ຄຳປາໄສຂອງທ່ານປະທານສີຈິ້ນຜິງໃນພິທີລະນຶກວັນຄົບຮອບ 70 ປີແຫ່ງສົງຄາມຕໍ່ຕ້ານຟາຊິດຍີ່ປຸ່ນຂອງປະຊາຊົນຈີນແລະສົງຄາມຕໍ່ຕ້ານຟາຊິດຂອງໂລກໄດ້ຖືກຕອບຮັບເປັນຢ່າງດີແລະກວ້າງຂວາງຈາກປະຊາຄົມໂລກ

ສຳນັກຂ່າວສານຊິນຮວາລາຍງານວ່າ: ຄຳປາໄສສຳຄັນທີ່ທ່ານສີຈິ້ນຜິງ ປະທານປະເທດຈີນໄດ້ກ່າວຢູ່ໃນພິທີລະນຶກ ວັນຄົບຮອບ 70 ປີແຫ່ງສົງຄາມຕໍ່ຕ້ານຟາຊິດຍີ່ປຸ່ນຂອງປະຊາຊົນຈີນແລະສົງຄາມຕໍ່ຕ້ານຟາຊິດຂອງໂລກໃນວັນທີ 3 ກັນຍານີ້ໄດ້ຖືກການຕອບຮັບເປັນຢ່າງດີແລະກວ້າງຂວາງຈາກປະຊາຄົມໂລກ. ຫາງສຽງເຫັນວ່າ: ຄຳປາໄສຂອງທ່ານສີຈິ້ນຜິງໄດ້ປະກາດຄວາມຕັດສິນໃຈຂອງປະຊາຊົນຈີນທີ່ຍິນ ດີຮ່ວມກັບປະຊາຊົນຂອງບັນດາປະເທດໃນໂລກພ້ອມກັນຈື່ຈຳປະຫວັດສາດ,ຮ່ວມມືກັນປົກປ້ອງສັນຕິພາບ; ທ່ານປະກາດວ່າ ຈີນຈະບໍ່ເປັນເຈົ້າໂລກຕະຫຼອດໄປ, ຈີນຈະຫຼຸດກຳລັງທະຫານຈຳນວນ 3 ແສນຄົນ, ເຊິ່ງໄດ້ສະແດງໃຫ້ເຫັນຕື່ມອີກວ່າຈີນເປັນກຳລັງສຳຄັນແຫ່ງການປົກປັກຮັກສາສັນຕິພາບແລະການພັດທະນາຂອງໂລກ.

ທ່ານ ລູອິສ ເອສວີເລຍ ອະດີດປະທານາທິບໍດີແມັກຊິກກ່າວວ່າ: ຄຳປາໄສຂອງທ່ານສີຈິ້ນຜິງ ປະທານປະເທດຈີນໄດ້ສະແດງໃຫ້ເຫັນຢ່າງເຕັມປ່ຽມກ່ຽວກັບຄວາມປາຖະໜາອັນດີງາມຂອງປະຊາຊົນຈີນທີ່ຮັກຫອມສັນຕິພາບຂອງໂລກ, ປົກປັກຮັກສາສະເຖຍລະພາບແລະຄວາມຈະເລີນຮຸ່ງເຮືອງຂອງໂລກ.

ທ່ານໂຊປຣາ ນັກວິເຄາະຍຸດທະສາດຜູ້ອາວຸໂສ, ອະດີດພົນຈັດຕະວາກອງທັບບົກອິນເດຍກ່າວວ່າ: ທ່ານປະທານສີຈິ້ນຜິງປະກາດວ່າຈີນຈະຫຼຸດກຳລັງທະຫານຈຳນວນ 3 ແສນຄົນນັ້ນເປັນມາດຕະການສຳຄັນອັນໜຶ່ງໃນການບັນລຸເປົ້າໝາຍຫັນເປັນທັນສະໄໝຂອງກອງທັບແລະວຽກງານປ້ອງກັນຊາດຂອງຈີນ ເຊິ່ງມີຜົນດີຕໍ່ສັນຕິພາບແລະສະເຖຍລະພາບຂອງພາກພື້ນ.

