ວັນທີ 17 ພະຈິກນີ້, ທ່ານຫຼີວເຈີ້ນມິນ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນກ່າວວ່າ, ທ່ານຫຼີເຄີ້ສຽງ, ນາຍົກລັດຖະມົນຕີຈີນຈະແນະນໍານະໂຍບາຍ ແລະຈຸດຢືນຂອງຈີນທີ່ມີຕໍ່ການຮ່ວມມືອາຊີຕາເວັນອອກ, ພ້ອມທັງຈະວາງຂໍ້ລິເລີ່ມໃໝ່ຕ່າງໆໃນດ້ານການຮ່ວມມືຕົວຈິງ. ຍຶດຖືການສ້າງກຸ່ມເຕີບໂຕທີ່ໝັ້ນທ່ຽງຂອງອາຊີຕາເວັນອອກເປັນເປົ້າໝາຍລວມ, ຊຸກຍູ້ການຮ່ວມມືອາຊີຕາເວັນອອກໃຫ້ກ້າວຂຶ້ນສູ່ລະດັບໃໝ່.
ທ່ານຫຼີວເຈີ້ນມິນກ່າວຕື່ມອີກວ່າ, ໃນໄລຍະຈັດກອງປະຊຸມດັັ່ງກ່າວ, ບັນດາຝ່າຍຈະສະຫຼຸບ ແລະທົບທວນຄືນຄວາມຄືບໜ້າຂອງການຮ່ວມມືອາຊີຕາເວັນອອກໃນຮອບໜຶ່ງປີຜ່ານມານີ້ ພ້ອມທັງຈະສະແດງຄວາມເຫັນ ແລະວາງຂໍ້ສະເໜີກ່ຽວກັບການພັດທະນາກົນໄກ. ນອກນີ້, ບັນດາຝ່າຍຍັງຈະແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບບັນຫາພາກພື້ນ ກໍ່ຄືສາກົນທີ່ມີຄວາມສົນໃຈຮ່ວມກັນ.
ກ່ຽວກັບກອງປະຊຸມສຸດຍອດອາຊີີຕາເວັນອອກ, ທ່ານຫຼີວເຈີ້ນມິນກ່າວວ່າ, ທ່ານຫຼີເຄີ້ສຽງຈະແນະນໍາຄວາມເຫັນຂອງຝ່າຍຈີນທີ່ມີຕໍ່ທິດທາງການພັດທະນາໃນອະນາຄົດຂອງກອງປະຊຸມສຸດຍອດດັ່ງກ່າວ, ພ້ອມທັງກ່າວເນັ້ນເຖິງການສືບຕໍ່ຍຶດໝັ້ນໃນຖານະຂອງກອງປະຊຸມສຸດຍອດດັ່ງກ່າວທີ່ເປັນເວທີປຶກສາຫາລືຍຸດທະສາດ, ສືບຕໍ່ຍຶດໝັ້ນໃນຫຼັກການນໍາພາໂດຍອາຊຽນ, ປຶກສາຫາລືກັນ, ພິຈາລະນາເຖິງທຸກຝ່າຍ ແລະຫຼັກການອື່ນໆ, ຊຸກຍູ້ໃຫ້ບັນດາຝ່າຍສືບຕໍ່ປະຕິບັດຕາມແຜນການເຄື່ອນໄຫວຂອງຖະແຫຼງການພັດທະນາທີ່ພະນົມເປັນ.
