ພະນັກງານສະຖານທູດຈີນປະຈຳລາວ ແລະຊາວຈີນທີ່ອາໃສຢູ່ລາວເບິ່ງການຖ່າຍທອດສົດຂອງພິທີສວນສະໜາມ
2015-09-03 19:19:53 cri
ຕາມຂ່າວ cri: ຕອນເຊົ້າວັນທີ 3 ກັນຍານີ້ ລັດຖະບານຈີນໄດ້ຈັດພິທີສວນສະໜາມຢູ່ສະໜາມຫຼວງທຽນອານເມີນ ທີ່ນະຄອນຫຼວງປັກກິ່ງ ເພື່ອລະນຶກໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟາຊິດໂລກຄົບຮອບ 70 ປີ. ຢູ່ນະຄອນຫຼວງວຽງຈັນຂອງ ສປປ ລາວ ຖິ່ນທີ່ຫ່າງໄກ, ພະນັກງານສະຖານທູດຈີນປະຈຳລາວ, ຊາວຈີນ ແລະນັກທຸລະກິດຈີນທີ່ອາໄສຢູ່ປະເທດລາວລວມ 240 ກວ່າຄົນໄດ້ເບິ່ງການຖ່າຍທອດສົດຜ່ານທາງໂທລະພາບ, ເຊິ່ງພວກເຂົາເຈົ້າຕ່າງກໍ່ກ່າວວ່າໄດ້ຮັບກຳລັງໃຈຫຼາຍ.
ທ່ານຫຼຽງຈ້ຽນຈຸ່ນ ອຸປະທູດຊົ່ວຄາວຂອງສະຖານທູດຈີນປະຈຳລາວໃຫ້ສຳພາດຕໍ່ນັກຂ່າວ cri ວ່າ:
ເຖິງວ່າຢູ່ຄົນລະທີ່ລະບ່ອນທີ່ຫ່າງໄກ, ແຕ່ໄດ້ຊົມພິທີສວນສະໜາມລະນຶກໄຊຊະນະແຫ່ງສົງຄາມຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟາຊິດຂອງໂລກ ຄົບຮອບ 70 ປີພ້ອມກັນກັບປະຊາຊົນທີ່ຢູ່ປັກກິ່ງ, ພວກຂ້າພະເຈົ້າຮູ້ສຶກຕື່ນເຕັ້ນໃຈທີ່ສຸດ. ທ່ານຈູມມາລີ ໄຊຍະສອນ ປະທານປະເທດແຫ່ງ ສປປລາວ ພ້ອມພັນລະຍາກໍ່ໄດ້ເຂົ້າຮ່ວມກິດຈະກຳໃນຄັ້ງນີ້, ແລະກໍ່ມີຄະນະຜູ້ແທນກອງທັບປະຊາຊົນລາວເຂົ້າຮ່ວມພິທີສວນສະໜາມຢູ່ຕ່າງປະເທດເປັນຄັ້ງທຳອິດ. ນີ້ກໍ່ສະແດງໃຫ້ເຫັນວ່າ ພັກແລະລັດຖະບານກໍ່ຄືປະຊາຊົນລາວໄດ້ໃຫ້ການສະໜັບສະໜູນແກ່ຈີນ, ພວກຂ້າພະເຈົ້າຂໍສະແດງຄວາມຂອບອົກຂອບໃຈຕໍ່ເລື່ອງນີ້.
ທ່ານຈ່າງອິງຢວນ, ຮອງປະທານສະມາຄົມຈີນນະຄອນຫຼວງວຽງຈັນ ປະທານມູນນິທິຈີນນະຄອນຫຼວງວຽງຈັນກ່າວວ່າ:
ການຖ່າຍທອດສົດກ່ຽວກັບພິທີສວນສະໜາມໃນຄັ້ງນີ້ ຂ້າພະເຈົ້າເບິ່ງແລ້ວຮູ້ສຶກມີຄວາມທະນົງໃຈຫຼາຍ, ພວກຂ້າພະເຈົ້າໃນຖານະເປັນຊາວຈີນທີ່ອາໄສຢູ່ຕ່າງປະເທດ, ໄດ້ສຳຜັດເຖິງຄວາມຈະເລີນຮຸ່ງເຮືອງຂອງປະເທດຊາດ.
ທ່ານເຕິ້ງລຽງຮຸ້ຍ ຜູ້ອຳນວຍການເຂດອາຊີຕາເວັນອອກສຽງໃຕ້ແລະເຂດປາຊີຟິກໃຕ້ຂອງບໍລິສັດໂທລະຄົມຫຸ້ນສ່ວນຈົ່ງຊິ່ງຈຳກັດກ່າວວ່າ, ຜ່ານຈາກການເບິ່ງພິທີສວນສະໜາມແລ້ວ, ຍິ່ງຮູ້ສຶກວ່າສັນຕິພາບໄດ້ມາຢ່າງລຳບາກ.
ກໍ່ຍ້ອນເປັນໄຊຊະນະຂອງສົງຄາມບັ້ນນັ້ນໄດ້ນຳເອົາສະພາບແວດລ້ອມແຫ່ງການພັດທະນາໂດຍສັນຕິມາໃຫ້ພວກເຮົາ, ຈິ່ງສາມາດເຮັດໃຫ້ວິສາຫະກິດຈີນໄປພັດທະນາຢູ່ຕ່າງປະເທດຫຼາຍຂຶ້ນ. ພວກເຮົາຄວນທະນຸຖະໜອມສັນຕິພາບທີ່ບໍ່ແມ່ນໄດ້ມາຢ່າງງ່າຍດາຍນີ້.
ທ່ານເຜິງເຈິ້ງຮວາ ຮອງເລຂາປະຈຳສະພາການຄ້າໃຫຍ່ຈີນ-ລາວໄດ້ນຳຄຳວ່າ: ກະຕຸ້ນໃຈທີ່ສຸດ ມາສົມທຽບຈິດໃຈຂອງຕົນເອງ. ທ່ານກ່າວວ່າ:
ພິທີສວນສະໜາມມື້ນີ້ ມີຄວາມສະຫງ່າຜ່າເຜີຍຫຼາຍ, ເຮັດໃຫ້ປະຊາຊົນຈີນຮູ້ສຶກທະນົງໃຈຫຼາຍ. ສັນຕິພາບແມ່ນຍາດມາໄດ້ຢ່າງລຳບາກ. ກ້ອນກຳລັງຂອງນັກຮົບເກົ່າທີ່ເຄື່ອນເຂົ້າມາກ່ອນໝູ່ນັ້ນກໍ່ເຮັດໃຫ້ຂ້າພະເຈົ້າຮູ້ສຶກຕື້ນຕັນໃຈຫຼາຍ, ພວກຂ້າພະເຈົ້າຄວນຈົດຈຳໄວ້ພວກເພິ່ນໄວ້, ຄວນຈົດຈຳກິດຈະກຳທີ່ມີຄວາມໝາຍໃນມື້ນີ້ໄວ້ຈົນເທົ່າໃດໆ.
