ນ.
