ສຳນັກຂ່າວສານຈີນລາຍງານວ່າ: ກະຊວງການຕ່າງປະເທດຈີນໄດ້ຈັດກອງປະຊຸມຂ່າວຕາມປົກກະຕິໃນວັນທີ 7 ກັນຍານີ້. ທ່ານຫົງເຫຼີຍ ໂຄສົກກະຊວງການຕ່າງປະເທດຈີນກ່າວວ່າ: ກິດຈະກຳລະນຶກ "3 ກັນຍາ"ມີລັກສະນະຕົວແທນຢ່າງກວ້າງຂວາງ. ຈີນຍິ່ງມີຄວາມເຂັ້ມແຂງຫຼາຍເທົ່າໃດ, ກຳລັງແຫ່ງປົກປັກຮັກສາສັນຕິພາບຂອງໂລກກໍຍິ່ງຈະເຕີບໃຫຍ່ຂະຫຍາຍຕົວຫຼາຍເທົ່ານັ້ນ.
ທ່ານຫົງເຫຼີຍກ່າວວ່າ: ຈີນຈັດກິດຈະກຳລະນຶກ "3 ກັນຍາ"ແມ່ນມີຈຸດປະສົງເພື່ອປົກປັກຮັກສາຄວາມເປັນທຳໃນປະຫວັດສາດ, ລະນຶກນັກປະຕິວັດວິລະຊົນຜູ້ເສຍສະຫຼະ, ຖະນຸຖະໜອມສັນຕິພາບຂອງໂລກ, ສ້າງອະນາຄົດທີ່ດີງາມ. ໃນຄຳປາໄສຂອງທ່ານປະທານສີຈິ້ນຜິງທີ່ກ່າວຢູ່ໃນພິທີລະນຶກ "3 ກັນຍາ"ນັ້ນໄດ້ກ່າວເຖິງຄຳວ່າ "ສັນຕິພາບ" 18 ເທື່ອ ແລະໄດ້ປະກາດຢ່າງໜັກແໜ້ນວ່າຈີນຈະຫຼຸດກຳລັງທະຫານຈຳນວນ 3 ແສນຄົນ. ສັນຕິພາບແມ່ນສິ່ງທີ່ໄດ້ມາບໍ່ແມ່ນເລື່ອງງ່າຍ, ຄວນຖະນຸຖະໜອມສັນຕິພາບແລະຕ້ອງປົກປ້ອງສັນຕິພາບ. ຈີນຍິ່ງມີຄວາມເຂັ້ມແຂງຫຼາຍເທົ່າໃດ, ກຳລັງແຫ່ງການປົກປັກຮັກສາສັນຕິພາບກໍຍິ່ງຈະເຕີບໃຫຍ່ຂະຫຍາຍຕົວຫຼາຍເທົ່ານັ້ນ.
ທ່ານຫົງເຫຼີຍກ່າວຕື່ມອີກວ່າ: ບຸກຄົນສຳຄັນທາງການເມືອງຕ່າງປະເທດທີ່ໄດ້ເຂົ້າຮ່ວມກິດຈະກຳໃນຄັ້ງນີ້ກຊໄດ້ຕີລາຄາສູງແລະຢືນຢັນຕໍ່ກິດຈະກຳລະນຶກ. ປະຊາຊົນບັນດາປະເທດຄວນສາມັກຄີແລະຮ່ວມມືກັນ, ພ້ອມກັນປົກປັກຮັກສາຄວາມທ່ຽງທຳແລະຄວາມເປັນທຳໃນສາກົນແລະສັນຕິພາບຂອງໂລກ. ແຂກຜູ້ມີກຽດຕ່າງປະເທດທີ່ເຂົ້າຮ່ວມກິດຈະກຳແມ່ນມາຈາກບັນດາທະວີບໃນທົ່ວໂລກ ເຊິ່ງມີລັກສະນະຕົວແທນຢ່າງກວ້າງຂວາງ.
 |
