ໂດຍແນໃສ່ເລື່ອງທີ່ທ່ານຫຼີເຄີ້ສຽງ, ນາຍົກລັດຖະມົນຕີຈີນຈະເດີນທາງໄປຢ້ຽມຢາມມາເລເຊຍຢ່າງເປັນທາງການ, ທ່ານຫຼີວເຈີ້ນມິງ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນກ່າວວ່າ, ຈີນຫວັງວ່າຜ່ານການຢ້ຽມຢາມໃນຄັ້ງນີ້ ຈະລົງເລິກໄມຕີຈິດມິດຕະພາບລະຫວ່າງຈີນກັບມາເລເຊຍ, ຍົກສູງການຮ່ວມມືລະຫວ່າງສອງປະເທດໃນຂົງເຂດຕ່າງໆ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານຈີນມາເລເຊຍໃຫ້ກ້າວຂຶ້ນສູ່ລະດັບໃໝ່.
ທ່ານຫຼີວເຈີ້ນມິນກ່າວຕື່ມອີກວ່າ, ໃນໄລຍະຢ້ຽມຢາມດັ່ງກ່າວ, ທ່ານຫຼີເຄີ້ສຽງຈະເຂົ້າຮ່ວມພິທີຕ້ອນຮັບ ແລະງານລ້ຽງຮັບຮອງຂອງທ່ານນາຈິບ ຕູນ ຣາຊັກ, ນາຍົກລັດຖະມົນຕີມາເລເຊຍ, ພົບປະເຈລະຈາກັບທ່ານນາຈິບ ເພື່ອແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບການພົວພັນສອງປະເທດ ແລະການຮ່ວມມືໃນຂົງເຂດຕ່າງໆ, ວາງແຜນໃຫ້ແກ່ການພົວພັນຈີນມາເລເຊຍໃນອະນາຄົດ. ທ່ານຫຼີເຄີ້ສຽງ ແລະທ່ານນາຈິບຈະຮ່ວມກັນເປັນສັກຂີພິຍານໃຫ້ແກ່ການເຊັນສັນຍາການຮ່ວມມືສະບັບຕ່າງໆໃນດ້ານເສດຖະກິດການຄ້າ, ວັດທະນະທໍາ ແລະອື່ນໆ. ນອກນີ້, ທ່ານຫຼີເຄີ້ສຽງຍັງຈະພົບປະກັບບຸກຄົນວົງການຕ່າງໆຂອງມາເລເຊຍຕື່ມອີກ.
