ຕອນເຊົ້າວັນທີ22ພະຈິກນີ້ຕາມເວລາທ້ອງຖິ່ນ, ທ່ານຫຼີເຄີ້ຊຽງ, ນາຍົກລັດຖະມົນຕີຈີນໄດ້ເຂົ້າຮ່ວມພິທີອອກຖະແຫຼງການຮ່ວມຂອງຜູ້ນຳພາຄີ"ສັນຍາວ່າດ້ວຍສາຍພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນ"ຫຼືRCEPທີ່ຈັດຂຶ້ນຢູ່ສູນປະຊຸມສາກົນກົວລະລຳເປີຂອງມະເລເຊຍ. ຜູ້ນຳຂອງ10ປະເທດອາຊຽນ,ສ.ເກົາຫຼີ, ຍີ່ປຸ່ນ, ອົສຕຼາລີ,ນູແວນເຊລັງແລະອິນເດຍກໍ່ໄດ້ເຂົ້າຮ່ວມ.
ໃນຖະແຫຼງການຮ່ວມຊີ້ອອກວ່າ,ຜູ້ນຳປະເທດພາຄີRCEPຊົມເຊີຍຄວາມຄືບໜ້າທີ່ແທ້ຈິງໃນການເຈລະຈາ.RCEPມີຄວາມໝາຍອັນສຳຄັນຕໍ່ການຍົກລະດັບຊີວິດການເປັນຢູ່ຂອງປະຊາຊົນແລະຊຸກຍູ້ການພັດທະນາເສດຖະກິດໃນພາກພື້ນ, ເປັນຊ່ອງທາງອັນສຳຄັນທີ່ຊຸກຍູ້ເສດຖະກິດໃນພາກພື້ນເຊື່ອມໂຍງເຂົ້າກັນເປັນອັນໜຶ່ງອັນດຽວກັນ. ມີຜົນດີຕໍ່ການຊຸກຍູ້ໃຫ້ເສດຖະກິດພັດທະນາຢ່າງດຸນດ່ຽງກັນ, ເພີ່ມທະວີສາຍພົວພັນດ້ານເສດຖະກິດລະຫວ່າງບັນດາປະເທດ. ຜູ້ນຳປະເທດຕ່າງໆຮຽກຮ້ອງໃຫ້ຄະນະເຈລະຈາເລັ່ງລັດດຳເນີນວຽກງານ, ພະຍາຍາມໃຫ້ສຳເລັດການເຈລະຈາພາຍໃນປີ2016.
ການເຈລະຈາກ່ຽວກັບRCEPແມ່ນເລີ່ມຕົ້ນຢ່າງເປັນທາງການໃນເດືອນພຶດສະພາປີ2013,ມາຮອດປະຈຸບັນໄດ້ຈັດການເຈລະຈາ10ຮອບແລະກອງປະຊຸມລັດຖະມົນຕີເສດຖະກິດການຄ້າ4ຄັ້ງແລ້ວ,ຈຸດປະສົງແມ່ນເພື່ອຕົກລົງສັນຍາການຄ້າເສລີທີ່ທັນສະໄໝ, ຮອບດ້ານ, ມີຄຸນນະພາບສູງແລະຕ່າງຝ່າຍຕ່າງມີຜົນປະໂຫຍດ.
 |
