ວັນທີ 18 ພະຈິກນີ້, ທ່ານສີຈິ້ນຜິງ, ປະທານປະເທດຈີນໄດ້ເຂົ້າຮ່ວມກອງປະຊຸມສຸດຍອດຂອງຜູ້ນຳອຸດສາຫະກຳແລະການຄ້າຂອງອົງການຮ່ວມມືດ້ານເສດຖະກິດອາຊີປາຊິຟິກຫຼື APEC, ທັງໄດ້ກ່າວປາຖະກະຖາທີ່ມີຫົວຂໍ້ສະເພາະ. ໃນການກ່າວປາຖະກະຖາ, ທ່ານສີຈິ້ນຜິງໄດ້ກ່າວເນັ້ນເຖິງ "ແຜນການ 5 ປີ ຄັ້ງທີ 13" ຂອງຈີນ.
ທ່ານສີຈິ້ນຜິງກ່າວວ່າ, ຫວ່າງບໍ່ດົນມານີ້, ກອງປະຊຸມຄົບຄະນະຂອງຄະນະກຳມະການສູນກາງພັກກອມມູນິດຈີນຄັ້ງທີ 5 ສະໄໝທີ 18 ໄດ້ຮັບຮອງຂໍ້ສະເໜີ "ແຜນການ 5 ປີ ຄັ້ງທີ 13", ໂດຍໄດ້ສະເໜີທັດສະນະຄະຕິດ້ານການພັດທະນາແບບປະດິດສ້າງໃໝ່, ກົມກຽວກັນ, ສີຂຽວ, ເປີດກວ້າງແລະຊົມໃຊ້ຮ່ວມກັນ, ທັງໄດ້ສະເໜີມາດຕະການກ່ຽວກັບການປະຕິຮູບທີ່ສຳຄັນຕ່າງໆຂອງການພັດທະນາເສດຖະກິດ-ສັງຄົມຂອງຈີນໃນໄລຍະ "ແຜນການ 5 ປີ ຄັ້ງທີ 13". ໄລຍະ "ແຜນການ 5 ປີຄັ້ງທີ 13" ແມ່ນໄລຍະຕັດສິນຂອງການສ້າງສາສັງຄົມອີ່ມໝຳສຳລານຢ່າງຮອບດ້ານຂອງຈີນ. ຈີນຈະເລັ່ງລັດການປະຕິຮູບແລະການປະດິດສ້າງໃໝ່, ເລັ່ງລັດການຫັນປ່ຽນຮູບການແລະການປັບປຸງໂຄງປະກອບໃນການພັດທະນາເສດຖະກິດ, ສຸມໃສ່ແກ້ໄຂບັນຫາທີ່ຫຍຸ້ງຍາກໃນຂະບວນການພັດທະນາ, ອົບຮົມບົ່ມສ້າງພະລັງແຮງໃໝ່ແຫ່ງການພັດທະນາ, ເພື່ອສ້າງທ່າແຮງໃໝ່ແລະໂອກາດໃໝ່ໃນການພັດທະນາ.
ທ່ານສີຈິ້ນຜິງກ່າວເນັ້ນວ່າ, ຈີນຈະໃຫ້ຄວາມສຳຄັນຢ່າງຍິ່ງຕໍ່ປະສິດທິຜົນແລະຄຸນນະພາບ, ຈະສຸມໃສ່ຫັນປ່ຽນຮູບການພັດທະນາເສດຖະກິດ; ຈະໃຫ້ຄວາມສຳຄັນຢ່າງຍິ່ງຕໍ່ການຊຸກຍູ້ການພັດທະນາໂດຍຜ່ານການປະດິດສ້າງໃໝ່; ຈະໃຫ້ຄວາມສຳຄັນຢ່າງຍິ່ງຕໍ່ຄວາມສະເໝີພາບແລະຄວາມຍຸດຕິທຳ, ຈະເຮັດໃຫ້ປະຊາຊົນຢູ່ຊົນນະບົດຜູ້ທຸກຍາກຕາມມາດຕະຖານໃນປະຈຸບັນຂອງຈີນຈຳນວນ 70 ລ້ານຄົນສາມາດຫຼຸດພົ້ນອອກຈາກຄວາມທຸກຍາກແລະເຮັດໃຫ້ເມືອງທີ່ທຸກຍາກທັງໝົດສາມາດຫຼຸດພົ້ນອອກຈາກຄວາມທຸກຍາກໃນ 5 ປີຂ້າງໜ້ານີ້; ຈະໃຫ້ຄວາມສຳຄັນຢ່າງຍິ່ງຕໍ່ການພັດທະນາແບບສີຂຽວ; ຈະໃຫ້ຄວາມສຳຄັນຢ່າງຍິ່ງຕໍ່ການເປີດປະຕູສູ່ພາຍນອກ, ເລັ່ງລັດຊຸກຍູ້ການສ້າງເຂດການຄ້າເສລີທີ່ມີມາດຕະຖານສູງ.
 |
