ຕາມຂ່າວCRI: ຕອນຄ່ຳວັນທີ 31 ສິງຫາແລ້ວນີ້, ທ່ານຫງວຽນວັນໂທ, ເອກອັກຄະລັດຖະທູດຫວຽດນາມປະຈຳຈີນກ່າວຢູ່ປັກກິ່ງວ່າ, ເຊື່ອວ່າຫວຽດນາມແລະຈີນມີສະຕິປັນຍາແລະຄວາມສາມາດອັນພຽງພໍໃນການເຮັດໃຫ້ທະເລຈີນໃຕ້ກາຍເປັນທະເລແຫ່ງສັນຕິພາບ, ການຮ່ວມມືແລະການພັດທະນາ.
ທ່ານຫງວຽນວັນໂທໄດ້ໃຫ້ທັດສະນະດັ່ງກ່າວໃນງານລ້ຽງຮັບຮອງເພື່ອສະເຫຼີມສະຫຼອງວັນຊາດສາທາລະນະລັດສັງຄົມນິຍົມຫວຽດນາມຄົບຮອບ 70 ປີທີ່ໄດ້ຈັດຂຶ້ນໃນມື້ດຽວກັນ. ທ່ານກ່າວວ່າ: ຜ່ານຄວາມພະຍາຍາມຮ່ວມຂອງສອງຝ່າຍ, ໃນ 3 ບັນຫາໃຫຍ່ທີ່ຕົກຄ້າງໄວ້ໃນປະຫວັດສາດ, ໄດ້ແກ້ໄຂ 2 ບັນຫາໃຫຍ່ຢ່າງເໝາະສົມແລ້ວຄື: ການຂີດແບ່ງເສັ້ນຊາຍແດນທາງບົກແລະອ່າວເປີຍປູ້, ກ່ຽວກັບບັນຫາແຕ່ຢ່າງດຽວທີ່ຍັງຕົກຄ້າງໄວ້ໃນປັດຈຸບັນ, ສອງຝ່າຍຄວນປະຕິບັດຕາມການຕົກລົງແລະສັນຍາລະຫວ່າງການນຳຂັ້ນສູງຂອງສອງປະເທດ, ຄວບຄຸມຄວາມຂັດແຍ້ງກັນໃຫ້ດີ, ບໍ່ໃຊ້ການກະທຳທີ່ອາດຈະເຮັດໃຫ້ສະຖານະການມີຄວາມສັບສົນຂຶ້ນຕື່ມ. ບົນພື້ນຖານປະຕິບັດຕໍ່ກັນຢ່າງສະເໝີພາບ, ຕ່າງເຄົາລົບຜົນປະໂຫຍດເຊິ່ງກັນແລະກັນພ້ອມທັງສອດຄ່ອງກັບກົດໝາຍສາກົນ, ແກ້ໄຂຄວາມຂັດແຍ້ງກັນຢ່າງເໝາະສົມດ້ວຍສັນຕິວິທີ, ທ່ານເຊື່ອໝັ້ນຢ່າງສະເໝີຕົ້ນສະເໝີປາຍວ່າສອງຝ່າຍມີສະຕິປັນຍາແລະຄວາມສາມາດອັນພຽງພໍໃນການເຮັດໃຫ້ເຂດທະເລຈີນໃຕ້ກາຍເປັນທະເລແຫ່ງສັນຕິພາບ, ການຮ່ວມມືແລະການພັດທະນາ.
ທ່ານເສີນເຢ້ເຢ້, ຮອງປະທານສະພາປະຊາຊົນແຫ່ງຊາດຈີນ, ທ່ານລີວເຈີ້ນມິນ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນແລະຜູ້ຕາງໜ້າເຈົ້າໜ້າທີ່ຂອງຫຼາຍປະເທດໄດ້ເຂົ້າຮ່ວມງານລ້ຽງຮັບຮອງດັ່ງກ່າວຕາມຄຳເຊີນ.
