ກ່ຽວກັບທ່ານບັນກີມຸນ ເລຂາທິການໃຫຍ່ອົງການສະຫະປະຊາຊາດໄດ້ເຂົ້າຮ່ວມກິດຈະກຳລະນຶກ 3 ກັນຍາທີ່ຈັດຂຶ້ນຢູ່ນະຄອນຫຼວງປັກກິ່ງ, ທ່ານຊູກາ ໂຢຊີຮີເດະ, ເລຂາທິການລັດຖະບານຍີ່ປຸ່ນກ່າວວ່າ, ອົງການສະຫະປະຊາຊາດຄວນຮັກສາຄວາມເປັນກາງ, ບໍ່ຄວນສຸມໃສ່ເຫດການພິເສດໃນອະດີດຫຼາຍເກີນໄປ. ພະແນກປະສົມການຕ່າງປະເທດແລະເສດຖະກິດຂອງພັກເສລີປະຊາທິປະໄຕຍີ່ປຸ່ນ ກໍໄດ້ໄຂກອງປະຊຸມ, ໂດຍໄດ້ຕົກລົງຈະສະເໜີສານປະທ້ວງຕໍ່ອົງການສະຫະປະຊາຊາດ. ຕໍ່ເລື່ອງນີ້, ທ່ານຮົງເຫຼີຍ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຂ່າວທີ່ຈັດຂຶ້ນເມື່ອວັນທີ 7 ກັນຍານີ້, ໂດຍເລັ່ງທວງໃຫ້ບາງປະເທດຢ່າກໍ່ເລື່ອງຢ່າງບໍ່ມີເຫດຜົນອີກ. ທ່ານກ່າວວ່າ: "ໃນບັນຫາຄືການລະນຶກໄຊຊະນະແຫ່ງການເອົາຊະນະລັດທິຟາຊິດແບບນີ້, ອົງການສະຫະປະຊາຊາດ ຈະຮັກສາຄວາມເປັນກາງແນວໃດ? ໃນບັນຫາທີ່ພົວພັນເຖິງຄວາມເປັນທຳແລະສັນຕິພາບຂອງມວນມະນຸດ, ອົງການສະຫະປະຊາຊາດຈະຮັກສາຄວາມເປັນກາງແນວໃດ? ພວກຂ້າພະເຈົ້າເຕືອນໃຫ້ບາງປະເທດຢ່າກໍ່ເລື່ອງຢ່າງບໍ່ມີເຫດຜົນອີກ. ຖ້າມີເວລາແລະກຳລັງວັງຊາຄືແນວນີ້, ຄັນຊັ້ນ ກໍຄວນໄປອ່ານກົດບັດສະຫະປະຊາຊາດໃຫ້ດີ, ທົບທວນຄືນປະຫວັດການຮຸກຮານຢ່າງເລິກເຊິ່ງ, ພະຍາຍາມໃຫ້ໄດ້ຮັບຄວາມໄວ້ເນື້ອເຊື່ອໃຈຈາກປະເທດອ້ອມຂ້າງໃນອາຊີແລະປະຊາຄົມໂລກ."
ທ່ານຮົງເຫຼີຍກ່າວຕື່ມວ່າ, ກິດຈະກຳລະນຶກວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນ ແລະສົງຄາມຕ້ານຟາຊິດຂອງໂລກ ທີ່ຈັດຂຶ້ນຢູ່ນະຄອນຫຼວງປັກກິ່ງເມື່ອວັນທີ 3 ກັນຍານີ້ ໄດ້ສະແດງໃຫ້ເຫັນເຖິງຄວາມຕັດສິນໃຈຂອງປະຊາຊົນຈີນໃນການຈົດຈຳປະຫວັດສາດ, ລະນຶກແລະອາໄລຫາຜູ້ເສຍສະຫຼະຊີວິດໃນເມື່ອກ່ອນ, ທະນຸຖະໜອມສັນຕິພາບ ແລະສ້າງອະນາຄົດທີ່ສະຫວ່າງສະໄຫວ, ນີ້ກໍແມ່ນຈິດໃຈທີ່ສຳຄັນຂອງກົດບັດສະຫະປະຊາຊາດ. ທ່ານເລຂາທິການໃຫຍ່ບັນກີມຸນ ເຂົ້າຮ່ວມກິດຈະກຳລະນຶກໃນຄັ້ງນີ້ໃນນາມເປັນຜູ້ຕາງໜ້າອົງການສະຫະປະຊາຊາດນັ້ນ ແມ່ນເລື່ອງທີ່ສົມເຫດສົມຜົນ. ທ່ານພ້ອມກັບຜູ້ນຳຕ່າງປະເທດ, ຜູ້ຕາງໜ້າຊັ້ນສູງ, ຜູ້ຮັບຜິດຊອບຂອງອົງການຈັດຕັ້ງສາກົນ ແລະອະດີດບຸກຄົນສຳຄັນດ້ານການເມືອງອີກ 65 ທ່ານ ໄດ້ຮັບຄວາມຍິນດີຕ້ອນຮັບຈາກປະຊາຊົນຈີນ.