ທ່ານໂນເອມີ ຄາເບີນ ນັກວິຈານສື່ມວນຊົນຜູ້ອາວຸໂສຂອງເວເນຊູເອລາກ່າວວ່າ: ທ່ານປະທານສີຈິ້ນຜິງປະກາດແຜນການຫຼຸດກຳລັງທະຫານໃນໂອກາດສະຫຼອງວັນໄຊຊະນະສົງຄາມຕໍ່ຕ້ານຟາຊິດນັ້ນຖືວ່າເປັນການສະແດງໃຫ້ເຫັນເຖິງຄວາມຕັດສິນໃຈຂອງຈີນທີ່ຈະເດີນຕາມເສັ້ນທາງພັດທະນາໂດຍສັນຕິຢ່າງສະເໝີຕົ້ນສະເໝີປາຍ, ເດັດດ່ຽວຈະບໍ່ນຳເອົາຄວາມທຸກທໍລະມານແຫ່ງສົງຄາມທີ່ຕົນໄດ້ປະສົບນັ້ນບັງຄັບຕື່ມໃສ່ຊົນຊາດອື່ນ, ເຊິ່ງເປັນການກະທຳທີ່ໜ້າຍ້ອງຍໍຊົມເຊີຍ.

ທ່ານສຽງເຟິ່ງ ຮອງຫົວໜ້າສຳນັກໜັງສືພິມ "ອາຊີລາຍວັນ" ເຊິ່ງເປັນໜັງສືພິມພາສາຈີນຂອງໄທໄດ້ກ່າວວ່າ: ໃນຄຳປາໄສຂອງທ່ານປະທານສີຈິ້ນຜິງໄດ້ຢືນຢັນອີກຄັ້ງໃໝ່ວ່າ: ຈີນຈະບໍ່ເປັນເຈົ້າໂລກ, ບໍ່ແຜ່ຂະຫຍາຍອິດທິກຳລັງ ແລະຈະບໍ່ນຳເອົາປະສົບການທີ່ໜ້າສັງເວດທີ່ຕົນເອງໄດ້ປະສົບຜ່ານມານັ້ນບັງຄັບຕື່ມໃສ່ຊົນຊາດອື່ນຕະຫຼອດໄປ. ຄວາມຈິງແລ້ວ, ນີ້ກໍຄືທັດສະນະແຫ່ງວັດທະນະທຳທີ່ມີມູນເຊື້ອຂອງຈີນຄື "ສິ່ງບໍ່ດີທີ່ຕົນເອງບໍ່ຢາກປະສົບນັ້ນກໍບໍ່ຄວນໄປກະທຳໃສ່ຜູ້ອື່ນ", ເຊິ່ງເປັນຄວາມເຊື່ອຖືດັ້ງເດີມແລະຈາລິຍະທຳຂອງຄົນຈີນ ທັງໄດ້ສະແດງໃຫ້ເຫັນເຖິງຄວາມຕັດສິນໃຈແລະຄວາມໝັ້ນໃຈຂອງຈີນໃນການກ້າວເດີນຕາມເສັ້ນທາງພັດທະນາໂດຍສັນຕິ.

ທ່ານໂອຊິນ ອາດາລາ ວ່າການແທນຫົວໜ້າບໍລິຫານງານເວທີປຶກສາຫາລືສັນຕິພາບອາຟຣິກກາກ່າວວ່າ: ການປະກອບສ່ວນຂອງຈີນເພື່ອໄຊຊະນະແຫ່ງສົງຄາມໂລກຄັ້ງທີສອງແມ່ນໄດ້ສ່ອງແສງໃຫ້ເຫັນຢູ່ກັບບ່ອນທີ່ວ່າ ປະເທດທັງໝົດທີ່ຢູ່ໃຕ້ການປົກຄອງຂອງມະຫາອຳນາດນັ້ນສາມາດຍາດເອົາເອກະລາດໄດ້ໂດຍພາຍໃຕ້ການສະໜັບສະໜູນຈາກຈີນ. ຈີນສະແຫວງຫາສັນຕິພາບແລະການພັດທະນາຂອງໂລກ, ໝູນໃຊ້ບົດບາດຂອງຕົນໃນເວທີສາກົນທີ່ນັບມື້ນັບສູງຂຶ້ນນັ້ນຊັກນຳໃຫ້ປະເທດແລະເຂດແຄວ້ນຫຼາຍກວ່າເກົ່າໃຫ້ກ້າວຂຶ້ນສູ່ເສັ້ນທາງພັດທະນາໂດຍສັນຕິ.