ຕອນເຊົ້າວັນທີ 3 ກັນຍານີ້, ພິທີສວນສະໜາມເພື່ອລະນຶກໄຊຊະນະແຫ່ງສົງຄາມປະຊາຊົນຈີນຕໍ່ຕ້ານການຮຸກຮານຂອງຍິ່ປຸ່ນແລະສົງຄາມຕໍ່ຕ້ານຟາຊິດໂລກຄົບຮອບ 70 ປີໄດ້ເລີ່ມດຳເນີນຢ່າງເປັນທາງການ. ກ້ອນກຳລັງພິທັກທຸງຊາດທາງອາກາດໄດ້ປົກປ້ອງທຸງຊາດຂອງສປ ຈີນ ແລະທຸງທະຫານຂອງກອງທັບປົດປ່ອຍປະຊາຊົນຈີນ, ໂດຍໄດ້ບິນຜ່ານທ້ອງຟ້າຂອງສະໜາມຫຼວງທ່ຽນອ່ານເໝີນເປັນລຳດັບທຳອິດ.
ຂະບວນລົດພວງ 2 ຂະບວນທີ່ປະກອບດ້ວຍທະຫານທີ່ເຄີຍຮ່ວມສົງຄາມ, ລູກຫຼານເຫຼັນຫຼ້ອນຂອງຜູ້ເສຍສະຫຼະຊີວິດ, ແບບຢ່າງຂອງກອງຊ່ວຍເຫຼືອແນວໜ້າໃນສົງຄາມຈຳນວນ 300 ກວ່າຄົນໄດ້ນຳໜ້າເປັນຂະບວນທຳອິດ. ຊຶ່ງລວມທັງນັກຮົບເກົ່າຂອງສອງພັກຄື: ພັກກົກມິນຕັງແລະພັກຄອມມູນິດຈີນທີ່ເຄີຍເຂົ້າຮ່ວມສົງຄາມຕໍ່ຕ້ານການຮຸກຮານຂອງຍີ່ປຸ່ນໂດຍໄດ້ຮັບການຄັດເລືອກຈາກແຜ່ນດິນໃຫຍ່ຈີນ, ຄົນຮຸ່ນຫຼັງຂອງຜູ້ເສຍສະຫຼະຂອງພັກຄອມມູນິດຈີນແລະພັກກົກມິນຕັງໃນສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນ, ພ້ອມດ້ວຍຜູ້ຕາງໜ້າແບບຢ່າງຂອງກອງຊ່ວຍເຫຼືອແນວໜ້າໃນສົງຄາມ. ນັກຮົບເກົ່າທີ່ເຂົ້າຮ່ວມການສວນສະໜາມໃນຄັ້ງນີ້ມີອາຍຸສະເລ່ຍ 90 ປີ, ຜູ້ທີ່ມີອາຍຸສູງທີ່ສຸດແມ່ນມີ 102 ປີ.
ຜູ້ຕາງໜ້ານັກຮົບເກົ່າຂອງກອງທັບແດງອະດີດສະຫະພາບຊູວຽດ, ກອງກຳລັງພິເສດຂອງອາເມລິກາທີ່ມີຊື່ວ່າ "Tiger" ແລະອື່ນໆພ້ອມດ້ວຍຜູ້ຕາງໜ້າລູກຫຼານຂອງເຂົາເຈົ້າກໍ່ໄດ້ມາເຂົ້າຮ່ວມພິທີສວນສະໜາມ. 70 ປີກ່ອນໜ້ານີ້, ທະຫານຊາວຕ່າງປະເທດແລະບຸກຄົນໄມຕີຈິດມິດຕະພາບສາກົນຈຳນວນຫຼວງຫຼາຍໄດ້ມາຈີນເພື່ອສະໜັບສະໜູນສົງຄາມຕໍ່ຕ້ານ, ໂດຍໄດ້ອຸດທິດຕົນເອງແລະປະກອບສ່ວນເຂົ້າໃນໄຊຊະນະແຫ່ງສົງຄາມຄັ້ງນັ້ນ.