ຕາມຂ່າວ CRI: ກ່ອນທີ່ເດີນທາງໄປເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 27 ແລະກອງປະຊຸມສຸດຍອດຕ່າງໆ, ວັນທີ 20 ພະຈິກນີ້, ທ່ານຫຼີເຄິ້ສຽງ, ນາຍົກລັດຖະມົນຕີຈີນໄດ້ຂຽນບົດຄວາມທີ່ພາດຫົວເລື່ອງວ່າ "ຈຸດໝາຍໃໝ່ແລະໃບລົມທີ່ປິວສະບັດຕາມເສັ້ງທາງເດີນເຮືອປະຫວັດສາດ" ລົງໜັງສືພິມ The Star, ໜັງສືພິມ "ຊ່ອງແຄບເທມສ໌" , ໜັງສືພິມໜານຢາງຊ່າງປ້າວ, ໜັງສຶພິມລາຍວັນຊິນໂຈແລະໜັງສືພິມລາຍວັນມາເລເຊຍຂອງມາເລເຊຍ, ໂດຍໄດ້ທົບທວນຄືນເຖິງວິວັດປະຫວັດແຫ່ງການໄປມາຫາສູ່ກັນຢ່າງມີໄມຕີຈິດມິດຕະພາບທີ່ສືບທອດກັນມາແຕ່ດົນນານລະຫວ່າງຈີນ-ມາເລເຊຍ, ພ້ອມທັງຈ້ອງມອງເບິ່ງອະນາຄົດແຫ່ງການພັດທະນາແລະຄວາມຈະເລີນຮຸ່ງເຮືອງຂອງສອງປະເທດ.
ກ່ອນນອື່ນ, ບົດຄວາມໄດ້ທົບທວນຄືນເຖິງແຫຼ່ງກຳເນີດຂອງສາຍພົວພັນລະຫວ່າງສອງປະເທດຈາກບົດບັນທຶກທາງປະຫວັດສາດທີ່ ເຈິ້ງເຫີ, ນັກເດີນເຮືອຈີນໃນສະໄໝລາຊະວົງໝິງເດີນທາງທະເລລົງມະຫາສະໝຸດປາຊີຟິກຕາເວັນຕົກແລະມະຫາສະໝຸດອິນເດຍຈຳນວນ 7 ຄັ້ງແລະຢ້ຽມຢາມມາລາກາຈຳນວນ 5 ຄັ້ງ, ທັງໄດ້ຊີ້ອອກວ່າການກະທຳຂອງເຈິ້ງເຫີໃນການປົກປັກຮັກສາສັນຕິພາບນັ້ນ, ກໍແມ່ນສິ່ງຍອດຍິ່ງຂອງແນວຄິດທີ່ຮັກຫອມສັນຕິພາບແລະມີໄມຕິຈິດຖານບ້ານໃກ້ເຮືອນຄຽງຂອງປະຊາຊາດຈີນ, ທັງແມ່ນຊັບສິນດ້ານຈິດໃຈແລະວັດທະນະທຳຮ່ວມທີ່ໄດ້ສືບທອດມາຮອດປະຈຸບັນຂອງບັນດາປະເທດທີ່ໃນພາກພື້ນ.
ບົດຄວາມຍັງໄດ້ຊີ້ອອກວ່າ, ສອງປະເທດຈີນ-ມາເລເຊຍໄດ້ມີການຊ່ວຍຊູຍູ້ໜູນກັນແລະຕ່າງຝ່າຍຕ່າງມີຜົນປະໂຫຍດທາງດ້ານເສດຖະກິດ, ເຊິ່ງບໍ່ພຽງແຕ່ໄດ້ສ້າງຄວາມຜາສຸກໃຫ້ແກ່ປະຊາຊົນສອງຊາດເທົ່ານັ້ນ, ແຕ່ຍັງໄດ້ຊຸກຍູ້ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນນຳອີກ.
ໃນບົດຄວາມມີບາງຕອນໄດ້ຂຽນວ່າ, ສອງຝ່າຍເສີມຂະຫຍາຍທ່າແຮງທີ່ຊ່ວຍຊູຍູ້ໜູນກັນ, ສຸມໃສ່ດຳເນີນການຮ່ວມມືເພື່ອຍົກສູງຄວາມສາມາດໃນການຜະລິດຂອງສາກົນ, ສົ່ງເສີມວິສາຫະກິດຈຳນວນຫຼາຍກວ່າເກົ່າປະກອບສ່ວນເຂົ້າໃນການພັດທະນາຂອງເຂດນິຄົມອຸດສາຫະກຳຊິນໂຈ່ວແລະກວນຕານ, ເຊິ່ງຈະສ້າງໃຫ້ມີຜົນກຳໄລດ້ານການພັດທະນາຢ່າງຫຼວງຫຼາຍ, ທັງເພີ່ມພະລັງແຮງອັນແຂງແຮງເພື່ອຊຸກຍູ້ການເຕີບໂຕຢ່າງໜັກແໜ້ນຂອງສອງປະເທດແລະການພັດທະນາຊີວິດການເປັນຢູ່ຂອງປະຊາຊົນສອງຊາດ, ແລະເສີມຂະຫຍາຍບົດບາດເປັນການຄ້ຳປະກັນທີ່ສຳຄັນໃນການສ້າງຂົ້ວເຕີບໂຕໜັກແໜ້ນຂອງອາຊີຕາເວັນອອກ.
