ຕາມຂ່າວສານຊິນຮວາ: ເນື່ອງໃນໂອກາດວັນຄົບຮອບ 70 ປີແຫ່ງໄຊຊະນະຂອງສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນ ແລະ ສົງຄາມຕ້ານຟາຊິດຂອງໂລກ, ສະມາຄົມຫໍພິພິດທະພັນສົງຄາມໂລກຄັ້ງທີ 2 ສາກົນ ເຊິ່ງແມ່ນຫໍລະນຶກສົງຄາມປະຊາຊົນຈີນຕ້ານການຮຸກຮານຂອງຍີ່ປຸ່ນ ກັບຫໍພິພິດທະພັນອື່ນໆ ຮ່ວມກັນລິເລີ່ມ ແລະ ກະກຽມນັ້ນ ໄດ້ຮັບການສ້າງຕັ້ງຂຶ້ນຢ່າງເປັນທາງການຢູ່ນະຄອນຫຼວງປັກກິ່ງເມື່ອວັນທີ 7 ກັນຍານີ້.
ສະມາຄົມຫໍພິພິດທະພັນສົງຄາມໂລກຄັ້ງທີ 2 ສາກົນ ມີຈຸດປະສົງເພື່ອສ້າງເວທີແຫ່ງການແລກປ່ຽນແລະຮ່ວມມືກັນລະຫວ່າງຫໍພິພິດທະພັນສົງຄາມໂລກຄັ້ງທີ 2 ສອງແຫ່ງຕ່າງໆໃນໂລກ, ໃນຂະນະທີ່ຍົກລະດັບຂອງການແລກປ່ຽນລະຫວ່າງຫໍພິພິດທະພັນສົງຄາມໂລກຄັ້ງທີ 2 ແລະນັກວິຊາການໃຫ້ສູງຂຶ້ນນັ້ນ, ຍັງຈະໄດ້ດຳເນີນການຮ່ວມກັນຄົ້ນຄວ້າ, ອະທິບາຍ ແລະວາງສະແດງກ່ຽວກັບປະຫວັດສາດຂອງສົງຄາມໂລກຄັ້ງທີ 2, ແລະດຳເນີນການສຶກສາດ້ານສັນຕິພາບ.
ປັດຈຸບັນ ໄດ້ມີຫໍພິພິດທະພັນ 35 ແຫ່ງໃນ 11 ປະເທດຄື: ຈີນ, ຣັດເຊຍ, ອາເມລິກາ, ສ.ເກົາຫຼີ, ອີຕາລີ, ເບລາຣຸດຊີ, ຍີ່ປຸ່ນ, ອູແກຣນ, ເບຣຊິນ, ມາເລເຊຍ ແລະສະໂລວາກີ ຢືນຢັນຢ່າງເປັນທາງການວ່າຈະເຂົ້າຮ່ວມສະມາຄົມດັ່ງກ່າວ, ໃນນັ້ນ, ລວມທັງຫໍລະນຶກສົງຄາມປະຊາຊົນຈີນຕໍ່ຕ້ານການຮຸກຮານຂອງຍີ່ປຸ່ນ, ຫໍລະນຶກສົງຄາມປ້ອງກັນຊາດຣັດເຊຍ, ຫໍລະນຶກເອກະລາດສ.ເກົາຫຼີ, ຫໍລະນຶກພີ່ນ້ອງຮ່ວມຊາດທີ່ຖືກທະຫານຍີ່ປຸ່ນຜູ້ຮຸກຮານຈີນສັງຫານໝູ່ຢູ່ເມືອງນານກິ່ງ ແລະອື່ນໆ.