ອັດກອງປະຊຸມຄົບຄະນະຄັ້ງທີ 5 ສະໄໝທີ 18 ຂອງພັກກອມມູນິດຈີນ

    ກອງປະຊຸມຄົບຄະນະຄັ້ງທີ 5 ສະໄໝທີ 18 ຂອງສູນກາງພັກກອມມູນິດຈີນ ໄດ້ອັດລົງແລ້ວຢູ່ນະຄອນຫຼວງປັກກິ່ງເມື່ອວັນທີ 29 ຕຸລານີ້.

    ກອງປະຊຸມຄັ້ງນີ້ໄດ້ຄົ້ນຄວ້າແລະຮັບຮອງ "ຂໍ້ສະເໜີຂອງສູນກາງພັກກອມມູນິດຈີນກ່ຽວກັບການຈັດວາງແຜນພັດທະນາເສດຖະກິດແລະສັງຄົມແຫ່ງຊາດ 5 ປີຄັ້ງທີ 13", ແລະໄດ້ສະເໜີທັດສະນະຄະຕິແຫ່ງການພັດທະນາແບບມີຫົວຄິດປະດິດສ້າງ, ມີຄວາມປະສານກົມກຽວກັນ, ສີຂຽວ, ເປີດປະຕູ ແລະຊົມໃຊ້ຮ່ວມກັນ, ກ່າວເນັ້ນວ່າ, ຕ້ອງຍຶດໝັ້ນການພັດທະນາເພື່ອປະຊາຊົນ ແລະໃຫ້ປະຊາຊົນຊົມໃຊ້ໝາກຜົນຂອງການພັດທະນາຮ່ວມກັນ. ໃນດ້ານນະໂຍບາຍປະຊາກອນທີ່ໄດ້ຮັບຄວາມສົນໃຈໂດຍທົ່ວໄປ, ກອງປະຊຸມຄັ້ງນີ້ໄດ້ຕົກລົງເຫັນດີປະຕິບັດນະໂຍບາຍທີ່ອະນຸຍາດໃຫ້ຜົວເມຍຄູ່ໜຶ່ງມີລູກສອງຄົນໄດ້ຢູ່ທົ່ວປະເທດຢ່າງຮອບດ້ານ.

    ບົດແຈ້ງການຂອງກອງປະຊຸມຍັງໄດ້ສະເໜີວ່າ, ຈະຍຶດໝັ້ນໃຫ້ປະຊາຊົນມີລາຍໄດ້ເພີ່ມຂຶ້ນໃນຈັງຫວະດຽວກັນກັບການເພີ່ມຂຶ້ນຂອງເສດຖະກິດ, ປະຕິບັດແຜນການປະກັນໄພຂອງທົ່ວປວງຊົນ, ບັນລຸການຈັດສັນເບ້ຍບຳນານພື້ນຖານຂອງພະນັກງານກຳມະກອນໃນທົ່ວປະເທດຢ່າງເປັນເອກະພາບກັນ, ໂອນເງິນທຶນຂອງລັດສ່ວນໜຶ່ງໄປເຂົ້າສູ່ກອງທຶນປະກັນສັງຄົມ, ປະຕິບັດລະບຽບການປະກັນໄພພະຍາດທີ່ຮ້າຍແຮງຂອງປະຊາຊົນໃນຕົວເມືອງແລະຊົນນະບົດຢ່າງຮອບດ້ານ, ລົງເລິກປະຕິຮູບໂຄງປະກອບການປີ່ນປົວພະຍາດ, ການຢາແລະສາທາລະນະສຸກ, ສ້າງລະບຽບການປິ່ນປົວພະຍາດແລະສາທາລະນະສຸກອັນພື້ນຖານທີ່ປົກຫຸ້ມຕົວເມືອງແລະຊົນນະບົດ, ສ້າງລະບຽບການຄຸ້ມຄອງໂຮງໝໍທີ່ທັນສະໄໝ ແລະອື່ນໆ.