ຕາມຂ່າວ CRI: ຫວ່າງມໍ່ໆມານີ້, ເວັບໄຊເສດຖະກິດຈີນໄດ້ເຜີຍແຜ່ບົດວິເຄາະຂອງທ່ານຈ່າງຢົງເຫວີຍ, ຮອງຫົວໜ້າສະຖາບັນຄົ້ນຄວ້າວິສາຫະກິດຂອງສູນຄົ້ນຄວ້າພັດທະນາທີ່ສັງກັດລັດຖະບານຈີນທີ່ພາດຫົວເລື່ອງວ່າ "ຄວາມໝັ້ນໃຈຂອງວິສາຫະກິດແມ່ນມາຈາກບ່ອນໃດ?"
ບົດຄວາມມີບາງຕອນໄດ້ຊີ້ອອກວ່າ, ກ່ອນອື່ນ, ການລົງທຶນຕໍ່ການປະຕິຮູບດ້ານເຕັກນິກຂອງວິສາຫະກິດອຸດສາຫະກຳໄດ້ຮັກສາຈັງຫວະເຕີບໂຕທີ່ອ່າວສູງ. ນັບແຕ່ເດືອນມັງກອນຫາເດືອນກໍລະກົດຂອງປີນີ້, ທົ່ວປະເທດໄດ້ລົງທຶນຕໍ່ການປະຕິຮູບເນັກນິກອຸດສາຫະກຳບັນລຸເຖິງ 4227,6 ຕື້ຢວນ, ເພີ່ມຂຶ້ນ 12,9% ເມື່ອທຽບໃສ່ປີກາຍນີ້, ການລົງທຶນຕໍ່ການປະຕິຮູບເນັກນິກອຸດສາຫະກຳໄດ້ກວມ 36,2% ຂອງການລົງທຶນຕໍ່ຂະແໜງການອຸດສາຫະກຳທັງໝົດ. ການລົງທຶນຕໍ່ເຕັກນິກກໍ່ຄືການລົງທຶນຕໍ່ອະນາຄົດ, ສ່ວນການລົງທຶນຕໍ່ການປະຕິຮູບເຕັກນິກມີການເພີ່ມຂຶ້ນນັ້ນແມ່ນປາກົດການທີ່ສຳຄັນທີ່ສຸດຂອງວິສາຫະກິດທີ່ມີຄວາມໝັ້ນໃຈ.
ສອງ, ຈຸດເດັ່ນໃນການພັດທະນາເສດຖະກິດໄດ້ເພີ່ມຂຶ້ນຢ່າງບໍ່ຢຸດຢັ້ງ, ພະລັງແຮງໃໝ່ໄດ້ເຕີບໂຕຢ່າງວ່ອງໄວ. ພະລັງແຮງໃໝ່ໄດ້ມີບົດບາດສຳຄັນທີ່ສຸດໃນການກະຕຸ້ນຄວາມມີຊີວິດຊີວາຂອງຕະຫຼາດ, ເມື່ອໃດຍຸດທະສາດກ່ຽວກັບການປະດິດສ້າງໃໝ່ແລະການປະກອບທຸລະກິດທົ່ວປວງຊົນໄດ້ພັດທະນາໄປສູ່ລວງເລິກຂອງເສດຖະກິດ-ສັງຄົມ, ເສດຖະກິດຈີນກໍ່ຈະເຂົ້າສູ່ສະພາບການພັດທະນາໃໝ່ຢ່າງແນ່ນອນ.
ສາມ, ວິສາຫະກິດໄດ້ມີຄວາມສຸກງອມແລະມີສະຕິຫຼາຍກວ່າເກົ່າ. ເບິ່ງຈາກຕະຫຼາດແລ້ວເຫັນວ່າ, ວິສາຫະກິດ 3 ປະເພດແມ່ນມີຄວາມໝັ້ນໃຈທີ່ສຸດຕໍ່ເສດຖະກິດ, ກໍຄື, ວິສາຫະກິດທີ່ດຳເນີນທຸລະກິດຢ່າງໝັ້ນທ່ຽງ, ວິສາຫະກິດແບບປະດິດສ້າງໃໝ່ແລະວິສາຫະກິດທີ່ໄດ້ຫັນປ່ຽນຮູບການພັດທະນາກ່ອນໝູ່.
ສີ່, ບົດບາດຂອງນະໂຍບາຍໄດ້ປາກົດຕົວເປັນກ້າວໆມາ. ການດຳເນີນວຽກງານເສດຖະກິດໃຫ້ດີມີຫຼັກການທີ່ສຳຄັນຫຼັກການໜຶ່ງກໍ່ຄືຕ້ອງຮັກສາຄວາມຕໍ່ເນື່ອງແລະບົດບາດນຳພາຂອງນະໂຍບາຍ, ທັງນີ້ແມ່ນສຳຄັນທີ່ສຸດຕໍ່ການຮັກສາຄວາມໝັ້ນທ່ຽງຂອງການຄາດຄະເນຕໍ່ຕະຫຼາດແລະຄວາມໝັ້ນໃຈຂອງວິສາຫະກິດ.
 |
