ດວງຕາເວັນຢູ່ເທິງທ້ອງຟ້າກຳລັງແຜ່ລັດສະໝີແລະຄວາມຮ້ອນຢ່າງແຮງກ້າ, ຢູ່ໃນສະໜາມເຝິກຊ້ອມ, ຖັນແຖວນາຍແລະພົນທະຫານທີ່ໃສ່ຊຸດທະຫານປະເທດຕ່າງໆພວມແຂ່ງຄວາມຮ້ອນເອົ້າເພື່ອເຝິກຊ້ອມດ້ວຍຄວາມຕັ້ງໃຈທີ່ໜ້ຽວແໜ້ນ, ແລະສຽງຮ້ອງຄຳຂວັນດ້ວຍພາສາປະເທດຕ່າງໆກໍ່ດັງສະໜັ່ນກ້ອງຢ່າງບໍ່ຂາດສາຍ. ໃນນັ້ນ, ມີຖັນແຖວ9ສະຫາຍທີ່ໃສ່ຊຸດສີຂຽວປະດັບດ້ວຍສາຍໂບສີຄຳນັ້ນກຳລັງເຕະກົງຜ່ານໜ້າເວທີປະທານຢ່າງເຂັ້ມແຂງແລະພ້ອມພຽງ.ເຖິງວ່າຈຳນວນຄົນບໍ່ຫຼາຍ,ແຕ່ທ່າທາງທີ່ສະຫງ່າຜ່າເຜີຍ,ບາດກ້າວອັນໜັກແໜ້ນ,ບໍ່ໄດ້ດ້ອຍກວ່າກ້ອນກຳລັງປະເທດອື່ນຈັກໜ້ອຍເລີຍ.
ຖັນແຖວທະຫານ9ສະຫາຍນີ້ກໍ່ແມ່ນຄະນະຜູ້ແທນກອງທັບປະຊາຊົນລາວ. ເຊິ່ງການສວນສະໜາມລະນຶກສົງຄາມປະຊາຊົນຈີນຕໍ່ຕ້ານຟາຊິດຍີ່ປຸ່ນຜູ້ຮຸກຮານແລະສົງຄາມຕໍ່ຕ້ານຟາຊິດໂລກໄດ້ຮັບໄຊຊະນະຄົບຮອບ70ປີໃນຄັ້ງນີ້ກອງທັບປະຊາຊົນລາວໄດ້ຄັດເລືອກນາຍແລະພົນທະຫານ9ສະຫາຍມາຈີນເພື່ອເຂົ້າຮ່ວມ.ທ່ານຮ້ອຍເອກ ຂົນ ວິໄລພອນທີ່ເປັນຫົວໜ້າທິມກ່າວວ່າ,ຝ່າຍລາວໄດ້ຜ່ານການຄັດເລືອກຢ່າງເຂັ້ມງວດ, ໃນທີ່ສຸດໄດ້ຄັດເລືອກ9ສະຫາຍທີ່ມາຈາກກອງກຽດຕິຍົດກອງພັນໃຫຍ່279ຂອງກອງທັບປະຊາຊົນລາວ. 9ສະຫາຍນີ້ລ້ວນແຕ່ມີຄວາມຮູ້ສຶກພາກພູມໃຈທີ່ສຸດທີ່ໄດ້ຕາງໜ້ານາຍແລະພົນທະຫານຈາກກອງທັບປະຊາຊົນລາວກໍຄືປະຊາຊົນທົ່ວປະເທດມາເຂົ້າຮ່ວມການສວນສະໜາມຄັ້ງນີ້. ທ່ານຮ້ອຍເອກຂົນ ວິໄລພອນກ່າວວ່າ, "ຂ້າພະເຈົ້າໃນນາມທິມ9ສະຫາຍ, ມີຄວາມຮູ້ສຶກດີໃຈ, ແລະພູມໃຈທີ່ສຸດ, ທີ່ໄດ້ມາເຂົ້າຮ່ວມການສວນສະໜາມຄັ້ງນີ້, ເຊິ່ງຄັ້ງນີ້ເປັນຄັ້ງທຳອິດແລະຄັ້ງປະຫວັດສາດຂອງປະເທດລາວ."
