ຕາມຂ່າວCRI: ວັນທີ 3 ກັນຍານີ້, ງານໂຮມຊຸມນຸມໃຫຍ່ລະນຶກວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟາຊິດຂອງໂລກໄດ້ຈັດຂຶ້ນຢູ່ນະຄອນຫຼວງປັກກິ່ງຂອງຈີນຢ່າງຄຶກຄື້ນ. ທ່ານວະລາດີເມຍ ປູຕິນ, ປະທານາທິບໍດີຣັດເຊຍ; ທ່ານນາງປັກກຸນເຮ, ປະທານາທິບໍດີ ສ.ເກົາຫຼີ; ທ່ານໂນໂຣໂດມ ສີຫາໂມນີ, ເຈົ້າຊີວິດຂອງກຳປູເຈຍແລະຜູ້ນຳຕ່າງປະເທດທ່ານອື່ນໆທັງໝົດ 20 ກວ່າທ່ານ, ຜູ້ຕາງໜ້າລະດັບສູງຈາກລັດຖະບານຂອງ 19 ປະເທດເຊັ່ນ: ອົສຕຣາລີແລະເບຼຊິນເປັນຕົ້ນ, ກໍ່ຄືທ່ານບັນກີມູນ, ເລຂາທິການໃຫຍ່ອົງການສະຫະປະຊາຊາດ, ທ່ານນາງມະກາເຣັດ ຊານຟຸງຟູຊຸນ, ຜູ້ອຳນວຍການໃຫຍ່ອົງການອະນາໄມໂລກຫຼື WHO ແລະຜູ້ຮັບຜິດຊອບຂອງອົງການຈັດຕັ້ງສາກົນອື່ນໆລ້ວນແຕ່ໄດ້ເຂົ້າຮ່ວມງານໂຮມຊຸມນຸມໃຫຍ່ລະນຶກດັ່ງກ່າວ.
ວິທະຍຸສາກົນແຫ່ງປະເທດຈີນຫຼື CRI ໄດ້ໃຫ້ບໍລິການດ້ານການບັນລະຍາຍພິທີສວນສະໜາມໃຫ້ແກ່ບຸກຄົນສຳຄັນທາງການເມືອງຈາກຕ່າງປະເທດທັງໝົດແລະແຂກຜູ້ມີກຽດຕ່າງປະເທດ 5.000 ກວ່າທ່ານທີ່ໄປເຂົ້າຮ່ວມກອງປະຊຸມໃຫຍ່ລະນຶກທີ 3 ກັນຍານີ້ດ້ວຍ 16 ພາສາຄື: ພາສາອັງກິດ, ພາສາຣັດເຊຍ, ພາສາລາວ, ພາສາຫວຽດນາມ, ພາສາອີຕາລີ,ພາສາໂປໂລຍແລະອື່ນໆ.
ພາຍຫຼັງສິ້ນສຸດພິທີລະນຶກດັ່ງກ່າວແລ້ວ, ຜູ້ຮັບຜິດຊອບກົມພິທີການຂອງກະຊວງການຕ່າງປະເທດຈີນທີ່ຮັບຜິດຊອບການບັນລະຍາຍພິທີລະນຶກກ່າວວ່າ: ການທີ່ສາມາດສຳເລັດໜ້າທີ່ບັນລະຍາຍທີ່ມີຄວາມຮັບຜິດຊອບສູງ, ມີຫຼາຍພາສາແລະຄວາມໜັກໜ່ວງແບບນີ້ພາຍໃນໄລຍະເວລາສັ້ນໆແນວນີ້, ໄດ້ສະແດງໃຫ້ເຫັນຄຸນສົມບັດທາງດ້ານວິຊາການແລະລະດັບພາສາທີ່ແນ່ນອນຂອງພະນັກງານແປພາສາຕ່າງປະເທດຂອງ CRI ຢ່າງເຕັມສ່ວນ, ກໍ່ຄືການສະສົມທາງດ້ານຊັບພະຍາກອນມະນຸດອັນເປັນມູນເຊື້ອແລະກຳລັງຕົວຈິງໂດຍລວມທີ່ເຂັ້ມແຂງຂອງ CRI.