ວັນທີ 3 ກັນຍານີ້ ແມ່ນວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟາຊິດຂອງໂລກ. ທ່ານສີຈິ້ນຜິງ, ຜູ້ນຳສູງສຸດຂອງຈີນໄດ້ກ່າວຄຳປາໄສທີ່ສຳຄັນ, ໂດຍສະແດງເຖິງຄວາມຄິດເຫັນຂອງຈີນທີ່ມີຕໍ່ສັນຕິພາບ, ປະຫວັດສາດ, ຄວາມໝັ້ນຄົງຂອງໂລກ, ລະບຽບສາກົນ ແລະ ອາລະຍະທຳຂອງມວນມະນຸດ ເປັນຕົ້ນ.
ໃນຄຳປາໄສ, ທ່ານສີຈິ້ນຜິງ ໄດ້ກ່າວເຖິງ "ສັນຕິພາບ" 18 ເທື່ອ, ໃນນັ້ນໄດ້ເນັ້ນໜັກເຖິງສັດທາອັນແຮງກ້າທີ່ຮັກຫອມສັນຕິພາບ ແລະ ຄວາມຕັດສິນໃຈອັນເດັດດ່ຽວໃນການປົກປັກຮັກສາສັນຕິພາບຂອງຈີນ ຈາກມູນເຊື້ອໃນປະຫວັດສາດ ແລະ ການພັດທະນາໃນປັດຈຸບັນ ເປັນຕົ້ນ.
ໃນກິດຈະກຳໃນຄັ້ງນີ້, ທ່ານສີຈິ້ນຜິງ ໄດ້ປະກາດຢ່າງໜັກແໜ້ນວ່າ ຈີນຈະຫຼຸດກຳລັງທະຫານຈຳນວນ 3 ແສນຄົນ. ນັບຕັ້ງແຕ່ຊຸມປີ 1980 ເປັນຕົ້ນມາ, ຈີນໄດ້ຫຼຸດກຳລັງຮົບຢ່າງເປັນເຈົ້າການ 3 ເທື່ອແລ້ວ, ໂດຍໄດ້ຫຼຸດກຳລັງທະຫານເປັນຈຳນວນ 1 ລ້ານ, 5 ແສນ ແລະ 2 ແສນຕາມໆກັນມາ. ປັດຈຸບັນ, ກອງທັບຈີນທັງໝົດມີຈຳນວນ 2 ລ້ານ 3 ແສນຄົນ. ເທື່ອນີ້ຖ້າໄດ້ຫຼຸດກຳລັງທະຫານຢ່າງຮຽບຮ້ອຍແລ້ວ, ກອງທັບຈີນທັງໝົດຈະຫຼຸດລົງເປັນ 2 ລ້ານຄົນ.
ທ່ານຢາງຢີຈິ່ນ, ໂຄສົກກະຊວງປ້ອງກັນປະເທດຈີນ ກ່າວວ່າ: ຈີນຫຼຸດກຳລັງທະຫານຂອງປະເທດຕົນ, ໄດ້ສະແດງໃຫ້ເຫັນວ່າ ຈີນຊູທຸງແຫ່ງສັນຕິພາບ, ການພັດທະນາ ແລະ ການຮ່ວມມືໃຫ້ສູງຢ່າງສະເໝີຕົ້ນສະເໝີປາຍ, ເດັດດ່ຽວກ້າວເດີນໄປຕາມເສັ້ນທາງການພັດທະນາໂດຍສັນຕິຢ່າງສະເໝີຕົ້ນສະເໝີປາຍ, ປະຕິບັດນະໂຍບາຍປ້ອງກັນປະເທດແບບປ້ອງກັນຕົວຢ່າງສະເໝີຕົ້ນສະເໝີປາຍ ແລະ ແມ່ນກ້ອນກຳລັງອັນເດັດດ່ຽວໃນການປົກປັກຮັກສາສັນຕິພາບຂອງໂລກແລະສະຖຽນລະພາບຂອງພາກພື້ນ ຢ່າງສະເໝີຕົ້ນສະເໝີປາຍ.
ປະຊາຊົນຈີນໄດ້ປະກອບສ່ວນຢ່າງໃຫຍ່ຫຼວງເພື່ອໄຊຊະນະຂອງສົງຄາມຕໍ່ຕ້ານຟາຊິດຂອງໂລກ, ປະຊາຊົນຈີນກໍໄດ້ຮັບການສະໜັບສະໜູນຢ່າງກວ້າງຂວາງຈາກປະຊາຄົມໂລກໃນສົງຄາມຕໍ່ຕ້ານການຮຸກຮານຂອງຍີ່ປຸ່ນ. ນັກວິເຄາະເຫັນວ່າ, ສົງຄາມຕໍ່ຕ້ານການຮຸກຮານຂອງຍີ່ປຸ່ນຂອງປະຊາຊົນຈີນໄດ້ປະກອບສ່ວນອັນສຳຄັນເພື່ອຟື້ນຟູສັນຕິພາບຂອງໂລກ, ໂລກຊ່ວຍເຫຼືອຈີນຕໍ່ຕ້ານການຮຸກຮານຂອງຍີ່ປຸ່ນກໍໄດ້ສ້າງສິ່ງຮັບປະກັນຄວາມໝັ້ນຄົງ, ນີ້ໄດ້ສະແດງໃຫ້ເຫັນເຖິງທັດສະນະຄວາມໝັ້ນຄົງໃນທົ່ວໂລກຂອງຈີນ
ໃນເວລາເຂົ້າຮ່ວມກອງປະຊຸມມາດຕະການປະສານງານແລະສ້າງຄວາມໄວ້ເນື້ອເຊື່ອໃຈກັນຂອງອາຊີ ໃນປີ 2014, ທ່ານສີຈິ້ນຜິງ ໄດ້ສະເໜີ "ທັດສະນະຄວາມໝັ້ນຄົງຂອງອາຊີແບບຮ່ວມກັນ, ສັງລວມ, ຮ່ວມມື ແລະ ແບບຍືນຍົງ". ທັດສະນະຄວາມໝັ້ນຄົງດັ່ງກ່າວກໍເໝາະສຳລັບທົ່ວໂລກເຊັ່ນກັນ.
