ຫວ່າງມໍ່ມານີ້, ໃນເວລາໃຫ້ສຳພາດຕໍ່ນັກຂ່າວ, ບຸກຄົນຕ່່າງປະເທດຈຳນວນໜຶ່ງເຫັນວ່າ, ຄຳປາໄສທີ່ສຳຄັນຂອງທ່ານສີຈິນຜິງ ປະທານປະເທດຈີນ ທີ່ກ່າວໃນກິດຈະກຳລະນຶກວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນແລະສົງຄາມຕໍ່ຕ້ານຟາຊິດໂລກ, ໄດ້ສົ່ງສັນຍານອັນຈະແຈ້ງໃຫ້ແກ່ໂລກ, ກໍ່ຄື: ປະຊາຊົນຈີນທະນຸຖະໜອມແລະຮັກຫອມສັນຕິພາບ, ຈະຖືປະຫວັດສາດເປັນແຫ່ວນແຍງ, ເດັດດ່ຽວປົກປັກຮັກສາສັນຕິພາບໂລກ, ແລະຊຸກຍູ້ໃຫ້ປະເທດຕ່າງໆມີການພັດທະນາຮ່ວມກັນ.
ທ່ານສູນທອນ ຄັນທະວົງ, ຜູ້ອຳນວຍການສຳນັກຂ່າວສານປະເທດລາວກ່າວວ່າ: ໃນຄຳປາໄສ, ທ່ານສີຈິ້ນຜິງ, ປະທານປະເທດຈີນ ໄດ້ສະແດງໃຫ້ເຫັນເຖິງຄຳໝັ້ນສັນຍາແຫ່ງການພັດທະນາໂດຍສັນຕິຂອງຈີນຕໍ່ທົ່ວໂລກ. ບັນດາປະເທດຄວນຄຽງບ່າຄຽງໄຫຼ່ເຊິ່ງກັນແລະກັນເພື່ອການພັດທະນາຮ່ວມກັນ. ຈີນໄດ້ວາງນະໂຍບາຍ "ໜຶ່ງແລວທາງໜຶ່ງເສັ້ນທາງ", ດຳເນີນການຮ່ວມມືຢ່າງຮອບດ້ານແລະສະແຫວງຫາຄວາມຈະເລນຮຸ່ງເຮືອງຮ່ວມກັບປະເທດອື່ນໆ, ເຊິ່ງກໍຈະສ້າງຜົນປະ ໂຫຍດແກ່ສາຍພົວພັນລະຫວ່າງລາວ-ຈີນເຊັ່ນກັນ.
ທ່ານຊາຣັດ ໂຟນເຊກາ, ຈອມພົນກອງທັບບົກ, ຜູ້ນຳພັກປະຊາທິປະໄຕສີລັງກາກ່າວວ່າ: ຈີນຈັດກິດຈະກຳລະນຶກໃນຄັ້ງນີ້, ໄດ້ເປັນການສ້າງໂອກາດໃຫ້ແກ່ທົ່ວໂລກໃນການຈົດຈຳປະຫວັດສາດແລະທະນຸຖະໜອມສັນຕິພາບ. ທ່ານສີຈິ້ນຜິງ, ປະທານປະເທດຈີນ ປະກາດຫຼຸດກຳລັງທະຫານຈຳນວນ 3 ແສນຄົນ, ເຊິ່ງເປັນມາດຕະການທີ່ແທ້ຈິງເພື່ອສົ່ງສັນຍານຕໍ່ໂລກອີກຄັ້ງໜຶ່ງທີ່ບໍ່ສະແຫວງຫາເປັນເຈົ້າມະຫາອຳນາດແລະບໍ່ຂະຫຍາຍອານາເຂດຂອງປະເທດຕົນ.
ທ່ານເຊນ ມາສາຕາກະ, ອາຈານຂອງມະຫາວິທະຍາໄລແຫ່ງຊາດສິໂຈໂອກະຍິ່ປຸ່ນກ່າວວ່າ: ປະຊາຊົນໃນໂລກສ່ວນຫຼາຍມີສະຕິປັນຍາໃນການຖອດຖອນບົດຮຽນຈາກປະຫວັດສາດ. ຜ່ານການຊົມກິດຈຳກຳລະນຶກຄັ້ງນີ້ແລະອ່ານຄຳປາໄສຂອງທ່ານສີຈິ້ນຜິງແລ້ວ, ຂ້າພະເຈົ້າຍິ່ງມີຄວາມຕັດສິນໃຈອັນເດັດດ່ຽວກວ່າເກົ່າໃນການຕ້ານການດັດແກ້ປະຫວັດສາດແລະປະກອບສ່ວນເພື່ອສັນຕິພາບຂອງໂລກແລະໄມຕີຈິດມິດຕະພາບລະຫວ່າງຍິ່ປຸ່ນ-ຈີນ.
 |
