ຕາມຂ່າວ CRI ລາຍງານວ່າ: ງານດົນຕີລະນຶກວັນຄົບຮອບ 70 ປີແຫ່ງໄຊຊະນະສົງຄາມຕໍ່ຕ້ານຟາຊິດຍີ່ປຸ່ນຂອງປະຊາຊົນຈີນແລະສົງຄາມຕໍ່ຕ້ານຟາຊິດຂອງໂລກໄດ້ຈັດຂຶ້ນໃນຕອນຄ່ຳວັນທີ 16 ກັນຍານີ້ທີ່ສູນສິລະປະບາບີແຄນ (Barbican Centre)ລອນດອນຂອງອັງກິດ, ທ່ານນາງຫຼິວຢຽນຕົ່ງ ຮອງນາຍົກລັດຖະມົນຕີຈີນທີ່ກຳລັງດຳເນີນການຢ້ຽມຢາມອັງກິດໄດ້ໃຫ້ກຽດກ່າວຄຳປາໄສໃນງານດົນຕີດັ່ງກ່າວ.
ໂອກາດກ່າວຄຳປາໄສ, ທ່ານນາງຫຼິວຢຽນຕົ່ງກ່າວວ່າ: ໃນເດືອນຕຸລາໜ້ານີ້, ທ່ານປະທານສີຈິ້ນຜິງຈະດຳເນີນການຢ້ຽມຢາມອັງກິດທາງລັດຖະກິດໂດຍຕອບສະໜອງຕາມຄຳເຊີນ ເຊິ່ງສອງປະເທດຈະຮ່ວມກັນເປີດ "ຍຸກຄຳ"ແຫ່ງສາຍພົວພັນຈີນ-ອັງກິດ. ການຢ້ຽມຢາມຂອງທ່ານນາງໃນຄັ້ງນີ້ແມ່ນເພື່ອເປັນການກະກຽມໃຫ້ແກ່ການຢ້ຽມຢາມອັງກິດຂອງທ່ານປະທານສີຈິ້ນຜິງ, ເພື່ອເຮັດໃຫ້ສາຍພົວພັນຄູ່ຮ່ວມຍຸດທະສາດຮອບດ້ານຈີນ-ອັງກິດມີຊີວິດຊີວາຫຼາຍຂຶ້ນ. ໃນໄລຍະດຳເນີນການຢ້ຽມຢາມຢູ່ອັງກິດໃນຄັ້ງນີ້, ທ່ານນາງຫຼິວຢຽນຕົ່ງຈະເປັນປະທານຂອງກອງປະຊຸມເທື່ອທີ 3 ຂອງກົນໄກແລກປ່ຽນວັດທະນະທຳລະດັບສູງຈີນ-ອັງກິດ2015 ແລະຍັງຈະພົບປະກັບທ່ານເດວິດ ຄາເມຣອນ ນາຍົກລັດຖະມົນຕີ, ທ່ານຟີລິບ ຮາມອນດ໌ ລັດຖະມົນຕີວ່າການກະຊວງການຕ່າງປະເທດ ແລະເຈົ້າໜ້າທີ່ລັດຖະບານອັງກິດທ່ານອື່ນໆອີກ.
ງານດົນຕີໃນຄືນວັນທີ 16 ກັນຍານີ້ແມ່ນຈັດຂຶ້ນໃນໂອກາດປີແລກປ່ຽນວັດທະນະທຳຈີນ-ອັງກິດ 2015 ພາຍໃຕ້ຫົວຂໍ້ທີ່ວ່າ "ລະນຶກ ວັນຄົບຮອບ 70 ປີແຫ່ງໄຊຊະນະສົງຄາມຕໍ່ຕ້ານຟາຊິດຍີ່ປຸ່ນຂອງປະຊາຊົນຈີນແລະສົງຄາມຕໍ່ຕ້ານຟາຊິດຂອງໂລກ", ເຊິ່ງມີນັກສິນລະປິນທັງສອງປະເທດຮ່ວມກັນສະແດງໃນງານດົນຕີດັ່ງກ່າວນີ້.