ຕອນບ່າຍວັນທີ 22 ພະຈິກນີ້ຕາມເວລາທ້ອງຖິ່ນ, ທ່ານຫຼີເຄີ້ສຽງ, ນາຍົກລັດຖະມົນຕີ ຈີນ ພ້ອມດ້ວຍຜູ້ນຳຂອງ 10 ປະເທດອາຊຽນໄດ້ ຮ່ວມກັນເປັນພະຍານໃນພິທີລົງນາມໃນອະນຸສັນຍາສາທາລະນະລັດປະຊາຊົນຈີນ ແລະ ສະມາຄົມປະຊາຊາດອາຊີຕາເວັນ ອອກສຽງໃຕ້ວ່າດ້ວຍການປັບປຸງ "ສັນຍາຂອບການຮ່ວມມືດ້ານເສດຖະກິດຢ່າງຮອບດ້ານລະຫວ່າງຈີນ-ອາຊຽນ" ພ້ອມດ້ວຍຂໍ້ສັນຍາບາງຂໍ້ ເຊິ່ງເປັນເອກະສານໝາກຜົນແຫ່ງການສຳເລັດການເຈລະຈາຮອບດ້ານກ່ຽວກັບການຍົກລະດັບເຂດການຄ້າເສລີຈີນ-ອາຊຽນ ທີ່ຈັດຂຶ້ນຢູ່ສູນປະຊຸມສາກົນກົວລາລຳເປີ, ນະຄອນຫຼວງຂອງມາເລເຊຍ. ທ່ານກາວຫູເສິງ, ລັດຖະມົນຕີວ່າການກະຊວງການຄ້າຈີນ ແລະ ລັດຖະມົນຕີເສດຖະກິດການຄ້າຂອງ 10 ປະເທດອາຊຽນ ໄດ້ຕາງໜ້າລັດຖະບານຂອງປະເທດຕົນຮ່ວມກັນລົງນາມໃນອະນຸສັນຍາດັ່ງກ່າວ.
ອະນຸສັນຍາກ່ຽວກັບການຍົກລະດັບເຂດການຄ້າເສລີຈີນ-ອາຊຽນ ແມ່ນສັນຍາຍົກລະດັບເຂດການຄ້າທີ່ໄດ້ສຳເລັດຂັ້ນຕອນການເຊັນສະບັບທຳອິດບົນພື້ນຖານເຂດການຄ້າເສລີທີ່ມີຢູ່ໃນປັດຈຸບັນຂອງຈີນ, ເຊິ່ງໄດ້ສະແດງໃຫ້ເຫັນເຖິງຄວາມມຸ່ງມາດປາຖະໜາຮ່ວມກັນແລະຄວາມຕ້ອງການຕາມສະພາບຄວາມເປັນຈິງຂອງສອງຝ່າຍໃນການລົງເລິກແລະຂະຫຍາຍການຮ່ວມມືດ້ານເສດຖະກິດການຄ້າ. ການບັນລຸຂໍ້ຕົກລົງແລະລົງນາມໃນອະນຸສັນຍາດັ່ງກ່າວ ຈະເປັນການສະໜອງກຳລັງແຮງຊຸກດັນໃຫ້ແກ່ການພັດທະນາເສດຖະກິດຂອງສອງຝ່າຍ, ມີຜົນດີຕໍ່ການເລັ່ງລັດການສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ, ແລະເຮັດໃຫ້ເປົ້າໝາຍປີ 2020 ທີ່ໃຫ້ມູນຄ່າການຄ້າລະຫວ່າງສອງຝ່າຍບັນລຸເຖິງ 1.000 ຕື້ໂດລາສະຫະລັດນັ້ນປາກົດຜົນເປັນຈິງ, ພ້ອມທັງຈະເປັນການຊຸກຍູ້ການເຈລະຈາ "ສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ" (RCEP) ແລ ຂະບວນການສ້າງເຂດການຄ້າເສລີອາຊີປາຊີຟິກ.
