ຕອນເຊົ້າວັນທີ22ພະຈິກນີ້ຕາມເວລາທ້ອງຖິ່ນ, ທ່ານຫຼີເຄີ້ຊຽງ,ນາຍົກລັດຖະມົນຕີຈີນໄດ້ບັນລະຍາຍຫຼັກການແລະຫຼັກໝັ້ນຂອງຈີນກ່ຽວກັບບັນຫາທະເລຈີນໃຕ້ໃນກອງປະຊຸມສຸດຍອດອາຊີຕາເວັນອອກ.
ທ່ານຫຼີເຄີ້ຊຽງກ່າວວ່າ,ຈີນພະຍາຍາມໃຫ້ແກ້ໄຂຄວາມຂັດແຍ່ງກ່ຽວກັບທະເລຈີນໃຕ້ໂດຍຜ່ານການປຶກສາຫາລືແລະເຈລະຈາກັນລະຫວ່າງປະເທດອະທິປະໄຕທີ່ມີສ່ວນກ່ຽວຂ້ອງໂດຍກົງ, ຈີນແລະປະເທດອາຊຽນຮ່ວມກັນຮັກສາສັນຕິພາບແລະສະເຖຍລະພາບຂອງພາກພື້ນທະເລຈີນໃຕ້. ໃນຫຼາຍປີຜ່ານມາ, ໂດຍຜ່ານຄວາມພະຍາຍາມຮ່ວມກັນຂອງຈີນແລະປະເທດອາຊຽນ, ຢູ່ພາກພື້ນທະເລຈີນໃຕ້ໄດ້ຮັກສາສັນຕິພາບແລະສະເຖຍລະພາບໂດຍລວມພາຍໃຕ້ສະພາບການທີ່ບໍ່ມີການແຊກແຊງຈາກອິດທິກຳລັງພາຍນອກ. ພວກຂ້າພະເຈົ້າພວມຈັດຕັ້ງປະຕິບັດ"ຖະແຫຼງການວ່າດ້ວຍການປະຕິບັດງານຂອງບັນດາຝ່າຍຢູ່ທະເລຈີນໃຕ້"ຢ່າງຮອບດ້ານແລະມີປະສິດທິຜົນ, ດຳເນີນການຮ່ວມມືອັນແທ້ຈິງ, ຕັ້ງໜ້າຊຸກຍູ້ການປຶກສາຫາລືກ່ຽວກັບ"ລະບຽບການວ່າດ້ວຍການປະຕິບັດງານຢູ່ທະເລຈີນໃຕ້", ແລະໄດ້ຮັບຄວາມຄືບໜ້າທີ່ສຳຄັນ.
ທ່ານຍັງຊີ້ອອກວ່າ, ຈີນໄດ້ລິເລີ່ມຢ່າງຕັ້ງໜ້າ, ແລະສະໜັບສະໜູນຢ່າງເດັດດ່ຽວຕໍ່ສິດເສລີໃນການເດີນເຮືອແລະການບິນຢູ່ທະເລຈີນໃຕ້ຕະຫຼອດມາ. ຈີນເປັນປະເທດທີ່ໃຫ້ຄວາມສຳຄັນສູງຕໍ່ການຄ້າໃນໂລກ, ທະເລຈີນໃຕ້ເປັນເສັ້ນທາງເດີນເຮືອສາກົນທີ່ສຳຄັນ,ຖ້າສະຖານະການຢູ່ທະເລຈີນໃຕ້ບໍ່ມີສະເຖຍລະພາບ, ຜູ້ທີ່ຈະປະສົບຜົນເສຍຫາຍກ່ອນໝູ່ກໍ່ແມ່ນປະເທດທີ່ຢູ່ໃນພາກພື້ນນີ້ ເຊິ່ງລວມທັງປະເທດຈີນ, ກໍ່ບໍ່ມີຜົນດີຕໍ່ປະເທດອື່ນ. ຄວາມເສລີພາບໃນດ້ານການເດີນເຮືອແລະການບິນຢູ່ທະເລຈີນໃຕ້ບໍ່ເຄີຍມີບັນຫາແຕ່ໃດໆມາ, ປະເທດໃນພາກພື້ນນີ້ມີເຈຕະນາ, ແລະກໍ່ມີຄວາມສາມາດສືບຕໍ່ຮັກສາໃຫ້ດີ. ຈີນດຳເນີນການກໍ່ສ້າງຢູ່ເທິງເກາະດອນທີ່ຂຶ້ນກັບຕົນເອງນັ້ນແມ່ນສົມເຫດສົມຜົນແລະຊອບດ້ວຍກົດໝາຍ, ບໍ່ໄດ້ແນໃສ່ຫຼືບໍ່ເປັນຜົນກະທົບຕໍ່ປະເທດໃດໆ, ມີຜົນດີຕໍ່ການຮັກສາເສລີພາບໃນການເດີນເຮືອ, ຮັບມືກັບໄພພິບັດເທິງທະເລ, ບໍ່ເຖິງຂັ້ນທີ່ວ່າ"ຫັນເປັນການທະຫານ". ປະເທດທີ່ກ່ຽວຂ້ອງນຳໃຊ້ສິດເສລີພາບໃນດ້ານການເດີນເຮືອແລະການບິນ,ຄວນເຄົາລົບອະທິປະໄຕແລະຄວາມໝັ້ນຄົງຂອງປະເທດທີ່ຢູ່ແຄມທະເລໃນພາກພື້ນນີ້.
 |
