ວັນທີ 9 ຕຸລານີ້, ກອງປະຊຸມສຸດຍອດສະຫະກອນລະຫວ່າງປະເທດທີ່ລຽບຕາມ "ໜຶ່ງແລວທາງໜຶ່ງເສັ້ນທາງ" ໄດ້ໄຂຂຶ້ນຢູ່ນະຄອນຄຸນໝິງແຂວງຢຸນນານຂອງຈີນ, ໃນກອງປະຊຸມທີ່ດຳເນີນເປັນເວລາ 3 ວັນ, ຜູ້ຕາງໜ້າສະຫະກອນຈາກ 16 ປະເທດທີ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ" ເປັນຕົ້ນແມ່ນ ສ.ເກົາຫຼີ, ອິນເດຍ, ນິວຊີແລນ, ອົສຕຣາລີ, ມາເລເຊຍ, ອິນໂດເນເຊຍ, ມຽນມາແລະອື່ນໆຈະປຶກສາຫາລືກ່ຽວກັບຫົວຂໍ້ "ການຄ້າລະຫວ່າງສະຫະກອນແລະການຄ້າເອເລັກໂຕຼນິກ" ແລະອື່ນໆ, ທັງຈະຕິດຕໍ່ພົວພັນທາງວຽກງານ.
ທ່ານນາງຫວາງເຊຍ, ຫົວໜ້າສະມາຄົມສະຫະກອນໃຫຍ່ການຮ່ວມມືຈຳໜ່າຍທົ່ວປະເທດຈີນໄດ້ຮຽກຮ້ອງໃນພິທີເປີດໂດຍກ່າວວ່າ: ສະຫະກອນຂອງປະເທດທີ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ" ຄວນຊຸກຍູ້ການແລກປ່ຽນຢ່າງຮອບດ້ານ, ເພື່ອຮັບມືກັບສິ່ງທ້າທາຍຕໍ່ການພັດທະນາຢ່າງມີປະສິດທິພາບສູງ, ຊຸກຍູ້ການຮ່ວມມືແລະການພັດທະນາລະຫວ່າງປະເທດ "ໜຶ່ງແລວທາງໜຶ່ງເສັ້ນທາງ". ນາງໄດ້ເປີດເຜີຍວ່າ, ປະຈຸບັນ, ສະຫະກອນໃຫຍ່ການຮ່ວມມືຈຳໜ່າຍທົ່ວປະເທດຈີນໄດ້ເຊັນບົດບັນທຶກຄວາມເຂົ້າໃຈກັບ 30 ກວ່າປະເທດໃນທົ່ວໂລກ, ແລະເວທີການຄ້າເອເລັກໂຕຼນິກທີ່ມີການລົງທຶນທັງໝົດຈຳນວນ 300 ຕື້ຢວນກໍ່ຈະໃຫ້ການບໍລິການໃນໄວໆນີ້.
ໂອກາດກ່າວຄຳປາໄສທີ່ສຳຄັນ, ຜູ້ຕາງໜ້າຂອງປະເທດຕ່າງໆໄດ້ສຸມໃສ່ "ການຄ້າເອເລັກໂຕຼນິກ". ຫົວໜ້າສຳນັກງານເຂດອາຊີ-ປາຊິຟິກຂອງສະຫະພັນສະຫະກອນສາກົນກ່າວວ່າ: ປະຈຸບັນ, ການຄ້າເອເລັກໂຕຼນິກນັບມື້ນັບມີຄວາມສຳຄັນຍິ່ງຂຶ້ນ, ແລະມີທ່າແຮງບົ່ມຊ້ອມດ້ານການພັດທະນາຢ່າງຫຼວງຫຼາຍ. ເຊິ່ງສະຫະກອນຂອງປະເທດຕ່າງໆຄວນເສີມຂະຫຍາຍບົດບາດແນວໃດເພື່ອລົບລ້າງຄວາມຈຳກັດລະຫວ່າງປະເທດຕ່າງໆ, ແລະແບ່ງປັນຜົນປະໂຫຍດໃນການ ຄ້າເອເລັກໂຕຼນິກ, ເປັນບັນຫາທີ່ຄວນຕາພິຈາລະນາ.
 |
