ສຳນັກຂ່າວສານຈີນລາຍງານວ່າ: ວັນທີ 6 ກັນຍານີ້, ໂຄສົກກະຊວງປ້ອງກັນປະເທດຟີລິບປິນໄດ້ອອກຖະແຫຼງການໂດຍໄດ້ກ່າວວ່າ: ກະ ຊວງປ້ອງກັນປະເທດຟີລິບປິນຊົມເຊີຍຜູ້ນຳຈີນທີ່ໄດ້ປະກາດຄຳໝັ້ນສັນຍາໃນເມື່ອບໍ່ດົນມານີ້ວ່າຈະສຸມກຳລັງເຂົ້າໃນການຮັກສາສັນຕິພາບ, ແຕ່ເປັນຫຍັງຈີນໄດ້ສະແດງອາວຸດລັກສະນະແບບບຸກໂຈມຕີ, ລັດຖະບານຈີນຄວນຢຸດຕິການກ່າວຖ້ອຍຄຳແບບຫຼອກລວງທີ່ວ່າຈະສຸມໃສ່ການທຳຄວາມພະຍາຍາມເພື່ອສັນຕິພາບແລະຄວນສະແດງຄວາມຈິງໃຈ.
ຢູ່ທີ່ກອງປະຊຸມຂ່າວທີ່ກະຊວງການຕ່າງປະເທດຈີນຈັດຂຶ້ນຕາມປົກກະຕິໃນວັນທີ 7 ກັນຍານີ້, ທ່ານຫົງເຫຼີຍ ໂຄສົກກະຊວງການຕ່າງປະເທດຈີນກ່າວວ່າ: ຖ້ອຍຄຳຂອງຝ່າຍຟີລິບປິນບໍ່ໄດ້ພິຈາລະນາເຖິງຄວາມຕັດສິນໃຈແລະຄຳໝັ້ນສັນຍາຂອງຈີນ, ເປັນຖ້ອຍຄຳທີ່ປີ້ນຂາວເປັນດຳ, ບິດເບືອນຄວາມເປັນຈິງ, ສະນັ້ນມັນບໍ່ເປັນຕາທີ່ຈະໃຫ້ຄຳວິຈານ.
ທ່ານຫົງເຫຼີຍກ່າວວ່າ, ຈີນຈັດກິດຈະກຳລະນຶກວັນຄົບຮອບ 70 ປີແຫ່ງໄຊຊະນະສົງຄາມຕໍ່ຕ້ານຟາຊິດຍີ່ປຸ່ນຂອງປະຊາຊົນແລະສົງຄາມຕໍ່ຕ້ານຟາຊິດຂອງໂລກ, ແລະປະກາດຈະຫຼຸດກຳລັງທະຫານຈຳນວນ 3 ແສນຄົນ, ອັນໄດ້ສະແດງໃຫ້ເຫັນເຖິງຄວາມຈິງໃຈໃນການປົກປັກຮັກສາສັນຕິພາບ. ປະຊາຄົມໂລກໄດ້ຕີລາຄາສູງຕໍ່ກັບເລື່ອງນີ້ ແລະຍ້ອງຍໍຊົມເຊີຍຕໍ່ຈີນທີ່ໄດ້ມີການເສຍສະຫຼະຢ່າງໃຫຍ່ຫຼວງເພື່ອຍາດເອົາໄຊຊະນະແຫ່ງສົງຄາມຕໍ່ຕ້ານຟາຊິດຂອງໂລກໃນຖານະທີ່ເປັນສະໜາມຮົບຫຼັກຂອງພາກຕາເວັນອອກແລະຍ້ອງຍໍຊົມເຊີຍຕໍ່ຈີນທີ່ມີທ່າທີອັນເດັດດ່ຽວໃນການປົກປ້ອງສັນຕິພາບຂອງໂລກ.