ວັນທີ 3 ກັນຍານີ້, ທ່ານສີຈິ້ນຜິງ, ປະທານປະເທດຈີນໄດ້ກ່າວຄຳປາໄສທີ່ສຳຄັນໃນກອງປະຊຸມໃຫຍ່ລະນຶກວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງ
ຍີ່ປຸ່ນແລະສົງຄາມຕໍ່ຕ້ານຟາຊິດຂອງໂລກໂດຍປະກາດວ່າ: ຈີນຈະຫຼຸດຈຳນວນທະຫານໃຫ້ໜ້ອຍລົງ 3 ແສນຄົນ. ທ່ານຢາງຢູຈຸ່ນ, ໂຄສົກກະຊວງປ້ອງກັນປະເທດຈີນກ່າວວ່າ: ເປົ້າໝາຍຫຼຸດຈຳນວນທະຫານຈະສາມາດສຳເລັດກ່ອນທ້າຍປີ 2017, ຈຳນວນທະຫານທັງໝົດຂອງກອງທັບຈີນຈະຫຼຸດລົງເຫຼືອພຽງ 2 ລ້ານຄົນ.
ທ່ານຢາງຢູຈຸ່ນກ່າວວ່າ: ໃນຖານະເປັນປະເທດໃຫຍ່ທີ່ພວມພັດທະນາປະເທດໜຶ່ງ, ຈີນຍັງໄດ້ປະເຊີນກັບໄພຂົ່ມຂູ່ດ້ານຄວາມໝັ້ນຄົງທີ່ສັບສົນແລະມີຫຼາຍລະດັບ, ບັນຫາຄວາມໝັ້ນຄົງດ້ານການຢູ່ລອດແລະບັນຫາຄວາມໝັ້ນຄົງດ້ານການພັດທະນາ, ໄພຂົ່ມຂູ່ດ້ານຄວາມໝັ້ນຄົງອັນເປັນມູນເຊື້ອແລະໄພຂົ່ມຂູ່ດ້ານຄວາມໝັ້ນຄົງທີ່ບໍ່ເປັນມູນເຊື້ອມີຄວາມສະຫຼັບສັບຊ້ອນກັນ, ໜ້າທີ່ໃນການປົກປັກຮັກສາຄວາມເປັນເອກະລາດຂອງຊາດ, ຜືນແຜ່ນດິນອັນຄົບຖ້ວນແລະຜົນປະໂຫຍດດ້ານການພັດທະນາມີຄວາມລຳບາກແລະໜັກໜາ. ພ້ອມດຽວກັນນັ້ນ, ກອງທັບຈີນຍັງໄດ້ແບກຫາບໜ້າທີ່ການເຄື່ອນໄຫວການທະຫານທີ່ບໍ່ແມ່ນສົງຄາມເຊັ່ນ: ການກູ້ໄພແລະຊ່ວຍເຫຼືອ, ການປົກປັກຮັກສາສັນຕິພາບຂອງໂລກ ແລະ ການຊ່ວຍເຫຼືອສາກົນເປັນຕົ້ນ, ຍັງຕ້ອງຮັບມືກັບລັດທິກໍ່ການຮ້າຍ, ລັດທິແບ່ງແຍກ, ລັດທິຫົວຮຸນແຮງຂອງພາກພື້ນ. ສະນັ້ນ, ກອງທັບຈີນຕ້ອງການຮັກສາຂະໜາດຂອງກອງທັບໃນລະດັບໃດໜຶ່ງ, ນີ້ລ້ວນແຕ່ແມ່ນເພື່ອຈຸດປະສົງການປ້ອງກັນຕົວ. ພວກເຮົາຈະບໍ່ເດີນຕາມເສັ້ນທາງເກົ່າທີ່ "ປະເທດຈະເລີນແລ້ວກໍ່ຈະໃຊ້ອຳນາດບາດໃຫຍ່", ບໍ່ເປັນເຈົ້າອຳນາດຕະຫຼອດໄປ, ຈະບໍ່ຂະຫຍາຍອານາເຂດຕະຫຼອດໄປ. ມີບາງປະເທດເວົ້າໂຍກໃສ່ວ່າ "ໄພຂົ່ມຂູ່ຂອງຈີນ"ຢ່າງຈົງໃຈ, ນີ້ແມ່ນຝ່າຝືນກັບຄວາມເປັນຈິງແບບພາວະວິໄສ, ແລະກໍ່ບໍ່ມີຄວາມຮັບຜິດຊອບ."
ທ່ານຢາງຢູຈຸ່ນກ່າວຕື່ມວ່າ: ການຫຼຸດຈຳນວນທະຫານໃຫ້ໜ້ອຍລົງ 3 ແສນຄົນ, ແມ່ນການຕົກລົງທາງການເມືອງແລະການສະແດງເປີດເຜີຍທາງການເມືອງທີ່ສຳຄັນແລະໃຫຍ່ຫຼວງອັນໜຶ່ງຂອງພັກແລະລັດຖະບານຈີນ,ແລະຈະສະແດງອີກຄັ້ງໜຶ່ງວ່າຈີນຈະຊູທຸງແຫ່ງສັນຕິພາບ, ການພັດທະນາແລະການຮ່ວມມືໂດຍຕະຫຼອດ, ເດີນຕາມເສັ້ນທາງການພັດທະນາສັນຕິພາບຢ່າງເດັດດ່ຽວໜຽວແໜ້ນໂດຍຕະຫຼອດ, ປະຕິບັດນະໂຍບາຍປ້ອງກັນປະເທດທີ່ມີລັກສະນະປ້ອງກັນໂດຍຕະຫຼອດ,ເປັນກຳລັງອັນໝັ້ນແກ່ນໃນການປົກປັກຮັກສາສັນຕິພາບຂອງໂລກແລະສະເຖຍລະພາບຂອງພາກພື້ນໂດຍຕະຫຼອດ.