ໃນຄຳປາໄສທີ່ກ່າວໃນກິດຈະກຳຄັ້ງນີ້, ທ່ານສີຈິ້ນຜິງ ໄດ້ກ່າວເນັ້ນອີກເທື່ອໜຶ່ງວ່າ, ບັນດາປະເທດໃນໂລກຄວນຮ່ວມກັນປົກປັກຮັກສາລະບຽບສາກົນ ແລະ ລະບົບສາກົນທີ່ຖືຈຸດປະສົງ ແລະ ຫຼັກການຂອງກົດບັດສະຫະປະຊາຊາດເປັນໃຈກາງ, ຕັ້ງໜ້າສ້າງການພົວພັນສາກົນແບບໃໝ່ທີ່ຖືການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນໃຈກາງ, ແລະຮ່ວມກັນຊຸກຍູ້ພາລະກິດອັນສູງສົ່ງແຫ່ງສັນຕິພາບແລະການພັດທະນາຂອງໂລກ. ແຕ່ໃດໆມາ, ຈີນກໍແມ່ນຜູ້ປົກປ້ອງສັນຕິພາບຂອງໂລກ, ໃນຂະນະດຽວກັນກໍແມ່ນຜູ້ເດັດດ່ຽວປົກປ້ອງ, ຜູ້ກໍ່ສ້າງ ແລະ ຜູ້ປະກອບສ່ວນຕໍ່ລະບຽບສາກົນແລະພາກພື້ນເຊັ່ນກັນ.
ເພື່ອສອດຄ່ອງກັບທ່າອ່ຽງໃຫຍ່ແຫ່ງການຫັນເປັນຫຼາຍຂົ້ວຂອງໂລກ ແລະ ການພັດທະນາດ້ານໂລກາພິວັດ, ຈີນຍິນດີຮ່ວມກັນກັບປະເທດຕ່າງໆ, ກ້າວໄປພ້ອມຍຸກສະໄໝ, ຊຸກຍູ້ລະບຽບສາກົນ ແລະ ລະບົບສາກົນໃຫ້ມີການປະຕິຮູບແລະມີການປັບປຸງໃຫ້ສົມບູນ ໂດຍມີຄວາມຈຳເປັນ, ເຮັດໃຫ້ລະບຽບສາກົນ ແລະ ລະບົບສາກົນມີຄວາມທ່ຽງທຳແລະສົມເຫດສົມຜົນກວ່າເກົ່າ, ແລະຍິ່ງສອດຄ່ອງກັບຄວາມປາຖະໜາຂອງມະຫາຄອບຄົວສາກົນ ໂດຍສະເພາະແມ່ນປະເທດທີ່ກຳລັງພັດທະນາສ່ວນຫຼາຍ ທີ່ພັດທະນາເຕີບໃຫຍ່ຂຶ້ນມາຫຼັງສົງຄາມໂລກຄັ້ງທີ 2.
ທ່ານສີຈິ້ນຜິງ ກ່າວວ່າ: ເພື່ອສັນຕິພາບ, ພວກເຮົາຄວນສ້າງຈິດສຳນຶກອັນໝັ້ນແກ່ນແຫ່ງປະຊາຄົມຮ່ວມຊາຕາກຳຂອງມະນຸດ. ອະຄະຕິກັບຄວາມດູໝິ່ນ, ອາຄາດບາດໝາງກັບສົງຄາມ, ພຽງແຕ່ຈະນຳມາເຊິ່ງໄພພິບັດແລະຄວາມທຸກທໍລະມານເທົ່ານັ້ນ. ການເຄົາລົບເຊິ່ງກັນແລະກັນ, ຢູ່ຮ່ວມກັນແບບສະເໝີພາບ, ພັດທະນາໂດຍສັນຕິ ແລະ ຈະເລີນຮຸ່ງເຮືອງຮ່ວມກັນ ຈຶ່ງຈະແມ່ນເສັ້ນທາງອັນຊອບທຳຂອງມວນມະນຸດ.
ນັກວິເຄາະເຫັນວ່າ, ຈີນຈະເດັດດ່ຽວປົກປ້ອງທັດສະນະປະຫວັດສາດຂອງສົງຄາມໂລກຄັ້ງທີ 2 ທີ່ຖືກຕ້ອງ, ຊຸກຍູ້ລະບຽບສາກົນໃຫ້ມີການປັບປຸງໃຫ້ດີຢ່າງບໍ່ຢຸດຢັ້ງ ໂດຍຖືການພັດທະນາໂດຍສັນຕິ ແລະ ການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນພື້ນຖານ, ຖື "ທັດສະນະຄວາມໝັ້ນຄົງແບບຮ່ວມກັນ, ສັງລວມ, ຮ່ວມມື ແລະ ແບບຍືນຍົງ" ເປັນສິ່ງຊີ້ນຳ, ແລະຖືການສ້າງ "ປະຊາຄົມຮ່ວມຊາຕາກຳ" ເປັນຫຼັກ.
