ຕາມຂ່າວCRI: ໂດຍແນໃສ່ຕໍ່ຖະແຫຼງການຂອງໂຄສົກກະຊວງປ້ອງກັນປະເທດຟີລິບປິນທີ່ອອກໃນຫວ່າງມໍ່ໆມານີ້ທີ່ວ່າລັດຖະບານຈີນຄວນຢຸດຕິກ່າວຄຳເວົ້າທີ່ມີລັກສະນະຫຼອກລວງທີ່ວ່າຈະສຸມໃສ່ທຳຄວາມພະຍາຍາມເພື່ອສັນຕິພາບ, ແລະຄວນສະແດງຄວາມຈິງໃຈຂອງຕົນ, ທ່ານຫົງເຫຼີຍ, ໂຄສົກກະຊວງການຕ່າງປະເທດຈີນກ່າວຢູ່ປັກກິ່ງໃນວັນທີ 7 ກັນຍານີ້ວ່າ: ຄຳເວົ້າທີ່ກ່ຽວຂ້ອງຂອງຝ່າຍຟີລິບປິນບໍ່ເອົາຫົວຊານຳຄວາມຕັດສິນໃຈແລະຄຳໝັ້ນສັນຍາຂອງຈີນ.
ວັນທີ 6 ກັນຍານີ້, ໂຄສົກກະຊວງປ້ອງກັນປະເທດຟີລິບປິນໄດ້ອອກຖະແຫຼງການໂດຍກ່າວວ່າ: ກະຊວງປ້ອງກັນປະເທດຟີລິບປິນສະແດງຄວາມຊົມເຊີຍຕໍ່ຄຳໝັ້ນສັນຍາຂອງຜູ້ນຳຈີນໃນຫວ່າງມໍ່ໆມານີ້ທີ່ວ່າຈະສຸມໃສ່ ສັນຕິພາບ, ແຕ່ເປັນຫຍັງຝ່າຍຈີນຈຶ່ງສະແດງອາວຸດທີ່ມີລັກສະນະບຸກໂຈມຕີ? ລັດຖະບານຈີນຄວນຢຸດຕິກ່າວຄຳເວົ້າທີ່ມີລັກສະນະຫຼອກລວງທີ່ວ່າຈະສຸມໃສ່ການທຳຄວາມພະຍາຍາມເພື່ອສັນຕິພາບ, ແລະຄວນສະແດງຄວາມຈິງໃຈຂອງຕົນ. ກ່ຽວກັບເລື່ອງນີ້, ທ່ານຫົງເຫຼີຍກ່າວໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນໂດຍໄດ້ຊີ້ອອກວ່າ: "ຈີນຈັດກິດຈະກຳລະນຶກວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟາຊິດຂອງໂລກ, ໄດ້ປະກາດຈະຫຼຸດຈຳນວນທະຫານໃຫ້ໜ້ອຍລົງ 3 ແສນຄົນ, ນີ້ໄດ້ສະແດງໃຫ້ເຫັນເຖິງຄວາມຈິງໃຈຂອງຈີນທີ່ສະແຫວງຫາສັນຕິພາບ, ແລະກໍ່ໄດ້ສະແດງໃຫ້ເຫັນເຖິງຄວາມຕັດສິນໃຈແລະມານະຈິດຂອງຈີນໃນການປົກປັກຮັກສາສັນຕິພາບ. ປະຊາຄົມໂລກໄດ້ຕີລາຄາສູງ, ແລະສະແດງຄວາມຍ້ອງຍໍຕໍ່ຈີນໃນຖານະເປັນສະໜາມຮົບຕົ້ນຕໍຢູ່ພາກຕາເວັນອອກໄດ້ມີການເສຍສະຫຼະອັນມະຫາສານເພື່ອໄຊຊະນະຂອງສົງຄາມຕໍ່ຕ້ານຟາຊິດຂອງໂລກແລະມີທ່າທີອັນເດັດດ່ຽວໜຽວແໜ້ນໃນການປົກປັກຮັກສາສັນຕິພາບຂອງໂລກ. ຄຳເວົ້າທີ່ກ່ຽວຂ້ອງຂອງຝ່າຍຟີລິບປິນບໍ່ເອົາຫົວຊານຳຄວາມຕັດສິນໃຈແລະຄຳໝັ້ນສັນຍາຂອງຈີນ, ປີ້ນດຳເປັນຂາວ,ຫຼອກຫູລວງຕາ,ບໍ່ເປັນໜ້າກ່າວວິຈານເລີຍ."
 |
